പക്ഷേ എന്റെ ശരീരം എന്റെ മാത്രം സ്വന്തമാണ്, അത് എത്തരത്തില്‍ കാണിക്കണം എന്നുള്ളത് എന്റെ മാത്രം തീരുമാനവും; പുതിയ ചിത്രവുമായി സയനോര ഫിലിപ്പ്

മലയാളികളുടെ പ്രിയ ഗായികയാണ് സയനോര ഫിലിപ്പ്. കുട്ടിക്കാലം തൊട്ടു നിറത്തിന്റെ പേരില്‍ വിവേചനവും ഒറ്റപ്പെടലുകളും നേരിടേണ്ടി വന്നിട്ടുണ്ടെന്ന് താരം പലപ്പോഴും തുറന്നു പറഞ്ഞിട്ടുണ്ട്. ദുബായില്‍ സ്വകാര്യ പുരസ്‌കാരദാന ചടങ്ങില്‍ പങ്കെടുക്കാനെത്തിയപ്പോഴുള്ള സയനോരയുടെ ലുക്ക് ശ്രദ്ധ നേടിയിരുന്നു. ഇപ്പോഴിതാ താന്റെ വിശേഷങ്ങള്‍ പങ്കിടുകയാണ് താരം.

സ്വകാര്യ പുരസ്‌കാര ദാനചടങ്ങില്‍ ഒരു പെര്‍ഫോര്‍മര്‍ ആയിട്ടാണ് ഞാന്‍ ദുബായില്‍ എത്തിയത്. ദുബായില്‍ പോകുന്നതിന് ഒരു ദിവസം മുന്‍പാണ് ചടങ്ങില്‍ ധരിക്കേണ്ട വസ്ത്രത്തെക്കുറിച്ച് ഞാന്‍ ആലോചിച്ചത്. കോസര്‍ഗോഡുള്ള ജസീലയും അവരുടെ ഭര്‍ത്താവും ചേര്‍ന്ന് നടത്തുന്ന ജസാഷ് ഡിസൈന്‍ സ്റ്റുഡിയോയാണ് കുറേകാലമായി എനിക്ക് വസ്ത്രങ്ങള്‍ ഡിസൈന്‍ ചെയ്തു തരാറുള്ളത്.

ഈ മനോഹര വസ്ത്രം ജസാഷ് എനിക്ക് ഒരുക്കിത്തന്നു. ഹാന്‍ഡ് വര്‍ക്ക് ചെയ്ത ബ്ലൗസിനോടൊപ്പം മാലപോലെകിടക്കുന്ന ഷാളും നെറ്റിന്റെ ലഹങ്കയുമാണ് പെയ്സ്റ്റല്‍ ഗ്രീന്‍ നിരത്തിലുള്ള ഈ വസ്ത്രത്തിലുള്ളത്. വസ്ത്രധാരണത്തില്‍ എന്റെ ചിന്താഗതികള്‍ ഒരുപാടു മാറിയിട്ടുണ്ട്. ഞാന്‍ എന്താണോ അത് അങ്ങനെ തന്നെ കാണിക്കുന്ന വസ്ത്രങ്ങള്‍ ധരിക്കുന്നതാണ് എനിക്കിഷ്ടം.

വയര്‍ കുറഞ്ഞും കൈകള്‍ മെലിഞ്ഞും ഇരുന്നാലേ ഇത്തരത്തിലുള്ള വസ്ത്രങ്ങള്‍ ധരിച്ചാല്‍ കാണാന്‍ ഭംഗി ഉണ്ടാകൂ എന്നായിരുന്നു ഞാന്‍ കരുതിയിരുന്നത്. പക്ഷേ എന്റെ ശരീരം എന്റെ മാത്രം സ്വന്തമാണ്. അത് എത്തരത്തില്‍ കാണിക്കണം എന്നുള്ളത് എന്റെ മാത്രം തീരുമാനവും. സാമൂഹിക വിചാരണ ഉണ്ടാകുമെന്നു കരുതി ഇഷ്ടമുള്ള വസ്ത്രം ഞാനിപ്പോള്‍ ഒഴിവാക്കാറില്ല. എനിക്കു പ്രിയപ്പെട്ട വസ്ത്രങ്ങള്‍ ധരിക്കുമ്പോള്‍ കൂടുതല്‍ ആത്മവിശ്വാസം തോന്നും’.