News
ഭര്‍ത്താവ് തന്നെ മര്‍ദിക്കാറുണ്ടായിരുന്നു, കുഞ്ഞുണ്ടായിട്ടും സ്ഥിതി അതു തന്നെ; ഡിവോഴ്‌സ് ഫോട്ടോഷൂട്ടിനെ കുറിച്ച് നടി
ഭര്‍ത്താവ് തന്നെ മര്‍ദിക്കാറുണ്ടായിരുന്നു, കുഞ്ഞുണ്ടായിട്ടും സ്ഥിതി അതു തന്നെ; ഡിവോഴ്‌സ് ഫോട്ടോഷൂട്ടിനെ കുറിച്ച് നടി
നടി ശാലിനിയുടെ ഡിവോഴ്‌സ് ഫോട്ടോഷൂട്ട് സോഷ്യല്‍ മീഡിയില്‍ വൈറലാകുകയാണ്. ഫോട്ടോഷൂട്ട് നടത്തി വിവാഹമോചനം ആഘോഷിച്ച താരത്തിന് നേരെ സൈബര്‍ ആക്രമണവും നടക്കുന്നുണ്ട്. ഭര്‍ത്താവിനൊപ്പമുള്ള ചിത്രങ്ങള്‍ വലിച്ചു കീറിയും ‘ജീവിതത്തില്‍ 99 പ്രശ്‌നങ്ങളുണ്ടാകും, അതിലൊന്നല്ല ഭര്‍ത്താവ്’ എന്ന ബോര്‍ഡ് കയ്യില്‍ പിടിച്ചുമാണ് ശാലിനി ഡിവോഴ്‌സ് ഫോട്ടോഷൂട്ട് നടത്തിയത്.
ഭര്‍ത്താവിനൊപ്പമുള്ള ഫോട്ടോ ചവിട്ടുന്നതും ചിത്രത്തിലുണ്ട്. ചുവന്ന ഗൗണില്‍ സ്‌റ്റൈലിഷായി നില്‍ക്കുന്ന ശാലിനിയാണ് ചിത്രങ്ങളില്‍ ഉള്ളത്. വിവാഹബന്ധം ഉപേക്ഷിച്ച് ഒറ്റയ്ക്ക് നില്‍ക്കാന്‍ ഒരുപാട് ധൈര്യം ആവശ്യമാണ് അതിനാല്‍ എന്റെ എല്ലാ ധൈര്യശാലികള്‍ക്കും ഞാന്‍ ഇത് സമര്‍പ്പിക്കുന്നു എന്നും ശാലിനി കുറിച്ചിരുന്നു.
എന്നാല്‍ നിരവധി പേര് ശാലിനിയെ വിമര്‍ശിക്കുകയും ചെയ്യുന്നുണ്ട്. വിമര്‍ശനങ്ങളോട് പ്രതികരിച്ചിരിക്കുകയാണ് ശാലിനി ഇപ്പോള്‍.
‘വിവാഹ ശേഷം റിയാസ് തന്നെ മര്‍ദിക്കാറുണ്ടായിരുന്നെന്നും കുഞ്ഞ് ജനിച്ച ശേഷവും ഇതേ അവസ്ഥ തുടരുകയായിരുന്നു ഇതേ തുടര്‍ന്നാണ് ബന്ധം വേര്‍പെടുത്തിയത്. ഈ ഫോട്ടോകള്‍ പരസ്യത്തിനായി എടുത്തതല്ല. സമാനമായ സാഹചര്യങ്ങളിലുള്ള മറ്റ് സ്ത്രീകള്‍ക്കുള്ള സന്ദേശമായാണ് ഇത് എടുത്തത്.’
‘ശബ്ദമില്ലെന്നു തോന്നുന്നവരെ ബോധവല്‍ക്കരിക്കാന്‍ ഞാന്‍ എന്റെ ശബ്ദം ഉപയോഗിക്കുക ആയിരുന്നു. ചിലര്‍ എന്റെ പ്രവൃത്തിയെ വിമര്‍ശിച്ചിട്ടുണ്ട്, ചിലര്‍ക്ക് ഞാന്‍ നേരിട്ട വെല്ലുവിളികളും എന്റെ പോരാട്ടങ്ങളും പൂര്‍ണ്ണമായി മനസ്സിലാക്കാന്‍ കഴിയില്ലെന്ന് ഞാന്‍ മനസ്സിലാക്കുന്നു.’
‘എന്റെ സാഹചര്യം പങ്കുവയ്ക്കുന്നതിലൂടെ, സമാനമായ അവസ്ഥയിലുള്ള സ്ത്രീകളെ സഹായിക്കാന്‍ കഴിയുമെന്ന് ഞാന്‍ പ്രതീക്ഷിക്കുന്നു’ എന്നാണ് ശാലിനി പറയുന്നത്. ‘മുള്ളും മലരും’ എന്ന തമിഴ് സീരിയലിലൂടെ ശ്രദ്ധ നേടിയ നടിയാണ് ശാലിനി.
