‘മലിനീകരണം മൂലം മനുഷ്യലിംഗം ചുരുങ്ങുന്നു’വെന്ന വാര്‍ത്തയോട് പ്രതികരിച്ച് നടി ദിയ മിര്‍സ ; വൈറലായി വാക്കുകള്‍

സ്‌ക്രീനില്‍ മാത്രമല്ല, കാലാവസ്ഥ വ്യതിയാനത്തെക്കുറിച്ചുള്ള ചര്‍ച്ചകളിലും സജീവ സാന്നിധ്യമാണ് നടി ദിയ മിര്‍സ. കാര്‍ബണ്‍ ഉദ്വമനം കുറയ്ക്കേണ്ടതിന്റെ ആവശ്യകത, പ്രകൃതിവിഭവങ്ങള്‍ ശ്രദ്ധാപൂര്‍വം ഉപയോഗിക്കേണ്ടതിന്റെയും പരിസ്ഥിതി സംരക്ഷിക്കേണ്ടതിന്റെയും പ്രാധാന്യം തുടങ്ങി വിവിധ കാര്യങ്ങളില്‍ സമൂഹമാധ്യമങ്ങളിലൂടെയും അല്ലാതെയും ദിയ തന്റെ അഭിപ്രായം തുറന്നു പറയാറുണ്ട്.

പ്ലാസ്റ്റിക് രഹിതമായ ജീവിതവും പ്രകൃതി സംരക്ഷണവും മുന്‍നിര്‍ത്തി പരിസ്ഥിതി സൗഹാര്‍ദ്ദപരമായ ജീവിതമാണ് താന്‍ നയിക്കുന്നതെന്നും താരം പറഞ്ഞിരുന്നു. ഇപ്പോള്‍ മലിനീകരണവുമായി ബന്ധപ്പെട്ട് താരം നടത്തിയ ട്വീറ്റും ചര്‍ച്ചയാവുകയാണ്.

‘മലിനീകരണം മൂലം മനുഷ്യലിംഗം ചുരുങ്ങുന്നു’വെന്ന സ്‌കൈ ന്യൂസിന്റെ വാര്‍ത്തയോടായിരുന്നു ദിയയുടെ പ്രതികരണം. ‘ഇനിയെങ്കിലും കാലാവസ്ഥ വ്യതിയാനവും വായു മലിനീകരണവും ലോകം ഗൗരവമായി കാണുമായിരിക്കുമല്ലോ? എന്നായിരുന്നു ദിയയുടെ മറുപടി. താരത്തിന്റെ മറുപടി വളരെ പെട്ടെന്ന് തന്നെ സോഷ്യല്‍ മീഡിയയില്‍ വൈറലുമായി.