ഇന്ത്യയുടെ ആദ്യത്തെ മുഖ്യ തെരഞ്ഞെടുപ്പ് കമ്മീഷണര്‍ സുകുമാര്‍ സെന്നിന്റെ ജീവിതം സിനിമയാകുന്നു

ഇന്ത്യയുടെ ആദ്യത്തെ മുഖ്യ തെരഞ്ഞെടുപ്പ് കമ്മീഷണര്‍ സുകുമാര്‍ സെന്നിന്റെ ജീവിതം ആസ്പദമാക്കി സിനിമ വരുന്നു. റോയ് കപൂര്‍ ഫിലിംസിന്റെ ബാനറില്‍ സിദ്ധാര്‍ഥ് റോയ് കപൂറും ട്രിക്കിടെയ്ന്‍മെന്റ് മീഡിയയുടെ ബാനറില്‍ രോമാഞ്ചക് അറോറയും ചേര്‍ന്നാണ് സുകുമാര്‍ സെന്നിന്റെ ബയോപിക് നിര്‍മ്മിക്കുന്നത്. ലോക്‌സഭ തെരഞ്ഞെടുപ്പ് റിസല്‍റ്റ് പുറത്തുവരാന്‍ ഒരു ദിവസം ബാക്കി നില്‍ക്കെയാണ് ചിത്രത്തിന്റെ പ്രഖ്യാപനം പുറത്തുവന്നിരിക്കുന്നത്.

സുകുമാര്‍ സെന്നിന്റെ നേതൃത്വത്തിലാണ് സ്വതന്ത്ര ഇന്ത്യയിലെ ആദ്യ തെരഞ്ഞെടുപ്പ് നടന്നത്. 195152 കാലഘട്ടങ്ങളിലായിരുന്നു ഇന്ത്യയിലെ ആദ്യത്തെ ലോക്‌സഭ തെരഞ്ഞെടുപ്പ് നടക്കുന്നത്. ലണ്ടന്‍ സര്‍വകലാശാലയില്‍ നിന്നും ഗണിത ശാസ്ത്രത്തില്‍ സ്വര്‍ണമെഡലോടു കൂടി പാസായ സുകുമാര്‍ സെന്‍, അതിന് ശേഷമാണ് സിവില്‍ സര്‍വീസിലേക്കെത്തുന്നത്.

‘ഇന്ത്യയുടെ ജനാധിപത്യ ചരിത്രം രൂപപ്പെടുത്തുന്നതില്‍ നിര്‍ണായക പങ്ക് വഹിച്ച സുകുമാര്‍ സെന്നിന്റെ ജീവിതം വെള്ളിത്തിരയിലെത്തിക്കാന്‍ കഴിഞ്ഞതില്‍ ഞങ്ങള്‍ക്ക് അഭിമാനമുണ്ട്. നിരക്ഷരതയ്‌ക്കെതിരെ പോരാടുന്നതിന്, ആള്‍മാറാട്ടം ഒഴിവാക്കാന്‍ വോട്ടര്‍മാരുടെ നഖങ്ങളില്‍ മായാത്ത മഷി എന്ന ആശയം കൊണ്ടുവരുന്നതുള്‍പ്പെടെ നമ്മുടെ ജനാധിപത്യ പ്രക്രിയയ്ക്ക് വാസ്തുവിദ്യ നല്‍കുന്നതില്‍ അദ്ദേഹത്തിന്റെ നിരവധി നൂതനാശയങ്ങള്‍ ഇന്നും നിലവിലുണ്ട്.

ഇന്ത്യയിലും ലോകമെമ്പാടുമുള്ള പ്രേക്ഷകരിലേക്കും ആദ്യ തെരഞ്ഞെടുപ്പിന്റെ ആവേശകരമായ കഥയും അതിന് പിന്നിലെ അത്ഭുതകരമായ മനുഷ്യനേയും എത്തിക്കാന്‍ ഞങ്ങള്‍ ആഗ്രഹിക്കുന്നു’ നിര്‍മ്മാതാവ് സിദ്ധാര്‍ഥ് റോയ് കപൂര്‍ പറഞ്ഞു. ഒരു രാഷ്ട്രമെന്ന നിലയില്‍ ഇന്ത്യയുടെ ഏറ്റവും വലിയ വിജയങ്ങളിലൊന്ന് വിജയകരമായ ജനാധിപത്യമാണ്. എല്ലാ ജനാധിപത്യത്തിന്റെയും അടിസ്ഥാനം സ്വതന്ത്രവും നീതിയുക്തവുമായ തെരഞ്ഞെടുപ്പുകളാണ്, ഈ ഊര്‍ജ്ജസ്വലമായ തെരഞ്ഞെടുപ്പ് പ്രക്രിയയ്ക്ക് അടിത്തറ പാകിയതിന്റെ ക്രെഡിറ്റ് എന്റെ മുത്തച്ഛനും സ്വതന്ത്ര ഇന്ത്യയിലെ ആദ്യത്തെ മുഖ്യ തെരഞ്ഞെടുപ്പ് കമ്മീഷണറുമായ സുകുമാര്‍ സെന്നിനാണ്.

മഹത്തായ നമ്മുടെ രാജ്യത്തെ വാഴ്ത്തപ്പെടാത്ത ഒരു നായകന്റെ കഥ അവതരിപ്പിക്കാന്‍ നിര്‍മ്മാതാക്കള്‍ക്ക് എല്ലാ വിജയങ്ങളും നേരുന്നു’ സുകുമാര്‍ സെന്നിന്റെ കൊച്ചുമകന്‍ സഞ്ജീവ് സെന്‍ പറഞ്ഞു. ‘ശ്രദ്ധേയനായ ഒരു വ്യക്തിയെക്കുറിച്ചും അദ്ദേഹത്തിന്റെ നേട്ടങ്ങളെക്കുറിച്ചും നമ്മുടെ രാജ്യത്തെ ജനങ്ങളെ ബോധവാന്മാരാക്കാനുള്ള പ്രശംസനീയമായ ശ്രമമാണിത്’ എന്ന് സുകുമാര്‍ സെന്നിന്റെ രണ്ടാമത്തെ കൊച്ചുമകന്‍ ദേബ്ദത്ത സെന്‍ പറഞ്ഞു.