എന്റെ തെറ്റ് മനസിലായി, ആം ആദ്മിയില്‍ നിന്ന് പുറത്തുവരുന്നു; പാര്‍ട്ടിയില്‍ നിന്ന് രാജിവെച്ച് നടി സംഭവ്‌ന സേത്ത്

ഒരു വര്‍ഷം മുന്‍പ് ആം ആദ്മിയില്‍ അംഗത്വം സ്വീകരിച്ച ബോളിവുഡ് നടി സംഭവ്‌ന സേത്ത് രാജിവച്ചു. സോഷ്യല്‍ മീഡിയയിലൂടെയാണ് അവര്‍ പ്രഖ്യാപനം നടത്തിയത്. ഞാന്‍ എന്റെ തെറ്റ് മനസിലാക്കിയെന്നും ഇനി ആം ആദ്മിയുടെ ഭാഗമായിരിക്കില്ലെന്നും അവര്‍ വ്യക്തമാക്കി.

‘രാജ്യത്തെ സേവിക്കാന്‍ വളരെ ഉത്സാഹത്തോടെയാണ് ഞാന്‍ ആം ആദ്മി പാര്‍ട്ടിയില്‍ ചേര്‍ന്നത്. എത്ര ബുദ്ധപരമായ തീരുമാനമായാലും നിങ്ങള്‍ക്ക് തെറ്റിപ്പോകും കാരണം, നമ്മളെല്ലാം ഏറ്റവും ഒടുവില്‍ മനുഷ്യന്മാരല്ലെ.

എന്റെ തെറ്റ് മനസിലാക്കി, ആം ആദ്മിയില്‍ നിന്ന് പുറത്തുവരുന്നതായി ഞാന്‍ ഔദ്യോഗികമായി പ്രഖ്യാപിക്കുന്നു’ എന്നും സംഭവ്‌ന എക്‌സില്‍ കുറിച്ചു.

അരവിന്ദ് കെജ്‌രിവാളിനെ ടാഗ് ചെയ്താണ് നടിയുടെ പോസ്റ്റ്. ലോക് സഭ തിരഞ്ഞെടുപ്പിനെ നേരിടാനിരിക്കെ വലിയ പ്രതീക്ഷയോടെ പാര്‍ട്ടിയിലെത്തിച്ച നടിയുടെ രാജി ആപ്പിനെ വെട്ടിലാക്കിയിട്ടുണ്ട്. 2023 ജനുവരിയിലാണ് നടി ആപ്പിനൊപ്പം ചേര്‍ന്നത്.