അഞ്ചു വര്‍ഷമായി മൗനം പാലിച്ചവര്‍ ഇന്ന് ആക്രമിക്കപ്പെട്ട നടി പങ്കുവച്ച പോസ്റ്റ് ഏറ്റെടുത്ത് ‘വിത്ത് യൂ’ എന്ന് പ്രഖ്യാപിക്കുന്നത് നിലപാടല്ല മറിച്ച് ഗതികേട് ആണ്; വിമര്‍ശനവുമായി രേവതി സമ്പത്ത്

നടിയെ ആക്രമിച്ച കേസ് നിര്‍ണായക വിഴിത്തിരിവിലൂടെ കടന്ന് പോകുമ്പോള്‍ ആക്രമിക്കപ്പെട്ട നടി തന്നെ രംഗത്ത് എത്തിയിരുന്നു. ഇതിനു പിന്നാലെ നിരവധി പേരാണ് നടിയ്ക്ക് പിന്തുണയുമായി എത്തിയത്. എന്നാല്‍ ഇപ്പോഴിതാ അഞ്ചു വര്‍ഷമായി മൗനം പാലിച്ചവര്‍ ഇന്ന് ആക്രമിക്കപ്പെട്ട നടി പങ്കുവച്ച പോസ്റ്റ് ഏറ്റെടുത്ത് ‘വിത്ത് യൂ’ എന്ന് പ്രഖ്യാപിക്കുന്നത് നിലപാടല്ല മറിച്ച് ഗതികേട് ആണെന്ന് പറയുകയാണ് രേവതി സമ്പത്ത്.

രേവതി സമ്പത്തിന്റെ കുറിപ്പ്:

എക്കാലവും എല്ലായിപ്പോഴും സര്‍വൈവര്‍ സെന്റെര്‍ഡ് ആയ സമൂഹം ഒരു മാതൃകയാണ്. ഉള്ളില്‍ ആഗ്രഹിക്കുന്നതും അത് തന്നെയാണ്. നടിയുടെ (സര്‍വൈവര്‍) കൂടെ ഐക്യദാര്‍ഢ്യം ഇപ്പോള്‍ പല ആക്ടേഴ്‌സും പങ്കുവെക്കുന്നതില്‍ സന്തോഷം, വളരെ അഭിനന്ദിക്കുന്നു. മറുവശത്ത്, വേറൊരു കാര്യം പറയാതെ വയ്യ.

ഒരു സ്ത്രീ അവള്‍ക്കുണ്ടായ പീഡനത്തിനെതിരായി പോരാടുമ്പോള്‍ ഒരു സമൂഹം എന്ന രീതിയില്‍ അഥവാ സഹജീവികള്‍ എന്ന രീതിയില്‍ ചേര്‍ത്തു പിടിക്കാന്‍ പറ്റുന്ന ഏറ്റവും ഉത്തമമായ കാര്യം ആ സ്ത്രീയ്ക്ക് എല്ലാവിധ പിന്തുണയും സ്നേഹവും കൊടുക്കുക എന്നതാണ്. ഏതൊരു സര്‍വൈവറും അര്‍ഹിക്കുന്ന ഒരു കാര്യം ആണത്.

എന്നാല്‍ ഈ ഗതികെട്ട സമൂഹം അങ്ങനെയല്ല. നിന്ന നില്‍പ്പില്‍ യൂ ടേണ്‍ എടുക്കലില്‍ വിദഗ്ദ്ധരാണ്. ഈ പറയുന്ന രീതി ഇവിടെ ഒരു സര്‍വൈവറിന് പോലും ഇല്ല, എന്നാല്‍ അതൊന്നും നോക്കാതെ തന്നെ സ്വന്തമായി പോരാടുന്ന സര്‍വൈവേഴ്‌സ് ആണ് ഭൂരിഭാഗത്തിന് മേലും.

അവരുടെ ആദ്യ കാലങ്ങളിലോ, അവര്‍ കഠിനമായ വിചാരണകളില്‍ കടന്നുപോയപ്പോഴോ, വര്‍ഷങ്ങള്‍ നീണ്ട മാനസിക വേദനയില്‍ ആഴ്ന്നു പോയപ്പോഴോ മൗനം പാലിച്ച പലരും ഇന്ന് ‘ംശവേ ്യീൗ’ എന്ന് പ്രഖ്യാപിക്കുമ്പോള്‍ നിലപാടല്ല മറിച്ച് ഗതികേട് ആണ് എന്ന വസ്തുത അറിഞ്ഞു വെച്ചിട്ട് ഗംഭീരം എന്ന് പറയാന്‍ മനസില്ല.

ഗ്രീന്‍ സിഗ്നല്‍ കാണുമ്പോള്‍ ഒരു കൂട്ടമായി വരുന്ന ഈ ഐക്യദാര്‍ഢ്യം ഒരു കുമിള മാത്രമാണ്. പ്രഹസനങ്ങള്‍ കൊണ്ടുള്ള ഐക്യദാര്‍ഢ്യം ഒരു മാതൃക ആക്കരുത്/ആക്കിമാറ്റരുത് എന്നാഗ്രഹിക്കുന്നു. പോരാട്ടങ്ങളുടെ വേദനകളെ കളിയാക്കുന്നതിനു തുല്യമാണത്.