ജൂഡ് ആന്റണിയുടെ ‘സാറാസ്’ ഒരുങ്ങുന്നു; ഫസ്റ്റ് ലുക്ക് പോസ്റ്റർ പുറത്ത്

മലയാളികളുടെ പ്രിയപ്പെട്ട സംവിധായകനാണ് ജൂഡ് ആന്റണി. അന്ന ബെന്നിനെ കേന്ദ്രകഥാപാത്രമാക്കി ഒരുക്കുന്ന സാറാസ്’ ആണ് ജൂഡിന്റെ പുതിയ സിനിമ. സണ്ണി വെയിനാണ് ചിത്രത്തിലെ നായകൻ
ഇപ്പോൾ ഇതാ ചിത്രത്തിന്റെ ഫസ്റ്റ്‌ലുക്ക് പോസ്റ്റര്‍ ആണ് പുറത്തുവിട്ടിരിക്കുന്നത്. പച്ചക്കറി മാര്‍ക്കറ്റില്‍ മത്തങ്ങയും പിടിച്ചു നില്‍ക്കുന്ന അന്നയെയാണ് പോസ്റ്ററില്‍ കാണാനാവുക.

അന്നയുടെ പിതാവും തിരക്കഥാകൃത്തുമായ ബെന്നി പി. നായരമ്പലവും ചിത്രത്തില്‍ അഭിനയിക്കുന്നു എന്ന പ്രത്യേകതയും സിനിമയ്ക്കുണ്ട്. പ്രസവിക്കാന്‍ താല്‍പര്യമില്ലാത്ത പെണ്‍കുട്ടിയുടെ കഥയാണ് സാറാസ് പറയുക. കോവിഡ് കാലത്ത് ഏറെ വെല്ലുവിളി നിറഞ്ഞ പശ്ചാത്തലത്തിലാണ് സാറാസ് പൂര്‍ത്തിയാക്കിയത് എന്നാണ് ജൂഡ് ആന്റണി പറയുന്നത്. നൂറോളം ജൂനിയര്‍ ആര്‍ട്ടിസ്റ്റുകള്‍ തന്നെ ചിത്രത്തില്‍ വേഷമിടുന്നുണ്ട്. 38 ലൊക്കേഷനുകളിലായാണ് ചിത്രത്തിന്റെ ഷൂട്ടിംഗ് നടന്നത്. എല്ലാവര്‍ക്കും കോവിഡ് ടെസ്റ്റ് നടത്തി, മുന്‍ കരുതലുകളെല്ലാം സ്വീകരിച്ച് ആയിരുന്നു ഷൂട്ടിംഗ്. സണ്ണി വെയ്ന്‍, വിനീത് ശ്രീനിവാസന്‍, അജു വര്‍ഗീസ്, സിജു വില്‍സണ്‍, ശ്രിന്ദ, ‘കലക്ടര്‍ ബ്രോ’ പ്രശാന്ത്, ധന്യ വര്‍മ്മ എന്നിവരും ചിത്രത്തില്‍ വേഷമിടുന്നു.

ഡോ. അക്ഷയ് ഹരീഷിന്റേതാണ് തിരക്കഥ. ഛായാഗ്രഹണം നിമിഷ് രവി. സംഗീതം ഷാന്‍ റഹ്മാന്‍. വിനീത് ശ്രീനിവാസനും ഭാര്യ ദിവ്യയും ചിത്രത്തില്‍ പാടുന്നുണ്ട്. ക്ലാസ്‌മേറ്റ്‌സ് അടക്കം മലയാളത്തിലെ നിരവധി ഹിറ്റുകള്‍ സമ്മാനിച്ച നിര്‍മ്മാതാവ് ശാന്ത മുരളിയും പി.കെ മുരളീധരനുമാണ് ഈ ചിത്രം നിര്‍മ്മിക്കുന്നത്.