ഈ സിനിമ തീരുമ്പോഴേയ്ക്കും നിങ്ങള്‍ തന്നെ ഒരേ സമയം വെറുക്കുകയും സ്നേഹിക്കുകയും ചെയ്യുമെന്നാണ് ബേസില്‍ ജോസഫ് പറഞ്ഞത്; തുറന്ന് പറഞ്ഞ് ടൊവിനോ തോമസ്

നിരവധി ചിത്രങ്ങളിലൂടെ മലയാളി പ്രേക്ഷകര്‍ക്കേറെ പ്രിയപ്പെട്ട താരമാണ് ടൊവിനോ തോമസ്. ബേസില്‍ ജോസഫിന്റെ സംവിധാനത്തില്‍ ‘മിന്നല്‍ മുരളി’ എന്ന ചിത്രമാണ് റിലീസ് കാത്തിരിക്കുന്നത്. ഡിസംബര്‍ 24ന് ആണ് ചിത്രം റിലീസ് ചെയ്യുന്നത്. ഇപ്പോഴിതാ ചിത്രത്തിന്റെ പ്രൊമോ വീഡിയോ പുറത്തു വിട്ടിരിക്കുകയാണ് നെറ്റ്ഫ്ളിക്സ്. സിനിമയിലെ ചില ഭാഗങ്ങളും സംവിധായകന്‍ ബേസില്‍ ജോസഫും നായകന്‍ ടൊവിനോ തോമസും പങ്കുവയ്ക്കുന്ന അനുഭവങ്ങളുമാണ് വീഡിയോയില്‍.

ബേസില്‍ തന്റടുത്ത് ആദ്യം കഥ പറയുന്ന സമയത്ത് ഒരു കോമിക് ബുക്ക് കഥാപാത്രമായിട്ടാണ് തോന്നിയതെന്ന് ടൊവിനോ പറയുന്നു. തിരക്കഥ പൂര്‍ത്തിയായപ്പോഴേക്കും അത് വലിയൊരു സിനിമയായി. ഒരു ഒറിജിനല്‍ സൂപ്പര്‍ഹീറോ സ്‌ക്രിപ്റ്റ് മലയാളത്തില്‍ വന്നാല്‍ എങ്ങനെയിരിക്കും എന്നതായിരുന്നു ചിന്ത. തന്റെ കരിയറിലെ ഏറ്റവും വലിയ സിനിമയായിരിക്കും മിന്നല്‍ മുരളി.

ബേസില്‍ തന്നോട് പറഞ്ഞത് തനിക്ക് ഇപ്പോഴും ഓര്‍മയുണ്ട്. ഈ സിനിമ തീരുമ്പോഴേക്കും നിങ്ങള്‍ തന്നെ ഒരേ സമയം വെറുക്കുകയും സ്നേഹിക്കുകയും ചെയ്യുമെന്ന്. സിനിമ എങ്ങനെയായോ അതിനായുള്ള സ്നേഹം, ജോലി ഭാരം ഓര്‍ത്തുള്ള വെറുപ്പും എന്ന് ടൊവിനോ പറഞ്ഞു. ഒരു സൂപ്പര്‍ഹീറോ സിനിമ ചെയ്യാന്‍ ആ ജോണറിന്റെതായി പ്രശ്നങ്ങള്‍ ഉണ്ട്. മലയാളത്തില്‍ അത് ചെയ്യുന്നതിനും പ്രശ്നങ്ങളുണ്ടെന്നും ബേസില്‍ പറയുന്നു.

പക്ഷേ നമുക്ക് ചെയ്യാന്‍ പറ്റില്ല എന്ന് തോന്നുന്ന സിനിമ ചെയ്യുന്നതിലാണ് എക്സൈറ്റ്മെന്റ് ഉള്ളത്. അപ്പോഴേ വെല്ലുവിളികളൊക്കെ കൗതുകകരമായി വരൂ. മിന്നല്‍ മുരളിയിലെ മിക്കവാറും എല്ലാ സീനിലും ഒരു സൂപ്പര്‍ഹീറോ എലമെന്റ് ഉണ്ട്. കുറച്ചുകൂടി പ്രാഥമികമായ മനുഷ്യ വികാരങ്ങള്‍ കൈകാര്യം ചെയ്യുന്ന സിനിമയാണ്. സൂപ്പര്‍ ഹീറോയിസം അതില്‍ വരുന്ന ഒരു എക്സ് ഫാക്റ്റര്‍ മാത്രമാണെന്നും ബേസില്‍ വ്യക്തമാക്കി.