ഞാൻ ഏറെ സന്തോഷത്തോടെ, അഭിമാനത്തോടെ നോക്കിക്കാണുന്ന വളർച്ചയാണ് ബേസിൽ ജോസഫിന്റേത് ; ടൊവിനോ തോമസ്
മലയാള സിനിമയുടെ അഭിമാനമായി ബേസില്‍ ജോസഫ്. ഏഷ്യന്‍ അക്കാദമി അവാര്‍ഡ്‌സില്‍ മികച്ച സംവിധായകനുള്ള പുരസ്കാരം സ്വന്തമാക്കിയ ബേസില്‍ ജോസഫിനെ സിനിമാലോകവും പ്രേക്ഷകരുമെല്ലാം അഭിനന്ദിച്ചിരുന്നു. നീ ഞങ്ങളുടെ അഭിമാനമാണെന്നായിരുന്നു മോഹന്‍ലാല്‍ പറഞ്ഞത്. 16 രാജ്യങ്ങളിലുള്ളവരായിരുന്നു മികച്ച സംവിധായകനാവാന്‍ മത്സരിച്ചത്. മലയാളത്തെ പ്രതിനിധീകരിച്ച് ഈ വേദിയില്‍ നില്‍ക്കാന്‍ കഴിഞ്ഞതില്‍ ഒരുപാട് അഭിമാനമെന്നായിരുന്നു ബേസില്‍ പ്രതികരിച്ചത്. എന്നെ വിശ്വസിച്ച് സിനിമയുടെ ഭാഗമായ എല്ലാവരോടും നന്ദി പറയുന്നുവെന്നും അന്ന് ബേസില്‍ കുറിച്ചിരുന്നു. ആത്മാര്‍ത്ഥ സുഹൃത്തായ ബേസിലിനെ അഭിനന്ദിച്ചെത്തിയിരിക്കുകയാണ് ടൊവിനോ.
ഒരു സുഹൃത്തെന്ന നിലയിലും അവന്റെ സംവിധാനത്തിൽ അഭനയിച്ചിട്ടുള്ള ഒരു നടനെന്ന നിലയിലും, ഒരുമിച്ച് പല സിനിമകളിലും അഭിനയിച്ചിട്ടുള്ള നടനെന്ന നിലയിലും ഞാൻ ഏറെ സന്തോഷത്തോടെ, അഭിമാനത്തോടെ നോക്കിക്കാണുന്ന വളർച്ചയാണ് ബേസിൽ ജോസഫിന്റേത്. ഒരുപക്ഷെ ഈ അവാർഡ് വാങ്ങിക്കഴിഞ്ഞ് അവൻ അതേ വേദിയിലിരുന്ന് ഏറ്റവും ആദ്യം ഫോണിൽ വിളിച്ചതും എന്നെയായിരിക്കും. മിന്നൽ മുരളിക്ക് വേണ്ടി ബേസിൽ ഈ അംഗീകാരം ഏറ്റുവാങ്ങുമ്പോൾ ഞങ്ങൾ ഒരുമിച്ച് ഒരേ സിനിമയിൽ അഭിനയിച്ചു കൊണ്ടിരിക്കുകയാണ് എന്നുള്ളത് മറ്റൊരു നിമിത്തമായിരിക്കും. ഇനിയും കീഴടക്കാൻ ഉയരങ്ങളേറെയാണ്. വളരുക, വളരുക, മാനം മുട്ടെ വളരുക.
താങ്ക് യൂ അളിയാ എന്റെ കണ്ണ് നിറഞ്ഞു. സെഡ് ആയി എന്നായിരുന്നു ബേസിൽ കുറിച്ചത്. അവാർഡ് മേടിച്ചിട്ട് വിളിച്ചപ്പൊ നിറഞ്ഞ അത്രേം നിറഞ്ഞോ ? ഞാനേ കണ്ടോള്ളൂ. ഞാൻ മാത്രേ കണ്ടോള്ളൂയെന്നായിരുന്നു ടൊവിനോ ബേസിലിനോട് പറഞ്ഞത്.ടൊവിനോയുമായുള്ള സൗഹൃദത്തെക്കുറിച്ച് ബേസില്‍ അഭിമുഖങ്ങളിലെല്ലാം പറയാറുണ്ട്. ഗോദയുടെ കഥ പറയാനായി പോയപ്പോഴാണ് ആദ്യമായി ടൊവിനോ തോമസിനെ കണ്ടത്. അന്ന് മുതല്‍ സുഹൃത്തുക്കളായി മാറിയവരാണ് ഞങ്ങള്‍.
ഇപ്പോഴും വാട്‌സാപ്പില്‍ സ്‌മൈലി അയച്ച് കളിക്കുന്നവരാണ് ഞങ്ങള്‍. വീഡിയോ എടുത്ത് എന്നെ നാറ്റിക്കലാണ് അവന്റെ ഹോബി. ഓരോ പണിയുമായാണ് വരുന്നത്. പ്രസ് ചെയ്ത് വെക്കുന്ന ഷര്‍ട്ടൊക്കെയിട്ട് അവന്റെ മുന്നിലേക്ക് പോയാല്‍ കഥയാണ്. വിശേഷം ചോദിക്കുന്നതിനിടയില്‍ അവന്‍ അതങ്ങ് വലിക്കും. ഈ വലിക്കുന്ന രംഗം വീഡിയോയില്‍ ആക്കാനായി ആരെയെങ്കിലും നിര്‍ത്തിയിട്ടുണ്ടാവും അവന്‍. അങ്ങനെയുള്ള കുസൃതികളൊക്കെയുള്ളയാളാണ് ടൊവിനോ. കോമഡിയാവണമെങ്കില്‍ അങ്ങനെ. അതല്ല സീരിയസാവണമെങ്കില്‍ അങ്ങനെയുമാവും. ഇരുവരും ഒന്നിച്ചെത്തിയ സിനിമകളിലെല്ലാം ഇവരുടെ കെമിസ്ട്രി അറിയാനുണ്ടെന്നായിരുന്നു ആരാധകര്‍ പറഞ്ഞത്.
