News
മൂന്ന് വമ്പന്‍ താരങ്ങള്‍ നിരസിച്ചു; ‘ബ്രഹ്മാസ്ത്ര’യുടെ രണ്ടാം ഭാഗത്തില്‍ നായകനാകുന്നത് ഈ തെന്നിന്ത്യന്‍ താരം
മൂന്ന് വമ്പന്‍ താരങ്ങള്‍ നിരസിച്ചു; ‘ബ്രഹ്മാസ്ത്ര’യുടെ രണ്ടാം ഭാഗത്തില്‍ നായകനാകുന്നത് ഈ തെന്നിന്ത്യന്‍ താരം
ആലിയ ഭട്ട്-രണ്‍ബിര്‍ കപൂര്‍ എന്നിവര്‍ ഒരുമിച്ചെത്തിയ സൂപ്പര്‍ഹിറ്റ് ചിത്രമായിരുന്നു ‘ബ്രഹ്മാസ്ത്ര’. ഇപ്പോഴിതാ ചിത്രത്തിന്റെ രണ്ടാം ഭാഗമായ ‘ദേവ്’ എന്ന സിനിമയ്ക്കായി തെന്നിന്ത്യന്‍ താരം വിജയ് ദേവരകൊണ്ടയെ പരിഗണിക്കുന്നുവെന്നാണ് പുറത്ത് വന്നിരിക്കുന്ന റിപ്പോര്‍ട്ടുകള്‍. അയാന്‍ മുഖര്‍ജി സംവിധാനം ചെയ്ത ചിത്രത്തിന്റെ രണ്ടാം ഭാഗത്തിനായി ആദ്യം പരിഗണിച്ചത് ഹൃത്വിക് റോഷനെ ആയിരുന്നു.
എന്നാല്‍ പിന്നീട് രണ്‍വീര്‍ സിംഗ് ആകും ദേവ് എന്ന റിപ്പോര്‍ട്ടുകളാണ് വന്നത്. ഹൃത്വിക് റോഷന്‍, രണ്‍വീര്‍ സിംഗ് എന്നിവര്‍ക്ക് ശേഷം തെലുങ്ക് സൂപ്പര്‍ താരം യാഷ് ദേവ് ആയി എത്തുമെന്ന റിപ്പോര്‍ട്ടുകളും വന്നിരുന്നു. ചിത്രത്തിന്റെ അണിയറ പ്രവര്‍ത്തകര്‍ യാഷിനെ ചിത്രത്തിനായി സമീപിച്ചതായുള്ള റിപ്പോര്‍ട്ടുകള്‍ പുറത്തു വന്നിരുന്നു.
എന്നാല്‍ താന്‍ ബോളിവുഡില്‍ അഭിനയിക്കാന്‍ ആഗ്രഹിക്കുന്നില്ലെന്ന് യാഷ് പറഞ്ഞിരുന്നു. ഇതിന് പിന്നാലെയാണ് ദേവ് ആയി വിജയ് ദേവരകൊണ്ട എത്തുമെന്ന റിപ്പോര്‍ട്ടുകള്‍ എത്തിയിരിക്കുന്നത്. മൂന്ന് താരങ്ങളെ സമീപിച്ചിട്ടും അവര്‍ തയാറാകാതിരുന്നതിനാല്‍ ഒടുവില്‍ വിജയ്‌യെ സമീപിക്കുകയായിരുന്നു എന്നാണ് റിപ്പോര്‍ട്ടുകള്‍.
അതേസമയം, ‘ലൈഗര്‍’ ചിത്രത്തിന്റെ പരാജയത്തിന് ശേഷം വീണ്ടുമൊരും സിനിമ വന്നാല്‍ നിര്‍മ്മാതാവ് കരണ്‍ ജോഹറിനൊപ്പം പ്രവര്‍ത്തിക്കുമെന്ന് വിജയ് പറഞ്ഞിരുന്നു. അതുകൊണ്ട് തന്നെ ബ്രഹ്മാസ്ത്രയുടെ രണ്ടാം ഭാഗത്തില്‍ വിജയ് നായകനാകും എന്നാണ് സൂചനകള്‍.
ബ്രഹ്മാസ്ത്രയുടെ ആദ്യ ഭാഗത്തില്‍ ശിവ എന്ന കഥയാണ് പറഞ്ഞത്. നായക കഥാപാത്രം ശിവയായി രണ്‍ബിര്‍ വേഷമിട്ടപ്പോള്‍ ഇഷ എന്ന നായികയായാണ് ആലിയ ഭട്ട് വേഷമിട്ടത്. അമിതാഭ് ബച്ചന്‍, മൗനി റോയ്, നാഗാര്‍ജുന, ഷാരൂഖ് ഖാന്‍ എന്നിവര്‍ ചിത്രത്തില്‍ പ്രധാന കഥാപാത്രങ്ങളായി എത്തി.
