പിറന്നാളിനൊക്കെ അവനോട് സംസാരിക്കും, സമ്മാനങ്ങൾ എത്തിച്ചുകൊടുക്കും… അവൻ ജീവിതത്തിലേക്ക് വരാൻ ഒരു കാരണം വിജയ് ആണ്; നടൻ നാസർ

തമിഴകത്തിന്റെ സൂപ്പർതാരം വിജയ്ക്ക് തന്റെ ആരാധകരോടുള്ള ആത്മബന്ധം ഏറെ പ്രസിദ്ധമാണ്. ആരാധകരുടെ വീടുകൾ സന്ദർശിക്കുകയും ബുദ്ധിമുട്ടുകൾ ഉള്ളവർക്ക് സഹായങ്ങൾ എത്തിച്ചുകൊടുക്കുകയും ചെയ്യാറുണ്ട്. ഇപ്പോൾ ഇതാ അത്തരത്തിലുള്ള ഒരു അനുഭവം പങ്കുവെച്ചിരിക്കുകയാണ് നടൻ നാസർ.

തന്റെ മൂത്തമകന് ഒരു അപകടത്തെ തുടർന്ന് ഓർമ്മശക്തി നഷ്ടമായി. അവന് ഓർമ്മയുള്ളത് വിജയിയെ മാത്രമാണ്. ഇതറിഞ്ഞ വിജയ് തന്റെ മകനെ ജന്മദിനത്തിൽ പതിവായി വിളിച്ച് സംസാരിക്കാൻ തുടങ്ങി. മകൻ ജീവിതത്തിലേക്ക് തിരിച്ചുവരാൻ ഒരു കാരണം വിജയ് ആണെന്നും അദ്ദേഹം പറഞ്ഞു. നടന്‍ മനോബാലയുമായി നടത്തിയ അഭിമുഖത്തിലാണ് നാസര്‍ ഇക്കാര്യം തുറന്നു പറഞ്ഞത്.

നാസറിന്റെ വാക്കുകൾ:

മൂത്തമകന്‍ നടന്‍ വിജയിയുടെ വലിയ ഫാനാണ്. അവന് ഒരു വലിയ അപകടം സംഭവിച്ചു. അവന്റെ ഓര്‍മ്മ നഷ്ടമായി. ഇന്നും അവന് ഓര്‍മ തിരിച്ചു കിട്ടിയിട്ടില്ല. എന്നാല്‍ അവന് വിജയ്‌യെ മാത്രമാണ് ഇപ്പോഴും ഓര്‍മയുള്ളത്. വിജയ് എന്നും പറഞ്ഞു ബഹളം വെക്കും. ഞങ്ങള്‍ ആദ്യം വിചാരിച്ചത് അവന്റെ കൂട്ടുകാരൻ വിജയ് ആയിരിക്കും എന്നാണ്. അതുകൊണ്ടു ഞങ്ങൾ അത് ഗൗരവമായി എടുത്തില്ല. പിന്നീടാണ് ഇത് നടന്ന വിജയെക്കുറിച്ചാണെന്ന് മനസ്സിലായത്. ഈ വിഷയം വിജയ് സാര്‍ കേള്‍ക്കാനിടയായി. ഇത് അദ്ദേഹം വളരെ വ്യക്തിപരമായി എടുത്ത് പിറന്നാളിനൊക്കെ അവനോട് സംസാരിക്കും. സമ്മാനങ്ങൾ എത്തിച്ചുകൊടുക്കും. അവൻ ജീവിതത്തിലേക്ക് വരാൻ ഒരു കാരണം വിജയ് ആണ്.