ജയിലറിന്റെ എച്ച്ഡി പ്രിന്റ് ഓണ്‍ലൈനില്‍ ചോര്‍ന്നു

ര ജനീകാന്ത് ചിത്രം ജയിലറിന്റെ എച്ച്ഡി പ്രിന്റ് ഓണ്‍ലൈനില്‍ ചോര്‍ന്നു. ഒടിടി റിലീസിനൊരുങ്ങുകയാണ് ചിത്രം. അതിനിടെയാണ് ചിത്രം ചോർന്നത്. പ്രിന്റ് ചോര്‍ന്നത് തിയേറ്റര്‍ ഉടമകള്‍ക്കും തിരിച്ചടിയായിരിക്കുകയാണ്.

ആഗോളതലത്തില്‍ 500 കോടിയും കടന്ന് കുതിക്കുന്നതിനിടെയാണ് ചിത്രത്തിന്റെ പ്രിന്റ് ചോര്‍ച്ച. പ്രിന്റ് ചോര്‍ന്നതില്‍ ആരാധകര്‍ അസ്വസ്തരാണ്. സംഭവത്തില്‍ എത്രയും വേഗം നടപടിയെടുക്കണമെന്നാണ് ആരാധകരുടെ ആവശ്യം.

നെറ്റ്ഫ്ളിക്സിലൂടെയും സണ്‍ നെസ്റ്റിലൂടെയായിരിക്കും സിനിമ ഒടിടിയില്‍ എത്തുമെന്നായിരുന്നു പുറത്തുവരുന്ന റിപ്പോര്‍ട്ടുകള്‍. 100 കോടി രൂപയ്ക്കാണ് നെറ്റ്ഫ്ലിക്സ് ജയിലറിന്റെ ഡിജിറ്റല്‍ സ്ട്രീമിങ് അവകാശം സ്വന്തമാക്കിയത്. ഓഗസ്റ്റ് 10ന് റിലീസ് ചെയ്ത ചിത്രം പല തിയേറ്ററുകളില്‍ ഹൗസ് ഫുള്ളായി പ്രദര്‍ശനം തുടരുന്നതിനിടെയിലാണ് ചിത്രത്തിന്റെ എച്ച്ഡി പ്രിന്റ് ഓണ്‍ലൈനില്‍ ചോര്‍ന്നിരിക്കുന്നത്.

നെല്‍സണ്‍ സംവിധാനം ചെയ്ത ചിത്രം ഈ വര്‍ഷത്തെ ഏറ്റവും വലിയ ഹിറ്റുകളില്‍ ഒന്നായി മാറിക്കഴിഞ്ഞു. രണ്ടാഴ്ചത്തെ കണക്കുകള്‍ പ്രകാരം തിയേറ്ററുകളില്‍നിന്ന് 550 കോടിയാണ് ചിത്രം നേടിയത്. ആദ്യ ആഴ്ചയില്‍ ഒരു സിനിമയ്ക്ക് ലഭിക്കുന്ന ഏറ്റവും വലിയ കളക്ഷന്‍ എന്ന റെക്കോര്‍ഡും രജനിയുടെ ജയിലര്‍ സ്വന്തമാക്കിയിരുന്നു.