ഐശ്വര്യ റായിയുടെ പേരില്‍ വ്യാജ പാസ്‌പോര്‍ട്ട്; മൂന്ന് വിദേശികള്‍ അറസ്റ്റില്‍

ബോളിവുഡ് താരം ഐശ്വര്യ റായിയുടെ പേരില്‍ വ്യാജ പാസ്‌പോര്‍ട്ട് കൈവശം വെച്ചതിന് മൂന്ന് വിദേശികളെ പൊലീസ് അറസ്റ്റ് ചെയ്തു. റിട്ടയര്‍ ആര്‍മി കേണലില്‍ നിന്ന് 1.81 കോടി തട്ടിയെടുത്ത കേസില്‍ നടത്തിയ അന്വേഷണത്തിലാണ് പ്രതികളെ പിടികൂടിയത്.

ഇവരില്‍ രണ്ട് പേര്‍ നൈജീരിയയില്‍ നിന്നും ഒരാള്‍ ഘാനയില്‍ നിന്നുമുള്ളവരാണ്.

പൊലീസ് നടത്തിയ പരിശോധനയില്‍ ഇവരില്‍ നിന്ന് ഐശ്വര്യയുടെ ചിത്രം പതിച്ച വ്യാജ പാസ്‌പോര്‍ട്ടിനോടൊപ്പം 3000 യു.എസ് ഡോളര്‍ (രണ്ടര ലക്ഷം), 10,500 പൗണ്ട് (10.60 ലക്ഷം) എന്നിവ കണ്ടെടുത്തതായി ഡെപ്യൂട്ടി കമീഷണര്‍ അഭിഷേക് വര്‍മ അറിയിച്ചു.

ഗ്രേറ്റര്‍ നോയിഡയില്‍ താമസിക്കുന്ന ഇവര്‍ക്കെതിരെ ഉത്തര്‍പ്രദേശ് പൊലീസ് സൈബര്‍ കുറ്റത്തിന് കേസ് എടുത്തിട്ടുണ്ട്.