എല്‍ഡിഎഫ് സ്ഥാനാര്‍ത്ഥിക്കായി വോട്ട് അഭ്യര്‍ത്ഥിച്ച് മഞ്ഞുമ്മല്‍ ബോയിസിലെ കുട്ടേട്ടന്‍

ചിദംബരത്തിന്റെ സംവിധാനത്തില്‍ പുറത്തെത്തി രാജ്യമൊട്ടാകെ ചര്‍ച്ചയായ ചിത്രമാണ് മഞ്ഞുമ്മല്‍ ബോയ്‌സ്. ഇപ്പോഴിതാ ഈ കഥയിലെ യഥാര്‍ത്ഥ ഹീറോ കുട്ടേട്ടന്‍ എന്ന സിജോ ഡേവിസ് എറണാകുളം മണ്ഡലത്തിലെ എല്‍ഡിഎഫ് സ്ഥാനാര്‍ത്ഥിക്കായി വോട്ട് അഭ്യര്‍ത്ഥിച്ച് രംഗത്തെത്തിയിരിക്കുകയാണ്.

മഞ്ഞുമ്മലില്‍ വോട്ട് അഭ്യര്‍ത്ഥിക്കാനെത്തിയ എല്‍ഡിഎഫ് സ്ഥാനാര്‍ത്ഥി കെ ജെ ഷൈന്‍ ടീച്ചര്‍ക്കൊപ്പം തുറന്ന ജീപ്പില്‍ സിജോയുമുണ്ടായിരുന്നു. ഷൈന്‍ ടീച്ചര്‍ തന്നെയാണ് ഈ ചിത്രങ്ങള്‍ സോഷ്യല്‍ മീഡിയയില്‍ പങ്കുവെച്ചത്. റിയല്‍ മഞ്ഞുമ്മല്‍ ബോയ്‌സിലെ റിയല്‍ ഹീറോ സിജു ഡേവിസിനൊപ്പം എന്ന് കുറിച്ച് കൊണ്ട് ഷൈന്‍ ടീച്ചര്‍ ചിത്രങ്ങള്‍ പങ്കുവെച്ചത്.

മലയാള സിനിമയുടെ തലവര മാറ്റിയ ചിത്രമാണ് മഞ്ഞുമ്മല്‍ ബോയ്‌സ്. 200 കോടി ക്ലബ് എന്ന സ്വപ്ന നേട്ടം സ്വന്തമാക്കിയ സിനിമ സംവിധാനം ചെയ്തത് ചിദംബരം ആയിരുന്നു. കേരളത്തിന് പുറമെ ഇതര ഭാഷകളിലും കസറിയ ചിത്രത്തിന് തമിഴ്‌നാട്ടില്‍ ലഭിച്ച് സ്വീകാര്യത വളരെ വലുതാണ്. ഒരു കൂട്ടം സുഹൃത്തുക്കളുടെ യഥാര്‍ത്ഥ കഥയാണ് ഈ സര്‍വൈവല്‍ ചിത്രം പറഞ്ഞത്.

2006ല്‍ കൊടെക്കനാലിലെ ഗുണകേവില്‍ അകപ്പെട്ടുപോയ സുഹൃത്തിനെ രക്ഷിച്ച എറണാകുളം മഞ്ഞുമ്മലില്‍ നിന്നും പോയ യുവാക്കളുടെ യഥാര്‍ത്ഥ അനുഭവം അടിസ്ഥാനമാക്കി ഒരുക്കിയ സിനിമയാണ് ‘മഞ്ഞുമ്മല്‍ ബോയ്‌സ്’.

സിനിമയ്‌ക്കൊപ്പം മഞ്ഞുമ്മലിലെ യഥാര്‍ത്ഥ ഹീറോകളും അവരുടെ സൗഹൃദവുമെല്ലാം ചര്‍ച്ച ചെയ്യപ്പെട്ടു. ഗുണകേവില്‍ അകപ്പെട്ട സുഹൃത്തിനെ രക്ഷിക്കാനായി സിജോ ആയിരുന്നു ഇറങ്ങിയത്. സിനിമയില്‍ സിജോ ആയി എത്തിയത് സൗബിന്‍ ഷാഹിറായിരുന്നു.