ഭാര്യയുടെ കൈയ്യിൽ ഫോൺ കൊടുത്താൽ കൂടെ ഇരിക്കുക, ഭാര്യമാരെ തമ്മിൽ കമ്പനിയാക്കരുത് , ഫോൺ നമ്പർ കൈമാറാൻ ഇടയുണ്ടാക്കരുത്; സാജൻ സൂര്യയുടെ നല്ല ഭർത്താക്കന്മാർക്കുള്ള ഉപദേശം !

ടെലിവിഷൻ പ്രേക്ഷകരുടെ പ്രിയങ്കരനായ നടനാണ് സാജൻ സൂര്യ. സീരിയൽ ലോകത്ത് ഏറെ ആരാധകനുള്ള നായകനാണ് അദ്ദേഹം. അഭിനയത്തിന് പുറമെ, ഇപ്പോഴിതാ തന്റെ സരസമായ എഴുത്തിലൂടെ പ്രേക്ഷകരെ ആകർഷിക്കുകയാണ് സാജൻ. സീരിയൽ രംഗത്തെ സുഹൃത്തുക്കൾക്കൊപ്പം പണ്ട് നടത്തിയ ഒരു യാത്രയെക്കുറിച്ചാണ് സാജൻ ഇപ്പോൾ ഇൻസ്റ്റാഗ്രാമിൽ കുറിച്ചിരിക്കുന്നത്.

“Trip to Pantha. വർഷങ്ങൾക്കു മുന്നേ ‘നിർമ്മാല്യം’ എന്ന സീരിയൽ ചെയ്യുന്ന കാലം. ഡയറക്ടർ GR കൃഷ്ണനും ക്യാമറമാൻ മനോജും ഞാനും ശബരിയും ബാലാജിയും പിന്നെ കുറേ സുഹൃത്തുക്കളും അമ്പൂരിയിൽ ഒരു ആദിവാസി കുടിയിൽ ഒരു ദിവസം കൂടി.

വെണ്ണ പോലത്തെ കപ്പയും ഉണക്കമീനും കാന്താരി മുളക് ചമ്മന്തിയും ഇന്നും നാവിലുണ്ട്. വീട്ടിൽ ഭാര്യമാരോട് മനോജിന് പെണ്ണുകാണാൻ പോകുന്നു എന്ന് കള്ളം പറഞ്ഞാണ് പോയത്. യാത്രാ ചിലവ് Share ചെയ്യാൻ ശബരി Mobile-ൽ കണക്ക് സൂക്ഷിച്ചു. Heading ‘Trip to Pantha’ ‘ ( മനോജിൻറെ വീട്ടിരിക്കുന്ന സ്ഥലമാണ് പന്ത). ഒരു ദിവസം നീണ്ടു നിൽക്കുന്ന പെണ്ണുകാണൽ അതിലേ ഭാര്യമാർക്ക് സംശയം തോന്നിയിരുന്നു,”

“അടുത്ത ദിവസം തിരിച്ചെത്തി പെണ്ണുകണ്ട കഥകൾ വീട്ടിൽ രസകരമായി വിളമ്പി. മനോജും പെണ്ണും മാറിനിന്ന് സംസാരിച്ചപ്പോ ഞങ്ങൾ ഒളിഞ്ഞു നിന്ന് കേട്ട് കളിയാക്കിയതും കപ്പയും നാടൻ കോഴിക്കറിയുടെ രുചിയും എന്നു വേണ്ട ഏതൊക്കെയോ സിനിമയിലെ സീനുകൾ വച്ചലക്കി .

രാത്രി മൊത്തം കണക്കും നോക്കി ഓരോരുത്തർക്കായ തുക ,ബാക്കി കൊടുക്കാനുള്ള പൈസ എന്നിവ Type ചെയ്ത് ശബരി message ആയി എല്ലാവർക്കും അയച്ചു. ഫോട്ടോസ് കാണിക്കാൻ ഭാര്യയുടെ കൈയ്യിൽ ഫോൺ കൊടുത്ത് ഞാൻ കുളിക്കാൻ കേറി . ഫോട്ടോസ് കാണുന്നതിനിടയിൽ Trip to Pantha message Pop up ആയി മുകളിൽ തെളിഞ്ഞു. ഭാര്യമാര് തമ്മിൽ കമ്പനിയായതു കൊണ്ട് ശബരിടെയും GR-ൻറെയും വീട്ടിലെ കള്ളിയും പൊളിഞ്ഞു,” കുറിപ്പ് ഇങ്ങനെ.

ഇതിനൊപ്പം തനിക്ക് പറ്റിയ അബദ്ധം മറ്റു ഭർത്താക്കന്മാർക്ക് ഉണ്ടാകാതിരിക്കാൻ മൂന്നു ഉപദേശങ്ങളും താരം കുറിപ്പിൽ കൂട്ടിച്ചേർത്തിട്ടുണ്ട്.

“പാഠം 1 – ഭാര്യയുടെ കൈയ്യിൽ ഫോൺ കൊടുത്താൽ കൂടെ ഇരിക്കുക.പാഠം 2 – ഭാര്യമാരെ തമ്മിൽ കമ്പനിയാക്കരുത് , ഫോൺ നമ്പർ കൈമാറാൻ ഇടയുണ്ടാക്കരുത്. പാഠം 3- Pop up off ആയി ഇടുക.സ്വയരക്ഷ സിന്ദാബാദ്,” എന്നവസാനിക്കുന്നു സാജന്റെ കുറിപ്പ്.

about sajan surya