പെരുവെമ്പ് ഊട്ടുകുളങ്ങര ക്ഷേത്രത്തില്‍ പുലര്‍ച്ചെ അപ്രതീക്ഷിതമായെത്തിയ സന്ദര്‍ശകനെ കണ്ട് ഞെട്ടി ഭാരവാഹികളും നാട്ടുകാരും, വിവരം അറിഞ്ഞ് ആരാധകര്‍ എത്തിയിട്ടും നിരാശയായി; സോഷ്യല്‍ മീഡിയയില്‍ വൈറലായി ചിത്രങ്ങള്‍

തെന്നിന്ത്യയൊട്ടാകെ നിരവധി ആരാധകരുള്ള താരമാണ് അജിത് കുമാര്‍. ഇപ്പോഴിതാ വ്യാഴാഴ്ച പുലര്‍ച്ചെ 4.30ന് അജിത് കുമാര്‍ പെരുവെമ്പ് ഊട്ടുകുളങ്ങര ക്ഷേത്രത്തില്‍ ദര്‍ശനത്തിനെത്തിയപ്പോഴുള്ള ചിത്രങ്ങളാണ് വൈറലാകുന്നത്.

പെരുവെമ്പ് ഊട്ടുകുളങ്ങര ക്ഷേത്രത്തില്‍ വ്യാഴാഴ്ച പുലര്‍ച്ചെ അപ്രതീക്ഷിതമായെത്തിയ സന്ദര്‍ശകനെ കണ്ട ഞെട്ടലിലാണ് ഭാരവാഹികളും നാട്ടുകാരുമെല്ലാം. പുലര്‍ച്ചെ 4.30 ന് എത്തിയ അദ്ദേഹം തൊഴുത് വഴിപാടുകള്‍ നേര്‍ന്നു. തുടര്‍ന്ന് ക്ഷേത്രത്തിലെ ഭാരവാഹികളോടൊപ്പവും വിവരമറിഞ്ഞെത്തിയ അയല്‍വാസികളോടൊത്തും ഫോട്ടോയ്ക്ക് പോസ് ചെയ്തതിനുശേഷം 5 മണിയോടെ മടങ്ങി.

വിവരം സാമൂഹ മാധ്യമങ്ങളിലൂടെയറിഞ്ഞ് ജില്ലയിലെ വിവിധ ഭാഗങ്ങളില്‍ നിന്നുള്ള ആരാധകര്‍ പെരുവെമ്പിലെത്തിയെങ്കിലും അദ്ദേഹം മടങ്ങിയതിനാല്‍ നിരാശരായി തിരികെ പോകേണ്ടിവന്നു.

2015ലും അജിത് ഊട്ടുകുളങ്ങര ക്ഷേത്രം സന്ദര്‍ശിച്ചിരുന്നു. അന്ന് കുടുംബസമേതം എത്തിയ നടനെ കാണാന്‍ ആരാധകര്‍ വളഞ്ഞതോടെ ക്ഷേത്ര സന്ദര്‍ശനം അവസാനിപ്പിച്ച് അദ്ദേഹം നേരത്തെ മടങ്ങിയിരുന്നു.അജിത്തിന്റെ പിതാവ് പാലക്കാട്ടുകാരനാണ്. കുടുംബത്തിന്റെ അടിമക്കാവ് ഊട്ടുകുളങ്ങര ഭഗവതിയാണെന്ന വിശ്വാസത്തിലാണ് താരം ക്ഷേത്ര സന്ദര്‍ശനം നടത്തുന്നതെന്നാണ് ഭാരവാഹികള്‍ പറയുന്നത്. താരത്തിന്റേതായി ഏറ്റവും അവസാനം പുറത്തിറങ്ങിയ ‘വലിമൈ’ ബോക്സോഫീസില്‍ വന്‍ വിജയമാണ് സ്വന്തമാക്കിയത്.