ഏജന്റിന്റെ പരാജയത്തിന് പിന്നാലെ ആ കടുത്ത തീരുമാനവുമായി അഖില്‍ അക്കിനേനി

വമ്പന്‍ ഹൈപ്പോടെ തിയേറ്ററുകളിലെത്തി തകര്‍ന്നുപോയ ചിത്രമാണ് ‘ഏജന്റ്’. എഴുപത് കോടി ബജറ്റില്‍ ഒരുങ്ങിയ ചിത്രത്തിന് ഇതുവരെ ലഭിച്ചത് ആകെ 10 കോടി രൂപയാണ്. തെലുങ്കില്‍ ആദ്യ ദിനം തന്നെ നിരൂപകരും പ്രേക്ഷകരും ഈ സിനിമയെ തള്ളിപ്പറയുകയായിരുന്നു.

സിനിമയുടെ നിര്‍മാതാക്കളിലൊരാളായ അനില്‍ സുങ്കരയുടെ വെളിപ്പെടുത്തലും ചിത്രത്തെ പ്രതികൂലമായി ബാധിച്ചു. കൃത്യമായൊരു തിരക്കഥ ഇല്ലാതെയാണ് സിനിമ ഒരുക്കിയതെന്നും ശ്രമം പാളിപ്പോയെന്നുമുള്ള അനിലിന്റെ ട്വീറ്റ് സിനിമയുടെ മലയാളം, തമിഴ് പതിപ്പുകളെയും ബാധിച്ചു.

ഇപ്പോഴിതാ, ഏജന്റിന്റെ പരാജയത്തിന് പിന്നാലെ അഖില്‍ അക്കിനേനി ഒരു തീരുമാനമെടുത്തിരിക്കുകയാണ്. അടുത്ത സിനിമയ്ക്ക് മുമ്പായി ഒരു നീണ്ട ഇടവേള എടുക്കാന്‍ ഒരുങ്ങുകയാണ് അദ്ദേഹം.

തുടര്‍ച്ചയായ പരാജയങ്ങള്‍ക്ക് ശേഷവും സംവിധായകരിലും നിര്‍മ്മാതാക്കളിലും അഖിലിന് നല്ല ഡിമാന്‍ഡുണ്ട്. എന്നാല്‍ ഇപ്പോള്‍ അദ്ദേഹം കുറച്ച് കാലത്തേക്ക് ഒരു സിനിമയ്ക്കും കമ്മിറ്റ്‌മെന്റ് നല്‍കാന്‍ ആഗ്രഹിക്കുന്നില്ല.

അഖിലിന്റെ തീരുമാനത്തെ അദ്ദേഹത്തിന്റെ ചില ആരാധകര്‍ അഭിനന്ദിക്കുമ്പോള്‍ ചിലര്‍ ഇത് എടുക്കുന്നത് നല്ല തീരുമാനമല്ലെന്നും ഇപ്പോള്‍ സിനിമകള്‍ക്ക് ഇടവേള നല്‍കുന്നത് അദ്ദേഹത്തിന്റെ കരിയറിനെ ബാധിക്കുമെന്നും പറയുന്നു. എന്നാല്‍ ചിലപ്പോള്‍ തകര്‍ച്ചയില്‍ കുറച്ച് കാലത്തേക്ക് വിശ്രമിക്കുന്നത് ജോലിയിലേക്ക് നന്നായി മടങ്ങിയെത്താന്‍ സഹായിക്കുമെന്നും ചിലര്‍ പറയുന്നു.