യുപിഎസ്‌സി പരീക്ഷയ്ക്ക് തയ്യാറെടുക്കുന്ന ജൂനിയര്‍ ആര്‍ട്ടിസ്റ്റിന് സഹായവുമായി നടന്‍ ജയ്

യുപിഎസ്‌സി പരീക്ഷയ്ക്ക് തയ്യാറെടുക്കുന്ന ജൂനിയര്‍ ആര്‍ട്ടിസ്റ്റിന് സഹായവുമായി തമിഴ്‌നടന്‍ ജയ്. മനീഷ പ്രിയദര്‍ശിനി എന്ന ജൂനിയര്‍ ആര്‍ട്ടിസ്റ്റിനാണ് ജയ് സഹായഹസ്തവുമായി എത്തിയിരിക്കുന്നത്. കളവാണി എന്ന ചിത്രത്തില്‍ വിമല്‍ അവതരിപ്പിച്ച നായകകഥാപാത്രത്തിന്റെ സഹോദരിയായി എത്തിയത് മനീഷയായിരുന്നു.

അഭിനയത്തിനിടെയാണ് മനീഷ് കോളേജ് വിദ്യാഭ്യാസം പൂര്‍ത്തിയാക്കിയത്. നിലവില്‍ അവസാനവര്‍ഷ എല്‍.എല്‍.ബി വിദ്യാര്‍ത്ഥിനിയാണ് മനീഷ. എന്നെങ്കിലുമൊരിക്കല്‍ തന്റെ മകള്‍ ഐ.എ.എസുകാരിയാവുമെന്ന പ്രതീക്ഷയിലാണ് മനീഷയുടെ അമ്മ.

പഠനത്തിന് കയ്യില്‍ പണമില്ലാതിരുന്ന സാഹചര്യത്തിലാണ് ഇവര്‍ ജയ്‌യെ സമീപിക്കുന്നത്. യു.പി.എസ്.സി പഠനത്തിനാവശ്യമായ എല്ലാ പുസ്തകങ്ങളും വാങ്ങി നല്‍കിയതിന് പുറമേ ഭാവിയില്‍ എല്ലാ സഹായവും മനീഷയ്ക്ക് ജയ് വാഗ്ദാനം ചെയ്തിട്ടുണ്ട്.

ബദ്രി സംവിധാനം ചെയ്ത പട്ടാമ്പൂച്ചിയാണ് ജയ് അഭിനയിച്ച് ഈയിടെ തിയേറ്ററുകളിലെത്തിയ ചിത്രം. സുന്ദര്‍ സി, ഹണി റോസ് തുടങ്ങിയവരാണ് മറ്റ് അഭിനേതാക്കള്‍.