‘എന്ത് ഊള പടമാണ് മിസ്റ്റര്‍ ഇത്, ഇതുപോലെ ഒരു ദുരന്തം പടം ഇനി വരാനില്ല’; കമന്റിട്ടിയാള്‍ക്ക്‌ മറുപടിയുമായി അജു വര്‍ഗീസ്

റിലീസ് ആകുന്നതിന് മുമ്പേ നെഗറ്റീവ് പബ്ലിസിറ്റി നല്‍കി സിനിമ ഡീഗ്രേഡ് ചെയ്യുന്നവര്‍ക്കെതിരെ നടന്‍ അജു വര്‍ഗീസ്. ‘സാജന്‍ ബേക്കറി സിന്‍സ് 1962’ എന്ന ചിത്രത്തിന്റെ റിലീസിനെ കുറിച്ചുള്ള പോസ്റ്റിന് താഴെ എത്തിയ കമന്റിന്റെ സ്‌ക്രീന്‍ഷോട്ട് ആണ് അജു വര്‍ഗീസ് പങ്കുവെച്ചിരിക്കുന്നത്.

”എന്ത് ഊള പടമാണ് മിസ്റ്റര്‍ ഇത്. ഇതുപോലെ ഒരു ദുരന്തം പടം ഇനി വരാനില്ല. ഞാന്‍ ഈ പടം കാണാന്‍ പോയി എന്റെ പൈസ പോയി അതുകൊണ്ട് നിങ്ങള്‍ തന്നെ ആ പൈസ എനിക്ക് തിരിച്ചു തരണം” എന്നായിരുന്നു ഒരു കമന്റ്. ഈ കമന്റ് ആണ് അജു പങ്കുവെച്ചിരിക്കുന്നത്.

”വളരെ മികച്ച ഒരു ഇത്.. ഇറങ്ങുന്നതിനു മുന്നേ തന്നെ” എന്നാണ് അജു സ്‌ക്രീന്‍ ഷോട്ട് പങ്കുവെച്ച് കുറിച്ചത്. ചിത്രം ഈ വെള്ളിയാഴ്ചയാണ് റിലീസ് ചെയ്യുന്നത്. അരുണ്‍ ചന്ദു സംവിധാനം ചെയ്യുന്ന ചിത്രത്തില്‍ ചിത്രത്തില്‍ അജു വര്‍ഗീസും നടി ലെനയും സഹോദരങ്ങളായി അഭിനയിക്കുന്നു.

ബോബന്‍, ബെറ്റ്‌സി എന്ന സഹോദരങ്ങള്‍ നടത്തുന്ന ബേക്കറിയെ ചുറ്റിപ്പറ്റിയാണ് കഥ മുന്നോട്ടു പോകുന്നത്. അജു വര്‍ഗീസ് ഡബിള്‍ റോളിലെത്തുന്ന ചിത്രം കൂടിയാണിത്. ആദ്യമായാണ് അജു ഡബിള്‍ റോളിലെത്തുന്നത്.