ഒന്നര വർഷത്തിന് ശേഷം വീണ്ടും സീരിയലിലേക്ക് തിരിച്ചെത്തുന്നു;സന്തോഷ വാർത്ത പങ്കുവെച്ച് ആതിര മാധവ്

മലയാളികള്‍ക്ക് ഏറെ സുപരിചിതയായ താരമാണ് ആതിര മാധവ്. കുടുംബവിളക്ക് സീരിയലിലൂടെയാണ് ആതിര മാധവ് ശ്രദ്ധിക്കപ്പെട്ടത്. ഗര്‍ഭിണിയായതിനു ശേഷം ആരോഗ്യകാര്യങ്ങളില്‍ കൂടുതല്‍ ശ്രദ്ധ കേന്ദ്രീകരിക്കാന്‍ വേണ്ടി കുടുംബവിളക്ക് സീരിയലില്‍ നിന്ന് ആതിര ഇടവേളയെടുത്തിരുന്നു.സുമിത്രയുടെ മൂത്തമകൻ അനിരുദ്ധിന്റെ ഭാര്യയായ അനന്യ എന്ന കഥാപാത്രത്തെയാണ് കുടുംബവിളക്കിൽ ആതിര ചെയ്തിരുന്നത്. ഗർഭിണിയായതിനെ തുടർന്നാണ് പരമ്പരയിൽ നിന്നും ആതിര പിന്മാറിയത്. തുടർന്ന് തന്റെ വിസേഷങ്ങൾ എല്ലാം ആതിര യൂട്യൂബ് ചാനലിലൂടെ പങ്കുവയ്ക്കാറുണ്ട്. സോഷ്യൽ മീഡിയയിൽ വളരെ സജീവമാണ് നടി.

ഇപ്പോഴിതാ പുതിയ ഒരു സന്തോഷ വാർത്ത പങ്കുവച്ചെത്തിയിരിക്കുകയാണ് ആതിര. മറ്റൊന്നുമല്ല, ഒന്നര വർഷത്തിന് ശേഷം വീണ്ടും സീരിയലിലേക്ക് തിരിച്ചെത്തുന്നു. ഒരു മുഴുനീള വേഷം അല്ല, ഗസ്റ്റ് റോളാണ്. എന്നാലും വലിയൊരു ഗ്യാപിന് ശേഷം ഒരു സീരിയൽ സെറ്റിൽ തിരിച്ചെത്തുന്ന സന്തോഷത്തിലാണ് നടിയുടെ യൂട്യൂബ് വീഡിയോ.

ഏഷ്യനെറ്റിൽ തന്നെ സംപ്രേക്ഷണം ചെയ്യുന്ന ഗീതാ ഗോവിന്ദം എന്ന പരമ്പരയിലാണ് ആതിര എത്തുന്നത്. 2021 ഡിസംബറിലാണ് കുടുംബവിളക്കിന്റെ സെറ്റിൽ നിന്നും ആതിര പിന്മാറിയത്. ഇപ്പോൾ വീടിന് അടുത്ത് തന്നെയാണ് ഗീതാ ഗോവിന്ദത്തിന്റെ ഷൂട്ട് നടക്കുന്നത്. ഒരു വയസ്സായ മകനെ അമ്മയെ ഏൽപിച്ചിട്ടാണ് ആതിര പോകുന്നത്. ഫോട്ടോഷൂട്ടിനും മറ്റുമായി അമ്മയുടെ അടുത്താക്കി പോകാറുണ്ടെങ്കിലും അത് മണിക്കൂറുകൾക്കകം തിരിച്ചുവരാറുണ്ട്. അൽപമധിക സമയം ഷൂട്ട് നീണ്ടുപോയ സ്റ്റാർമാജിക്കിന്റെ സെറ്റിലെല്ലാം കുഞ്ഞിനെയും കൊണ്ടാണത്രെ പോയത്. ഗീതാ ഗോവിനന്ദത്തിൽ ഒരു ദിവസത്തെ ഷൂട്ട് മാത്രമേ ആതിരയ്ക്കുള്ളൂ.

സെറ്റിൽ ആതിരയ്ക്ക് പഴയ സൗഹൃദങ്ങൾ എല്ലാം ഉള്ളത് വലിയ ആശ്വാസമായിരുന്നു. കുടുംബവിളക്കിൽ അനിയത്തിയായിയെത്തിയ അമൃത ഗീതാ ഗോവിനന്ദത്തിലും ഉണ്ട്. നായിക ബിന്നിയെയും ആതിരയ്ക്ക് നേരത്തെയറിയാം. കുടുംബവിളക്കിലെ പ്രതീഷ് എന്ന കഥാപാത്രത്തെ അവതരിപ്പിയ്ക്കുന്ന നൂബിന്റെ ഭാര്യയാണ് ബിന്നി. നേരിട്ട് കാണുന്നത് ഇപ്പോഴാണെങ്കിലും ഫോണിലൂടെ ബിന്നിയുമായി ഒരുപാടു സംസാരിച്ചിട്ടുണ്ടത്രെ