Bollywood
പിറന്നാള് ദിനത്തില് മുട്ടുകുത്തി തിരുപ്പതി ക്ഷേത്രപ്പടികള് കയറി ജാന്വി കപൂര്; മുകളിലെത്തിയത് നാല് മണിക്കൂര് കൊണ്ട്
പിറന്നാള് ദിനത്തില് മുട്ടുകുത്തി തിരുപ്പതി ക്ഷേത്രപ്പടികള് കയറി ജാന്വി കപൂര്; മുകളിലെത്തിയത് നാല് മണിക്കൂര് കൊണ്ട്
തന്റെ പിറന്നാള് ദിനത്തില് മുട്ടുകുത്തി തിരുപ്പതി ക്ഷേത്രപ്പടികള് കയറി ജാന്വി കപൂര്. സോഷ്യല് മീഡിയ ഇന്ഫഌവെന്സര് ഓറിയാണ് ജാന്വി മുട്ടുകുത്തി ക്ഷേത്ര പടികള് കയറുന്ന വീഡിയോ ഇപ്പോള് പങ്കുവച്ചത്. ഓറിക്കും കാമുകന് ശിഖര് പഹാരിയക്കും ഒപ്പമാണ് ജാന്വി തിരുപ്പതി ക്ഷേത്രം സന്ദര്ശിച്ചത്.
3550 പടിക്കെട്ടുകള് കയറി മൂന്നുപേരും മുകളിലെത്തുന്നത് വീഡിയോയില് കാണാം. മുട്ടുകുത്തിയാണ് മൂന്നുപേരും അവസാന പടിക്കെട്ടുകള് കയറിയത്. മുകളിലെത്താന് നാല് മണിക്കൂര് എടുത്തെന്നും ഒറി വീഡിയോയില് പറയുന്നുണ്ട്. മാര്ച്ച് 6 ആയിരുന്നു ജാന്വി കപൂറിന്റെ ജന്മദിനം.
ക്ഷേത്രദര്ശനത്തിന് ശേഷം തിരിച്ചുപോകുന്ന വഴിയില് വിമാനത്തില്വെച്ച് കേക്ക് മുറിച്ച് ജാന്വിയുടെ പിറന്നാള് ആഘോഷിക്കുകയും ചെയ്തു. ഇതും ഒറി വീഡിയോയില് ഉള്പ്പെടുത്തിയിട്ടുണ്ട്. അമ്മ ശ്രീദേവിക്ക് ഏറെ പ്രിയപ്പെട്ട സ്ഥലങ്ങളിലൊന്നായ തിരുപ്പതിയില് നിരവധി തവണ ജാന്വി ദര്ശനത്തിന് എത്തിയിട്ടുണ്ട്.
‘എനിക്ക് പവിത്രത നിറഞ്ഞ ക്ഷേത്രവുമായി ആത്മബന്ധമുണ്ട്. ബാലാജിയോടുള്ള എന്റെ പ്രാര്ത്ഥന നിറവേറ്റാനായി ഏകദേശം 50 തവണയെങ്കിലും ഞാന് മുട്ടുകുത്തി കുന്നിന് മുകളിലെ ക്ഷേത്രം സന്ദര്ശിച്ചിട്ടുണ്ട്’ എന്ന് ജാന്വി മാധ്യമങ്ങളോട് വ്യക്തമാക്കി.
അതേസമയം, ബോളിവുഡ് ചിത്രങ്ങള്ക്ക് അല്പം ഇടവേള നല്കിയ തെലുങ്കില് സജീവമായിരിക്കുകയാണ് ജാന്വി ഇപ്പോള്. ജൂനിയര് എന്ടിആറിനൊപ്പമുള്ള ‘ദേവര’ ആണ് താരത്തിന്റെതായി റിലീസിന് ഒരുങ്ങുന്നത്. രാം ചരണിന്റെ പുതിയ ചിത്രത്തിലും ജാന്വിയാണ് നായിക. ചിത്രത്തിന്റെ പൂജ അടുത്തിടെ നടന്നിരുന്നു.