ജയിലർ 2 വിലും ഫഹദ് ഫാസിൽ; പുതിയ വിവരം ഇങ്ങനെ

തെന്നിന്ത്യൻ പ്രേക്ഷകർ ഇരു കയ്യും നീട്ടി സ്വീകരിച്ച ചിത്രമാണ് ജയിലർ. ചിത്രത്തിന്റെ രണ്ടാം ഭാ​ഗത്തിനായുള്ള കാത്തിരിപ്പിലാണ് പ്രേക്ഷകർ. ഇപ്പോഴിതാ ചിത്രത്തിൽ ഫഹദ് ഫാസിലും ഉണ്ടാകുമെന്നാണ് പുറത്ത് വരുന്ന പുതിയ റിപ്പോർട്ട്. പൊലീസ് ഉദ്യോ​ഗസ്ഥനായാണ് ചിത്രത്തിൽ ഫഹദ് എത്തുകയെന്നാണ് റിപ്പോർട്ടുകൾ. അടുത്ത ഷെഡ്യൂൾ മുതൽ ഫഹദ് ഫാസിൽ ചിത്രത്തിൽ ജോയിൻ ചെയ്യും.

കഴിഞ്ഞ വർഷം പുറത്തിറങ്ങിയ വേട്ടയ്യൻ എന്ന ചിത്രത്തിലും രജനികാന്തിനൊപ്പം ഫ​ഹദ് എത്തിയിരുന്നു. നെൽസൺ ദിലീപ്കുമാർ ആണ് ജയിലർ 2 വിന്റെ സംവിധാനം. കഴിഞ്ഞ കുറച്ചു ദിവസങ്ങളായി ജയിലർ 2വിന്റെ ഷൂട്ടിങ് അട്ടപ്പാടിയിൽ നടക്കുകയാണ്. ഇവിടുത്തെ ഷൂട്ടിങ് പൂർത്തിയാക്കി രജനി അടക്കമുള്ളവർ ഉടൻ തന്നെ തിരിക്കുമെന്നാണ് വിവരം.

സിനിമയുടെ ബാക്കി ഷെഡ്യൂളുകൾ ചെന്നൈയിലാണ് ചിത്രീകരിക്കുക. അട്ടപ്പാടി ഗോഞ്ചിയൂരിലും പരിസര പ്രദേശങ്ങളിലുമായിരുന്നു ജയിലർ 2 വിന്റെ ചിത്രീകരണം. ജയിലർ 2 സിനിമയുടെ പ്രധാന ഭാഗങ്ങളാണ് ഗോഞ്ചിയൂരിൽ ചിത്രീകരിച്ചത്. കോടികൾ ചെലവഴിച്ച് പടു കൂറ്റൻ സെറ്റുകളാണ് ഇവിടെ നിർമിച്ചതും. വരും ദിവസങ്ങളിൽ സെറ്റ് പൊളിച്ചു നീക്കും. സൺ പിക്ചേഴ്സ് ആണ് നിർമാണം.