എനിക്ക് 35 വയസ്സ് ആയി, ;ഞാനതിന് കാത്തിരിക്കുകയായിരുന്നു; ജീവിതത്തില്‍ പുതിയ തീരുമാനങ്ങള്‍ എടുത്ത് അര്‍ച്ചന കവി
നീലത്താമരഎന്ന ഒറ്റ സിനിമയിലൂടെ തന്നെ മലയാളികളുടെ മനംകവര്‍ന്ന നടിയാണ് അര്‍ച്ചന കവി (Archana Kavi). പിന്നീട് ഇങ്ങോട്ട് നിരവധി സിനിമകളില്‍ അര്‍ച്ചന അഭിനയിച്ചെങ്കിലും കഴിഞ്ഞ കുറേ നാളുകളായി അഭിനയ രംഗത്ത് നിന്ന് താരം വിട്ടുനില്‍ക്കുകയായിരുന്നു. രാജ റാണി എന്ന സീരിയവിലൂടെ വീണ്ടും അഭിനയ രംഗത്തേക്ക് എത്തിയ നടി അതില്‍ നിന്നും പിന്മാറി എന്ന വാര്‍ത്തയാണ് ഏറ്റവും ഒടുവില്‍ കേട്ടത്. ഇപ്പോഴിതാ തന്റെ ഭ്രാന്തമായ ചിന്തകളെ കുറിച്ച് സംസാരിച്ചുകൊണ്ട് എത്തിയിരിയ്ക്കുകയാണ് അര്‍ച്ചന കവി. തന്റെ യൂട്യൂബ് ചാനലിലൂടെ ഇനി ഡെയില് വ്‌ളോഗ് പങ്കുവയ്ക്കും എന്നും, അതിന്റെ കാരണവും അര്‍ച്ചന കവി പറയുന്നു
എന്റെ ഭ്രാന്തുകളെ എനിക്ക് വളരെ അധികം ഇഷ്ടമാണ്. എന്റെ ഭ്രാന്തുകളാണ് എന്നെ സത്യസന്ധമായും യഥാര്‍ത്ഥമായും വയ്ക്കുന്നത്. അതുകൊണ്ട് ഇനിയുള്ള ദിവസങ്ങളില്‍ എല്ലാ ദിവസവും ഞാന്‍ എന്റെ ദിവസങ്ങളെ കുറിച്ച് നിങ്ങളോട് സംസാരിക്കും. പലരും പറയാറില്ലേ, ജീവിതത്തിലെ നല്ല നിമിഷങ്ങളെ, നല്ല കാര്യങ്ങളെ എഴുതി വയ്ക്കണം എന്ന്. അത് പോലെ എല്ലാ ദിവസവും ഞാന്‍ വന്ന് ഇരുന്ന് എന്റെ ഒരു ദിവസത്തെ കുറിച്ച് സംസാരിക്കും. കേട്ട പാട്ടിനെ കുറിച്ച്, കണ്ട കാഴ്ചയെ കുറിച്ച്, ചിന്തകളെ കുറിച്ച് അങ്ങിനെ എന്റെ ഭ്രാന്തുകളെ കുറിച്ച്.
ഇന്‍ പെര്‍സ്യൂട്ട് ഓഫ് മാഡ്‌നസ്സ് (ഭ്രാന്തിന് പിന്നാലെ) എന്ന പേരിലാണ് ഈ വ്‌ളോഗുകള്‍ ചെയ്യാന്‍ ഞാന്‍ ആഗ്രഹിക്കുന്നത്. എല്ലാ ദിവസവും ഒന്നോ രണ്ടോ മിനിട്ട് വന്ന് ആ ദിവസത്തെ കുറിച്ച് സംസാരിക്കുന്നു. ലോങ് വീഡിയോ ആയിരിക്കില്ല. ഇത് ജനുവരി ആദ്യം തന്നെ ചെയ്യേണ്ടതായിരുന്നു. പക്ഷെ എനിക്ക് ഇരുന്ന് ആലോചിച്ച് ചെയ്യാന്‍ അല്പം സമയം വേണ്ടി വന്നു. ജനുവരി 4 ന്, എന്റെ ബേര്‍ത്ത് ഡേ ആവാന്‍ വേണ്ടി കാത്തിരിയ്ക്കുകയായിരുന്നു. എനിക്ക് 35 വയസ്സ് ആയി ഗായിസ്.
ഈ വര്‍ഷം എനിക്ക് എന്തെങ്കിലും കാര്യമായി ചെയ്യണം എന്ന് തോന്നുന്നു. അത് എന്തുകൊണ്ടാണ് എന്ന് അറിയില്ല. കഴിഞ്ഞ രണ്ട് വര്‍ഷം ലോക് ഡൗണ്‍ ഒക്കെ ആയതുകൊണ്ടാണോ എന്തോ, ഈ വര്‍ഷം ബേര്‍ത്ത് ഡേ ആഘോഷിക്കണം എന്ന് എനിക്കൊരു ആഗ്രഹം. പക്ഷെ അതിലെ കൗതുകകരമായ കാര്യം എന്താണെന്ന് വച്ചാല്‍, എനിക്ക് ചില ആരോഗ്യ പരമായ പ്രശ്‌നങ്ങള്‍ ഉള്ളത് കാരണം ഒന്നും പ്ലാന്‍ ചെയ്യാനായി പറ്റിയില്ല. ബേര്‍ത്ത് ഡേയുടെ അന്നാണ് എല്ലാ സുഹൃത്തുക്കളെയും വിളിച്ച് ഇന്ന് ഡിന്നറുണ്ട് വരണം എന്ന് പറഞ്ഞത്.
ഉച്ചയ്ക്ക് സര്‍പ്രൈസ് ആയിട്ട് റാണി രാജയുടെ ക്രൂ എല്ലാവരും എന്റെ വീട്ടില്‍ വന്നു. ഞാന്‍ ആദ്യമായിട്ടാണ് അവരുമായി ഇങ്ങനെ ചില്‍ ചെയ്യുന്നത്. ഞങ്ങള്‍ ഞങ്ങളുടേതായ രീതിയില്‍ ബേര്‍ത്ത് ഡേ ആഘോഷിച്ചു. വളരെ മനോഹരമായിരുന്നു അത്. വര്‍ഷങ്ങളായിട്ട് അറിയാവുന്നവരുമായി വൈകിട്ട് പാര്‍ട്ടി നടത്തി. പക്ഷെ എനിക്ക് കിട്ടിയ ബേര്‍ത്ത് ഡേ സര്‍പ്രൈസ് ഒരു മുറിവ് ആണ്. കാല് ഇടിച്ച് പെരുവിരലിന് പരിക്ക് പറ്റിയത് അര്‍ച്ചന വീഡിയോയില്‍ കാണിച്ചു തന്നു.പിന്നെ ബേര്‍ത്ത് ഡേ പാര്‍ട്ടിയ്ക്ക് കണ്ട മറ്റൊരു കാര്യം, പണ്ടൊക്കെ ഇതുപോലുള്ള പാര്‍ട്ടിയ്ക്ക് ഒരു ബോട്ടില്‍ സാധനം ഒക്കെ ഓരോരുത്തര്‍ തീര്‍ക്കുമായിരുന്നു. പക്ഷെ ഇവിടെ എല്ലാവരും ഓറഞ്ച് ജ്യൂസ് എല്ലാം കുടിച്ച് വളരെ ലളിതമായിട്ടാണ് പോയത്. മദ്യപിച്ച് ആഘോഷിക്കുക എന്നതിന് പകരം ഞങ്ങള്‍ ഒരുപാട് സംസാരിച്ചു. സ്വപ്‌നങ്ങളെ കുറിച്ചും കോമണ്‍ ടോപിക്കുകളെ കുറിച്ചും എല്ലാം ഒരുപാട് സംസാരിച്ചു.2023 എന്ന വര്‍ഷം എനിക്ക് വളരെ അധികം പ്രതീക്ഷയുണ്ട്. ഈ വര്‍ഷം ഓരോ ദിവസവും പിന്നിടുന്ന ഒരു ദിവസത്തെക്കാളും മികച്ചതാക്കാന്‍ ഞാന്‍ ശ്രമിയ്ക്കും. അത് ചെയ്യാനുള്ള ഒരു പ്രേരണ കൂടെയാണ് എനിക്ക് ഈ പെര്‍സ്യൂട്ട് ഓഫ് മാഡ്‌നസ്സ്. ഓരോ ദിവസത്തെയും എന്റെ ഭ്രാന്ത ചിന്തകളെ കുറിച്ച് ഞാന്‍ ഇനി പങ്കുവയ്ക്കും. എന്റെ സംസാരത്തെ കുറിച്ച് ചിലര്‍ വിമര്‍ശിച്ചേക്കാം. മലയാളവും ഇംഗ്ലീഷും ഇടകലര്‍ത്തി സംസാരിക്കുന്നതിനെ കുറിച്ച് കമന്റ് ഉണ്ടാവും. എനിക്ക് അറിയാവുന്ന ഭാഷയില്‍ അല്ലേ എനിക്ക് സംസാരിക്കാന്‍ പറ്റൂ- എന്ന് പറഞ്ഞുകൊണ്ടാണ് അര്‍ച്ചനയുടെ വീഡിയോ അവസാനിക്കുന്നത്‌
