75-ാമത് കാന്‍ ഫിലിം ഫെസ്റ്റിവലിലേക്കുള്ള യാത്ര; ബാനറും പൂച്ചെണ്ടുകളും, പൂജാ ഹെഗ്ഡെയ്ക്ക് സര്‍പ്രൈസ് ഒരുക്കി ആരാധകര്‍

നടി പൂജാ ഹെഗ്ഡെയ്ക്ക് സര്‍പ്രൈസ് ഒരുക്കി ആരാധകര്‍.75-ാമത് കാന്‍ ഫിലിം ഫെസ്റ്റിവലിലേക്കുള്ള യാത്രയ്ക്കിടെയാണ് സര്‍പ്രൈസ് ഒരുക്കിയത്. മുംബൈ വിമാനത്താവളത്തില്‍ വച്ചായിരുന്നു താരത്തിന് ആശംസകള്‍ അറിയിച്ചുകൊണ്ട് ആരാധകര്‍ മുന്നറിയിപ്പില്ലാതെ എത്തിയത്. ‘കാന്‍ ഫിലിം ഫെസ്റ്റിവലിലേക്ക് ഇന്ത്യയെ പ്രതിനിതീകരിച്ച് പങ്കെടുക്കുന്നതില്‍ അഭിനന്ദനങ്ങള്‍’ എന്നെഴുതിയ ബാനറും പൂച്ചെണ്ടുമായാണ് അവര്‍ താരത്തെ ആവരവേറ്റത്.

കാനില്‍ പങ്കെടുക്കാന്‍ ക്ഷണിച്ച നിരവധി ഇന്ത്യന്‍ താരങ്ങളില്‍ ഒരാളാണ് പൂജ ഹെഗ്ഡെ. ഐശ്വര്യ റായ് ബച്ചന്‍, ദീപിക പദുകോണ്‍, നയന്‍താര എന്നിവരും ഇന്ത്യയില്‍ നിന്ന് പങ്കെടുക്കുന്ന മറ്റു താരങ്ങളാണ്. ജൂറികളില്‍ ഒരാളായാണ് ദീപിക പദുകോണ്‍ കാനിന്റെ ഭാഗമാകുന്നത്.

മത്സര വിഭാഗത്തിലേക്ക് ഇന്ത്യന്‍ ചിത്രങ്ങള്‍ ഒന്നുമില്ലെങ്കിലും ഇന്ത്യയില്‍ നിന്ന് ആറ് ചിത്രങ്ങളാണ് കാനില്‍ പ്രദര്‍ശിപ്പിക്കുന്നത്. പത്ത് ദിവസത്തെ മേളയില്‍ നിരവധി രാജ്യങ്ങളില്‍ നിന്നുള്ള സിനിമകള്‍ പ്രദര്‍ശിപ്പിക്കും. ഫ്രഞ്ച് നടനും ചലച്ചിത്രകാരനുമായ വിന്‍സെന്റ് ലിന്‍ഡന്‍ ആണ് ജൂറി പ്രസിഡന്റ്. ദീപിക പദുകോണ്‍ കൂടാതെ മികച്ച വിദേശഭാഷാ ചിത്രത്തിനുള്ള ഓസ്‌കര്‍ രണ്ട് വട്ടം നേടിയ കാന്‍ മേളയില്‍ രണ്ട് വട്ടം പുരസ്‌കാരസമ്മാനിതനായ ഇറാനിയന്‍ സംവിധായകന്‍ അഷ്ഗര്‍ ഫര്‍ഹാദിയാണ് മറ്റൊരു ജൂറി.