പുരുഷന്റെ അഭിപ്രായത്തിന് നൽകുന്ന പ്രാധാന്യം ഒരിക്കലും സ്ത്രീകളുടെ അഭിപ്രായങ്ങൾക്ക് ആരും നൽകാറില്ല; തമന്ന
വിവിധ ഭാഷാ സിനിമകളിൽ തന്റേതായ സ്ഥാനം സ്വന്തമാക്കിയ നടിയാണ് തമന്ന ഭാട്ടിയ. അതുകൊണ്ടു തന്നെ നിരവധി ആരാധകരെയും താരത്തിന് സ്വന്തമാക്കാനായി. സോഷ്യല്‍ മീഡിയയിലും വളരെ അധികം സജ്ജീവമാണ് തമന്ന. ദിലീപിന്റെ നായികയായി ഇപ്പോൾ മലയാളത്തിലേക്കും അരങ്ങേറ്റം കുറിച്ചിരിക്കുകയാണ് താരം. തന്റെ അഭിനയത്തിലൂടെയും നൃത്തത്തിലൂടെയുമൊക്കെ പ്രേക്ഷക മനം കവരാൻ തമന്നയ്ക്കായി. ഇപ്പോൾ തമന്ന അടുത്തിടെ നൽകിയ ഒരഭിമുഖമാണ് സോഷ്യൽ മീഡിയയിൽ ശ്രദ്ധേയമാകുന്നത്. ബോഡി ഷെയിമിങ്, സ്ത്രീവിരുദ്ധത എന്നിവയുൾപ്പെടെ പല കാര്യങ്ങളെക്കുറിച്ചും തമന്ന മനസ് തുറന്നു. സിനിമ ഇൻഡസ്ട്രിയിൽ ഇപ്പോഴും സ്ത്രീവിരുദ്ധത നിലനിൽക്കുകയാണെന്ന് താരം പറഞ്ഞു
ഒരു പുരുഷന്റെ അഭിപ്രായത്തിന് നൽകുന്ന പ്രാധാന്യം ഒരിക്കലും സ്ത്രീകളുടെ അഭിപ്രായങ്ങൾക്ക് ആരും നൽകാറില്ലെന്നും തമന്ന പറയുന്നു. പിങ്ക്‌വില്ലയ്ക്ക് നൽകിയ അഭിമുഖത്തിലാണ് തമന്നയുടെ വെളിപ്പെടുത്തൽ. തന്റെ കരിയറിന്റെ തുടക്കത്തിൽ പലപ്പോഴും ഇത്തരം അനുഭവങ്ങൾ നേരിട്ടുണ്ടെന്നും താരം പറഞ്ഞു. നമ്മൾ ജോലി ചെയ്യുന്നതും ജീവിക്കുന്നതും തികച്ചും സ്ത്രീവിരുദ്ധമായ അന്തരീക്ഷത്തിലാണ്. അത് എത്ര തന്നെ നിഷേധിച്ചാലും അങ്ങനെ തന്നെ നിലനിൽക്കുകയും ചെയ്യും. അതിനാൽ നിങ്ങൾക്ക് ചെയ്യാൻ കഴിയുന്ന ഏറ്റവും വലിയ കാര്യം അതിനെ നേരിടുക എന്നതാണെന്നും നടി പറഞ്ഞു. സ്ത്രീകളുടെ അഭിപ്രായത്തേക്കാൾ ആണുങ്ങളുടെ അഭിപ്രായത്തിനാണ് ഇവിടെ ഇപ്പോഴും വില കൽപ്പിക്കുക.
അതുകൊണ്ട് തന്നെ തനിക്ക് ഒരുപാട് പ്രയാസം അനുഭവിക്കേണ്ടതായി വന്നിട്ടുണ്ടെന്നും താരം പറഞ്ഞു. ഒരു വിഷയത്തേക്കുറിച്ചുള്ള എന്റെ ചിന്തകൾ അല്ലെങ്കിൽ കാഴ്ചപ്പാടുകൾ ഞാൻ പലപ്പോഴും വിവരിക്കേണ്ടതായി വരുന്നു. ഞാനൊരു സ്ത്രീയാണ് എന്ന് നിരന്തരം പറയേണ്ടതില്ല. ഞാന്‍ ഒരു വ്യക്തിയാണ്, ഞാന്‍ ഒരു മനുഷ്യനാണ്. അതിനാല്‍ ഒരു മനുഷ്യനോട് പെരുമാറുന്നതുപോലെ എന്നോട് പെരുമാറാന്‍ ഞാന്‍ ആഗ്രഹിക്കുന്നു- തമന്ന പറയുന്നു. സ്ത്രീവിരുദ്ധതയെ നിസാരമായി കാണുന്ന പ്രവണത എനിക്ക് വിചിത്രമായി തോന്നാറുണ്ട്.
അതേക്കുറിച്ച് ഒരു നല്ല അവബോധം സൃഷ്ടിക്കുക. കാരണം അടുത്ത തലമുറ ഇത്തരം പ്രവണത അത്ര നല്ലതല്ലെന്ന് മനസിലാക്കണം. നമ്മൾ തന്നെയാണ് മറ്റുള്ളവരെ ഈ വിഷയത്തിൽ ബോധവത്കരിക്കേണ്ടത് എന്നാണ് എനിക്ക് തോന്നുന്നത്- തമന്ന വ്യക്തമാക്കി. സോഷ്യൽ മീഡിയയിലൂടെ താരങ്ങളെ ട്രോൾ ചെയ്യുന്നതിനേക്കുറിച്ചും തമന്ന പറഞ്ഞു. എനിക്ക് തോന്നുന്നത് ആളുകൾ താരങ്ങളെ ഇത്തരം കാര്യങ്ങൾക്ക് അനുയോജ്യരായ പോലെയാണ് കാണുന്നത് എന്നാണ്.
എന്നാൽ എല്ലായ്‌പ്പോഴും ഇതൊന്നും ആർക്കും ഒരുപോലെ കാണാനാകില്ല. നിങ്ങൾ സന്തോഷത്തോടെയിരിക്കുന്ന ദിവസങ്ങളും സങ്കടമുള്ള ദിവസങ്ങളുമൊക്കെയുണ്ടാകും. നമ്മളെല്ലാവരും അങ്ങനെയാണ്- തമന്ന പറഞ്ഞു. ചെറുപ്പത്തിൽ മാധുരി ദീക്ഷിത്, ശ്രീദേവി, കരിഷ്മ കപൂർ തുടങ്ങിയ നിരവധി താരങ്ങളുടെ ആരാധികയായിരുന്നു താനെന്നും തമന്ന അഭിമുഖത്തിൽ വ്യക്തമാക്കി.
അവരെപ്പോലെ ആകണമെന്ന് എനിക്കറിയാമായിരുന്നു. പക്ഷേ എങ്ങനെയെന്ന് എനിക്കറിയില്ലായിരുന്നു. ഞാൻ എങ്ങനെ അവിടെയെത്തുമെന്നും എനിക്കറിയില്ലായിരുന്നു. പക്ഷേ ഒരു പെർഫോമറാകാനുള്ള ശക്തമായ ആഗ്രഹം എനിക്കുണ്ടായിരുന്നു തമന്ന പറഞ്ഞു.
