കല്യാണത്തിന് മുന്‍പ് മൂന്ന് വര്‍ഷമായിരുന്നു സിനിമയിലുണ്ടായിരുന്നത്, അത് കഴിഞ്ഞ് കുറേ വര്‍ഷം ഇടവേളയെടുത്തു, ബ്രേക്കെടുത്തപ്പോള്‍ തിരിച്ച് വരുന്നതിനെക്കുറിച്ച് ആലോചിച്ചില്ലെന്ന് മഞ്ജു വാര്യർ

മലയാളികളുടെ പ്രിയ നടി മഞ്ജുവിന് എന്ത് വിശേഷണം നൽകിയാലും മതിയാവില്ല. നീണ്ട വർഷത്തെ ഇടവേളയ്ക്ക് ശേഷം സിനിമയിൽ ശക്തമായ തിരിച്ചുവരവ് നടത്തിയിരിക്കുകയാണ് നടി. മികച്ച കഥാപാത്രങ്ങളെ പ്രേക്ഷകര്‍ക്ക് സമ്മാനിച്ച മഞ്ജു ഇപ്പോൾ കൈനിറയെ ചിത്രങ്ങളുമായി മുന്നേറുകയാണ്.

സോഷ്യല്‍മീഡിയയിലൂടെയായി നടി പങ്കിടുന്ന വിശേഷങ്ങളും പെട്ടെന്ന് തന്നെ ശ്രദ്ധിക്കപ്പെടാറുണ്ട്. ഇപ്പോഴിതാ മുകേഷും ജയറാമും ശ്രീനിവാസനും മത്സരിച്ച് അഭിനയിച്ച സിനിമയായ ഫ്രണ്ട്‌സ് ഒഴിവാക്കേണ്ടി വന്നതിനെക്കുറിച്ച് പറഞ്ഞുള്ള മഞ്ജുവിന്റെ വാക്കുകള്‍ വൈറലായിക്കൊണ്ടിരിക്കുകയാണ്.

ബഡായി ബംഗ്ലാവിലേക്ക് അതിഥിയായി എത്തിയപ്പോഴായിരുന്നു താരം ഇതേക്കുറിച്ച് പറഞ്ഞത്.

ബഡായി ബംഗ്ലാവില്‍ എപ്പോഴാണ് മഞ്ജു വാര്യര്‍ വരുന്നതെന്ന തരത്തിലുള്ള ചോദ്യങ്ങള്‍ ഒരുപാട് കേട്ടിട്ടുണ്ട്. ഹൗ ഓള്‍ഡ് ആര്‍ യൂ ഇറങ്ങിയ സമയത്തും ആളുകള്‍ ചോദിച്ചിരുന്നു. ഇടയ്ക്ക് ഇതിനായി വിളിച്ചപ്പോള്‍ മറുവശത്ത് നിന്നും ഹിന്ദിയാണ് കേട്ടത്. മഞ്ജു ബോബെയിലാണെന്ന് അമിതാഭ് ബച്ചന്‍ പറയുന്നതാണ് അതെന്നായിരുന്നു രമേഷ് പിഷാരടി പറഞ്ഞത്. അവിടെ അദ്ദേഹത്തിനൊപ്പം പരസ്യം, ഇവിടെ എനിക്കൊപ്പം ബഡായി ബംഗ്ലാവ് എന്താ അല്ലേയെന്നായിരുന്നു പിഷാരടിയുടെ കമന്റ്.

മുകേഷേട്ടനോടൊപ്പം എനിക്ക് അഭിനയിക്കാന്‍ ഭാഗ്യം ലഭിച്ചിട്ടില്ല. ഈയൊരു ഷോയിലെങ്കിലും അദ്ദേഹത്തിന്റെ കൂടെ ഒന്നിച്ച് നില്‍ക്കാനാവുന്നതില്‍ സന്തോഷമുണ്ട്. ഫ്രണ്ട്‌സ് എന്ന ചിത്രത്തിലേക്ക് മഞ്ജുവിനെ ക്ഷണിച്ചിരുന്നു. മീനയുടെ റോളിലേക്ക് മഞ്ജുവിനെയായിരുന്നു ആദ്യം നിശ്ചയിച്ചിരുന്നത്. ഞാന്‍ അഭിനയിക്കാനിരുന്ന സിനിമയായിരുന്നു അത്. അപ്പോഴേക്കും എന്റെ കല്യാണം കഴിഞ്ഞത് കൊണ്ട് ഞാന്‍ പിന്നെ അത് ചെയ്തില്ലെന്നായിരുന്നു മഞ്ജു വാര്യര്‍ പറഞ്ഞത്.

കല്യാണത്തിന് മുന്‍പ് മൂന്ന് വര്‍ഷമായിരുന്നു സിനിമയിലുണ്ടായിരുന്നത്. അത് കഴിഞ്ഞ് കുറേ വര്‍ഷം ഇടവേളയെടുക്കുകയായിരുന്നു പിന്നീട്. അവസാനം ചെയ്തത് കണ്ണെഴുതി പൊട്ടും തൊട്ടായിരുന്നു. മഞ്ജുവിന്റെ കരിയറിനെക്കുറിച്ചുള്ള കാര്യങ്ങള്‍ മലയാളിക്ക് തെറ്റില്ല. ഏത് വര്‍ഷമാണെന്നും എത്ര സിനിമകളാണെന്നും മലയാളിക്കറിയാമെന്നായിരുന്നു മുകേഷ് പറഞ്ഞത്. അമിതാഭ് ബച്ചനൊപ്പം പരസ്യത്തില്‍ അഭിനയിച്ച സമയത്തുള്ള അനുഭവങ്ങളെക്കുറിച്ചും മഞ്ജു സംസാരിച്ചിരുന്നു.

എവിടെച്ചെന്നാലും ആളുകള്‍ എടുത്ത് പറയുന്ന കുറേ സിനിമകളുണ്ട്. ഒരുപാട് ശക്തമായ കഥാപാത്രങ്ങള്‍ എനിക്ക് കിട്ടിയിട്ടുണ്ട്. ആ ഒരു കഥാപാത്രങ്ങളുടെ ബലത്തിലാണ് ആളുകളുടെ മനസില്‍ എന്നോട് ഇഷ്ടം വന്നത്. തിരിച്ച് വന്നപ്പോഴും അതേ ഇഷ്ടമാണ് എനിക്ക് ലഭിച്ചത്. അന്ന് ബ്രേക്കെടുത്തപ്പോള്‍ തിരിച്ച് വരുന്നതിനെക്കുറിച്ചൊന്നും ആലോചിച്ചിരുന്നില്ല. ബ്രേക്കെടുത്തപ്പോള്‍ വര്‍ക്കൗട്ടൊന്നും ചെയ്തിരുന്നില്ലെന്നുമായിരുന്നു മഞ്ജു വാര്യര്‍ പറഞ്ഞത്.