ബോളിവുഡ് താരം ഫര്‍ഹാന്‍ അക്തറും ഇന്ത്യന്‍-ഓസ്ട്രേലിയന്‍ ഗായിക ഷിബാനി ദണ്ഡേക്കറും വിവാഹിതരായി

ബോളിവുഡ് താരം ഫര്‍ഹാന്‍ അക്തറും ഇന്ത്യന്‍-ഓസ്ട്രേലിയന്‍ ഗായിക ഷിബാനി ദണ്ഡേക്കറും വിവാഹിതരായി. ഫര്‍ഹാന്റെ പിതാവ് ജാവേദ് അക്തറിന്റെ ഉടമസ്ഥതയിലുള്ള ഖണ്ടാലയിലെ ഫാം ഹൗസില്‍ വച്ചാണ് വിവാഹചടങ്ങുകള്‍ നടന്നത്. അടുത്ത സുഹൃത്തുക്കളും കുടുംബാംഗങ്ങളും മാത്രമാണ് ചടങ്ങിൽ പങ്കെടുത്തത്. ബോളിവുഡ് താരങ്ങളായ ഹൃത്വിക് റോഷന്‍, അമൃത അറോറ, റിയാ ചക്രബര്‍ത്തി തുടങ്ങിയവര്‍ ചടങ്ങില്‍ സന്നിഹിതരായിരുന്നു.

ചുവന്ന നിറത്തിലുള്ള ഗൗണും ശിരോവസ്ത്രവുമാണ് ഷബാനിയുടെ വേഷം. കറുത്ത നിറത്തിലുള്ള സ്യൂട്ട് ധരിച്ചാണ് ഫര്‍ഹാനെത്തിയത്.

കഴിഞ്ഞ ദിവസമായിരുന്നു വിവാഹത്തിന് മുന്നോടിയായുള്ള ഹല്‍ദി ചടങ്ങുകള്‍. ഹല്‍ദിയുടെ ചിത്രങ്ങള്‍ സമൂഹമാധ്യമങ്ങളില്‍ പ്രചരിച്ചിരുന്നു.

വിവാഹ മോചിതനും രണ്ട് കുട്ടികളുടെ പിതാവുമാണ് ഫര്‍ഹാന്‍ അക്തര്‍. അധുന ബബാനി അക്തറുമായി 2017 ലാണ് ഫര്‍ഹാന്‍ വിവാഹ മോചിതനാകുന്നത്. അതിന് ശേഷമാണ് ഫര്‍ഹാന്‍ ഷിബാനിയുമായി പ്രണയത്തിലാകുന്നത്.