വിക്രം ഇനി മുത്തച്ഛൻ; മകൾ അക്ഷിതയ്ക്ക് പെൺകുഞ്ഞ്

തമിഴകത്തിന്റെ സൂപ്പര്‍ സ്റ്റാര്‍ ചിയാന്‍ വിക്രം മുത്തച്ഛനായി. വിക്രത്തിന്റെ മകള്‍ അക്ഷിതയാണ് പെൺകുഞ്ഞിന് ജന്മം നൽകിയത്. ഇന്നലെ ഉച്ചയ്ക്ക് ഒരു മണിയോടെയാണ് അക്ഷിത പെണ്‍കുഞ്ഞിന് ജന്‍മം നല്‍കിയത് എന്നാണ് റിപ്പോര്‍ട്ടുകള്‍. തമിഴ് മാധ്യമങ്ങളാണ് ഇത് സംബന്ധിച്ചുള്ള വാര്‍ത്ത പുറത്തുവിട്ടിരിക്കുന്നത്.

ഡിഎംകെ നേതാവായിരുന്ന കരുണാനിധിയുടെ പേരക്കുട്ടി മനു രഞ്ജിത്തും അക്ഷിതയുമായുള്ള വിവാഹം 2017 ഒക്ടോബറിലായിരുന്നു നടന്നത്. കരുണാനിധിയുടെ മകൻ എം.കെ മുത്തുവിന്‍റെ മകളുടെ മകനാണ് മനു. കരുണാനിധിയുടെ ഗോപാലപുരത്തെ വീട്ടില്‍ വച്ചായിരുന്നു മനുവിന്റെയും അക്ഷിതയുടെയും വിവാഹം നടന്നത്.

അതേസമയം, വിക്രത്തിന്റെ മകന്‍ ധ്രൂവ് സിനിമാരംഗത്ത് തന്റെ കരിയര്‍ തുടങ്ങിക്കഴിഞ്ഞു. വിജയ് ദേവരകൊണ്ട ചിത്രം അര്‍ജുന്‍ റെഡ്ഡിയുടെ തെലുങ്കു റീമേക്ക് ആദിത്യ വര്‍മ്മ എന്ന ചിത്രത്തിലൂടെയാണ് ധ്രൂവ് അഭിനയരംഗത്തേക്ക് എത്തിയത്. കോബ്ര ആണ് വിക്രത്തിന്റെതായി ഒരുങ്ങിക്കൊണ്ടിരിക്കുന്ന ചിത്രം. ചിത്രത്തിന്റെ ഡബ്ബിംഗ് പുരോഗമിക്കുകയാണ്.