ക്യാമറയ്ക്ക് മുന്നിൽ കരഞ്ഞ് കാണിച്ച് സൂര്യ, കൂട്ടിന് കരഞ്ഞ് ലക്ഷ്മിയും, ആഘോഷമാക്കി പ്രേക്ഷകർ !

ബിഗ്ബോസ് മലയാളം സീസൺ 3യ്ക്ക് ആവേശത്തിരയിളക്കി തുടക്കമിട്ടതോടെ മത്സരാർത്ഥികളുടെ ആദ്യദിന വിശേഷങ്ങൾ പ്രേക്ഷകർ ഇരുകൈയ്യും നീട്ടി സ്വീകരിച്ചിരിക്കുകയാണ്. ആദ്യ ദിനത്തിൽ മത്സരാർത്ഥികൾ തമ്മിലുള്ള പരിചയം ഊട്ടിയുറപ്പിക്കുന്നത് കാണാമായിരുന്നു. എല്ലാവരും തങ്ങളുടെ വിശേഷങ്ങളും വീട്ടുകാര്യങ്ങളും മക്കളെ കുറിച്ചും അമ്മയെക്കുറിച്ചുമൊക്കെയുള്ള കാര്യങ്ങൾ തുറന്ന് പറയുന്നതിനിടെ ക്യാമറാക്കണ്ണുകളെ ആകർഷിച്ചത് നടിയും അവതാരകയും ആർജെയുമൊക്കെയായ സൂര്യയാണ്. തനിക്ക് മറ്റു മത്സരാർത്ഥികളുടെ വൈബിനൊപ്പം പിടിച്ചു നിൽക്കാൻ പറ്റില്ലെന്നും കരയരുതെന്ന് നിശ്ചയിച്ചിട്ടും കരയാതിരിക്കാൻ കഴിയുന്നില്ലെന്നും അമ്മയോടെന്ന പോലെ സൂര്യ പറയുന്നത് ക്യാമറാ കണ്ണുകളെ ആകർഷിച്ചു.

ലക്ഷ്മി ജയൻ അമ്മയോടും മകനോടുമുള്ള അടുപ്പത്തെ കുറിച്ചും മകനെ വിട്ടു നിൽക്കുമ്പോഴുണ്ടാകുന്ന മാനസിക വിഷമത്തെ കുറിച്ചും പറഞ്ഞ് പൊട്ടിക്കരയുകയായിരുന്നു. എന്നാൽ സമാധാനമേകാൻ ഫിറോസിൻ്റെ നേതൃത്വത്തിൽ എല്ലാവരും ഓടിയെത്തുകയും ചെയ്തത് ബിഗ്ബോസ് വീട്ടിലെ വേറിട്ട കാഴ്ചയായി. തുടർന്ന് ആദ്യ ടാസ്കുമായി ബിഗ്ബോസിൻ്റെ പ്രഖ്യാപനമെത്തി. ഫിറോസ് അവതരിപ്പിച്ച ടാസ്ക് രണ്ട് സംഘമായി തിരിഞ്ഞ് നടത്തിയ സിംപിൾ ഗെയിമായിരുന്നു. ബിഗ്ബോസ് ശരീരഭാഗങ്ങളുടെ പേര് പറയുമ്പോൾ അവിടെ തൊടുകയും ബോൾ പറയുമ്പോൾ അത് ഉടൻ ആദ്യം കൈക്കലാക്കുകയും ചെയ്യുന്ന ആൾക്ക് വിജയം എന്നതായിരുന്നു ഗെയിം. ഗെയിമിൽ ഏറ്റവും കൂടുതൽ തവണ ജയം കൈവരിച്ച രണ്ട് പേർ തമ്മിലാണ് ആദ്യ ആഴ്ചയിലെ ക്യാപ്റ്റൻസിയ്ക്കായി മത്സരിക്കുക. ആദ്യ ഗെയിമിൽ കൂടുതൽ തവണ ജയിച്ചത് ലക്ഷ്മി ജയനും ഭാഗ്യലക്ഷ്മിയുമായിരുന്നു. ലക്ഷ്മി നാല് തവണ ജയിച്ചപ്പോൾ ഭാഗ്യലക്ഷ്മി മൂന്ന് തവണയാണ് വിജയം കരസ്ഥമാക്കിയത്. അതിനാൽ തന്നെ നാളെ നടക്കുന്ന ക്യാപ്റ്റൻസി ടാസ്കിൽ മത്സരിക്കുന്നത് ലക്ഷ്മി ജയനും ഭാഗ്യലക്ഷ്മിയുമാണ്.

about an actress