വിജയ് ചിത്രം മാസ്റ്റര്‍ മോഷ്ടിച്ചത്, തെളിവുകള്‍ ഉണ്ട്, വരും ദിവസങ്ങളില്‍ എല്ലാം പുറത്ത് വിടും

വിജയ് ചിത്രം മാസ്റ്ററിന്റെ കഥ മോഷണമെന്ന് ആരോപണവുമായി കെ.രംഗദാസ് രംഗത്ത്. തന്റെ കഥയാണ് ഇതെന്നും സൗത്ത് ഇന്ത്യന്‍ ഫിലിം റൈറ്റേഴ്‌സ് അസോസിയേഷനില്‍ താനിത് രജിസ്റ്റര്‍ ചെയ്തിട്ടുണ്ടെന്നുമാണ് ഇയാളുടെ ആരോപണം.

2017 ഏപ്രില്‍ 7 നാണ് കഥ രജിസ്റ്റര്‍ ചെയ്തതെന്നും ഇത് ശരിയാണെന്ന് സാധൂകരിക്കുന്ന തെളിവുകള്‍ വരും ദിവസങ്ങളില്‍ പുറത്തുവിടുമെന്നും രംഗദാസ് പറയുന്നു. ഈ മാസം 13നാണ് ചിത്രം റിലീസ് ചെയ്യുന്നത്. ഇതാദ്യമായല്ല വിജയ് ചിത്രത്തിനെതിരെ ഇത്തരം ആരോപണങ്ങള്‍ ഉയരുന്നത്. ‘സര്‍ക്കാ’രും നേരത്തെ മോഷണ ആരോപണം നേരിട്ടിരുന്നു.

കോവിഡ് പ്രതിസന്ധികള്‍ക്കു ശേഷം ഇന്ത്യന്‍ സിനിമയിലെ തന്നെ ആദ്യ റിലീസ് ആണ് ‘മാസ്റ്റര്‍’. ഏപ്രില്‍ 9 ന് തീയേറ്ററുകളില്‍ എത്തേണ്ടിയിരുന്ന ചിത്രം കോവിഡ് വില്ലനായി നില്‍ക്കുന്നതിനാല്‍ വൈകുകയായിരുന്നു.

കൈതിയ്ക്ക് ശേഷം ലോകേഷ് കനകരാജ് സംവിധാനം ചെയ്യുന്ന ചിത്രമാണ് മാസ്റ്റര്‍. ചിത്രത്തില്‍ രവിചന്ദര്‍ ശന്തനു, ഭാഗ്യരാജ്, മാളവിക മോഹനന്‍, ആന്‍ഡ്രിയ ജെറീമിയ എന്നിവര്‍ പ്രധാന കഥാപാത്രത്തെ അവതരിപ്പിക്കുന്നു. അനിരുദ്ധാണ് ചിത്രത്തിനായി സംഗീത സംവിധാനം നിര്‍വഹിക്കുന്നത്.