ജാവേത് അക്തര്‍ നല്‍കിയ മാനനഷ്ട കേസില്‍ കങ്കണയ്ക്ക് ജാമ്യം അനുവദിച്ചു

എഴുത്തുകാരനും ഗാനരചയിതാവുമായ ജാവേത് അക്തര്‍ ബോളിവുഡ് നടി കങ്കണ റണാവത്തിന് എതിരെ നല്‍കിയ മാനനഷ്ട കേസില്‍ കങ്കണയ്ക്ക് ജാമ്യം. മുംബൈ കോടതിയാണ് ജാമ്യം അനുവദിച്ചത്. കോടതിയില്‍ നേരിട്ട് ഹാജരായി തനിക്കെതിരായ വാറന്റ് റദ്ദാക്കണമെന്ന് കങ്കണ ആവശ്യപ്പെട്ടിരുന്നു. ഇത് കൂടാതെ ജാമ്യാപേക്ഷയും സമര്‍പ്പിച്ചിരുന്നു.

2016ല്‍ അക്തറുമായി നടത്തിയ കൂടിക്കാഴ്ചയെ കുറിച്ച് കങ്കണ ഒരു അഭിമുഖത്തില്‍ നടത്തിയ പരാമര്‍ശങ്ങള്‍ക്കെതിരായാണ് ജാവേദ് അക്തര്‍ മാനനഷ്ട കേസ് നല്‍കിയത്. അനാവശ്യമായി തന്റെ പേര് കങ്കണ പല സംഭവങ്ങളുമായി ബന്ധപ്പെട്ട് പറഞ്ഞുവെന്നാണ് ജാവേദ് അക്തറിന്റെ പ്രധാന ആരോപണം.

നേരത്തെ തനിക്കെതിരായ കേസ് മുംബൈയില്‍ നിന്ന് ഷിംലയിലേക്ക് മാറ്റണമെന്ന് ആവശ്യപ്പെട്ട് കങ്കണയുടെ സഹോദരി രംഗോലി സുപ്രീംകോടതിയെ സമീപിച്ചിരുന്നു. മുംബൈയില്‍ കേസിന്റെ വിചാരണ നടന്നാല്‍ ശിവസേന വ്യക്തിവൈരാഗ്യം തീര്‍ക്കുമെന്നായിരുന്നു കങ്കണയുടെ പ്രസ്താവന.

എപ്പോഴും എന്തെങ്കിലും വിവാദപരാമര്‍ശങ്ങള്‍ ഉന്നയിച്ച് വാര്‍ത്തകളില്‍ ഇടം നേടാറുള്ള താരമാണ് കങ്കണ. ഡല്‍ഹിയില്‍ സമരം ചെയ്യുന്ന കര്‍ഷകര്‍ക്കെതിരെയും നിരവധി തവണയാണ് കങ്കണ വിവാദപരമായ വിമര്‍ശനങ്ങള്‍ ഉന്നയിച്ചത്. കങ്കണയ്‌ക്കെതിരെ വിവിധ താരങ്ങളും മറ്റും സോഷ്യല്‍ മീഡിയയില്‍ അടക്കം പ്രതികരണങ്ങള്‍ നടത്തിയിരുന്നു.