അവർ നമ്മളെക്കാൾ മിടുക്കികളും മിടുക്കന്മാരുമാണ്, പ്രകൃതി അങ്ങനെയാണ് പുതിയ തലമുറകളെ സൃഷ്ടിക്കുന്നത്… കൂടുതൽ സ്വാതന്ത്ര്യത്തോടെ, കൂടുതൽ സൗകര്യങ്ങളോടെ അവർ വളരട്ടെ; കുറിപ്പ്

ഗായിക സിത്താര കൃഷ്ണകുമാറിന്റെ കുടുംബത്തേയും പ്രേക്ഷകർക്ക് പരിചിതമാണ് . ഭർത്താവ് സജിഷും മകൾ സായൂ എന്ന് വിളിക്കുന്ന സാവന്‍ ഋതുവും പ്രേക്ഷകരുടെ പ്രിയങ്കരർ ആണ്. ഇപ്പോഴിതാ മകളുടെ പിറന്നാൾ ദിനത്തിൽ സിത്താരയെ ടാഗ് ചെയ്തുകൊണ്ട് ഭർത്താവ് സജീഷ് പങ്കിട്ട പോസ്റ്റ് ആണ് വൈറലായി മാറുന്നത്.

സജീഷിന്റെ വാക്കുകൾ

അങ്ങനെ സാവൻ ഋതു പത്താം വയസ്സിലേക്ക്…വലിയ ആഘോഷങ്ങളൊന്നുമില്ലായിരുന്നു, എന്നാലും ആ കുഞ്ഞു മനസ്സിന് സൂക്ഷിച്ചു വെയ്ക്കാൻ ഒരു ഓർമ്മ വേണമല്ലോ. ചുറ്റുവട്ടത്തുള്ള അവളുടെ ഏതാനും കുരുന്നു കൂട്ടുകാർ മാത്രം. ഇടത്തിലെ പേസ്ട്രി ഷെഫ് അനഘ മനോഹരമായൊരു കെയ്ക്കുണ്ടാക്കിത്തന്നു. തീമൊക്കെ സായു തന്നെ തെരെഞ്ഞെടുത്തതായിരുന്നു…
സന്തോഷം!

ആശംസകൾ അറിയിച്ചവർക്കും, അറിയിക്കാൻ കഴിയാഞ്ഞവർക്കും… എല്ലാ പ്രിയപ്പെട്ടവർക്കും നന്ദി. ഈ സ്നേഹം എന്നും പ്രതീക്ഷിക്കുന്നു. തിരിച്ചു തരാൻ ഇനിയും കൂടുതൽ ഇഷ്ടം മാത്രം.

എല്ലാ കുഞ്ഞുങ്ങളും സ്നേഹിക്കപ്പെടണം, എന്ത് കാരണങ്ങൾ കൊണ്ടായാലും അവർ ഒരു തരത്തിലും അവഗണിക്കപ്പെടരുത്. ആഡംബരമോ , അലങ്കാരങ്ങളോ അല്ല, അലിവും അറിവുമാണ് അവരെ അണിയിക്കേണ്ടത്. നമ്മൾ രക്ഷിതാക്കളുടെ തെറ്റുകൾകാരണം സംഭവിച്ചേക്കാവുന്ന ഒരു ശിക്ഷയും അവർ നേരിടേണ്ടി വരുന്ന സാഹചര്യമുണ്ടാകരുത്.

അവർ നമ്മളെക്കാൾ മിടുക്കികളും മിടുക്കന്മാരുമാണ്, പ്രകൃതി അങ്ങനെയാണ് പുതിയ തലമുറകളെ സൃഷ്ടിക്കുന്നത്. ആയതിനാൽ കൂടുതൽ സ്വാതന്ത്ര്യത്തോടെ, കൂടുതൽ സൗകര്യങ്ങളോടെ അവർ വളരട്ടെ.

അത് സമൂഹത്തിന്റെ കൂടി ഉത്തരവാദിത്തമാണ്. എന്നാലേ മനസ്സ് വലുതാവു, നാട് നന്നാവൂ, നല്ല നാളെയുണ്ടാവൂ…കരയുന്ന ഏതു കുഞ്ഞിനെക്കണ്ടാലും വാരിയെടുത്ത് ഒന്ന് കെട്ടിപ്പിടിക്കാൻ മടിക്കരുതെന്ന് ആരോ പറഞ്ഞുകേട്ടിട്ടുട്ടുണ്ട്…എല്ലാ കുരുന്നുകൾക്കും ഇവിടെ നിർഭയം വളരാൻ കഴിയട്ടെ എന്ന് വീണ്ടും വീണ്ടും ആഗ്രഹിക്കുന്നു.- എന്ന് പറഞ്ഞുകൊണ്ടാണ് സജീഷ് പോസ്റ്റ് അവസാനിപ്പിച്ചത്.