പുതിയ ചിത്രത്തിന്റെ ട്രെയ്ലര്‍ കാണാനായി തിയേറ്റര്‍ തകര്‍ത്ത് ആരാധകര്‍; വൈറലായി വീഡിയോ

നടനും രാഷ്ട്രീയ പ്രവര്‍ത്തകനുമായ പവന്‍ കല്യാണിന്റെ പുതിയ ചിത്രത്തിന്റെ ട്രെയ്ലര്‍ കാണാനായി തിയേറ്റര്‍ തകര്‍ത്ത് ആരാധകര്‍.

വക്കീല്‍ സാബ് എന്ന ചിത്രത്തിന്റെ ട്രെയ്ലര്‍ കാണാനാണ് ആരാധകര്‍ തള്ളിക്കയറിയത്. തിയേറ്ററിന്റെ അകത്ത് കടക്കാന്‍ സാധിക്കാത്ത ആളുകള്‍ ആണ് ചില്ലു തകര്‍ത്ത് അകത്തേക്ക് ഓടിക്കയറിയത്.

ആന്ധ്രപ്രദേശിലെ വിശാഖപട്ടണത്തെ ശരത് തിയേറ്ററില്‍ തിങ്കളാഴ്ചയാണ് സംഭവം. സംഭവത്തിന്റെ വീഡിയോയാണ് സോഷ്യല്‍ മീഡിയയില്‍ വൈറലാകുന്നത്.

ട്രെയ്ലര്‍ റിലീസ് ചെയ്ത ഏതാനും തിയേറ്ററിന്റെ മുന്നില്‍ ആളുകള്‍ രണ്ട് മണിക്ക് തന്നെ നിറഞ്ഞിരുന്നു. ഹോളി ആയതിനാല്‍ ഇന്നലെ വൈകിട്ട് നാലു മണിക്ക് ആയിരുന്നു റിലീസ്.

തിയേറ്ററിന്റെ മുമ്പില്‍ പൂജയും നടന്നിരുന്നു. അമിതാഭ് ബച്ചന്‍ കേന്ദ്ര കഥാപാത്രമായെത്തിയ പിങ്ക് എന്ന ചിത്രത്തിന്റെ തെലുങ്ക് റീമേക്കാണ് വക്കീല്‍ സാബ്. രണ്ട് വര്‍ഷത്തിന് ശേഷം പവന്‍ കല്യാണ്‍ സിനിമയിലേക്ക് തിരിച്ച് വരുന്ന ചിത്രം എന്ന പ്രത്യേകതയും ചിത്രത്തിനുണ്ട്.