News
‘സ്‌ഫോടനം’, ‘വാങ്കഡെ സ്റ്റേഡിയം’, ആര്യന്‍ ഖാന് വിഷയത്തില്‍ സമീര്‍ വാങ്കഡെയെയും മാധ്യമങ്ങളെയും പരോക്ഷമായി വിമര്‍ശിച്ച് ട്വിങ്കിള്‍ ഖന്ന
‘സ്‌ഫോടനം’, ‘വാങ്കഡെ സ്റ്റേഡിയം’, ആര്യന്‍ ഖാന് വിഷയത്തില്‍ സമീര്‍ വാങ്കഡെയെയും മാധ്യമങ്ങളെയും പരോക്ഷമായി വിമര്‍ശിച്ച് ട്വിങ്കിള്‍ ഖന്ന
കഴിഞ്ഞ കുറച്ച് ദിവസങ്ങള്‍ക്ക് മുമ്പാണ് ആഡംബര കപ്പലിലെ ലഹരിപ്പാര്‍ട്ടിയ്ക്കിടെ ഷാരൂഖ് ഖാന്റെ മകന്‍ ആര്യന്‍ ഖാന് എന്‍സിബി പിടിയിലാകുന്നത്. കഴിഞ്ഞ ദിവസം താരപുത്രന്‍ ജാമ്യത്തിലിറങ്ങി എങ്കിലും വാര്‍ത്തകള്‍ ഇനിയും കെട്ടൊടുങ്ങിയിട്ടില്ല. ആര്യന്‍ ഖാന് പിന്തുണ പ്രഖ്യാപിച്ച് ബോളിവുഡ് നടി ട്വിങ്കിള്‍ ഖന്ന രംഗത്ത് വന്നത് വാര്‍ത്തകളിലിടം നേടിയിരുന്നു.
ഇപ്പോഴിതാ നടിയുടെ പുതിയ ബ്ലോഗ് സോഷ്യല്‍ മീഡിയയില്‍ വൈറലാകുകയാണ്. പ്രശസ്തരായ താരപുത്രന്മാരെ കുറിച്ചുള്ളതാണ് നടിയുടെ ബ്ലോഗ്. ഇതില്‍ ബോളിവുഡ് താരങ്ങളുടെയോ, താരപുത്രന്മാരുടെയോ പേരുവിവരങ്ങള്‍ പരസ്യമായി പരാമര്‍ശിച്ചിട്ടില്ല. എന്നാല്‍ പരോക്ഷ വിമര്‍ശനം തന്നെയാണ് ആദ്യാവസാനം ട്വിങ്കിളിന്റെ ബ്ലോഗിലുള്ളത്.
മയക്കുമരുന്നു കേസില്‍ ഒരുമാസത്തെ ജയില്‍വാസത്തിനു ശേഷം ജാമ്യത്തിലിറങ്ങിയ ഷാരൂഖ് ഖാന്റെ മകന്‍ ആര്യന്‍ ഖാനെ കുറിച്ച് ‘സ്‌ഫോടനം’, ‘വാങ്കഡെ സ്റ്റേഡിയം’ എന്നീ വാക്കുകളാണ് ബ്ലോഗില്‍ നടി ഉപയോഗിച്ചിരിക്കുന്നത്. താരപുത്രന്മാരെ കുറിച്ചുള്ള ചെറിയ കാര്യങ്ങള്‍ പോലും തെറ്റായരീതിയില്‍ ചിത്രീകരിച്ച് പര്‍വ്വതീകരിച്ച് വലിയ വാര്‍ത്തയാക്കുന്ന പ്രവണത മാധ്യമങ്ങളില്‍ കാണുന്നുവെന്നും, തെറ്റായ കാരണങ്ങളാല്‍ താരപുത്രന്മാര്‍ വാര്‍ത്തകളില്‍ നിറഞ്ഞു നില്‍ക്കുന്നത് കണ്ടപ്പോള്‍ ആദ്യമൊന്ന് ഞെട്ടിയെന്നും ട്വിങ്കിള്‍ പറഞ്ഞു.
താന്‍ അടുത്ത കാലത്തായി വാട്‌സ്ആപ്പിലൂടെ സന്ദേശങ്ങള്‍ കൈമാറുമ്പോള്‍ കൂടുതല്‍ ശ്രദ്ധിക്കാറുണ്ടെന്നും നടി ബ്ലോഗില്‍ പരാമര്‍ശിക്കുന്നുണ്ട്. അതായത് ഇതിലൂടെ ആര്യന്‍ ഖാന്റെ വാട്സ് ആപ്പ് ചാറ്റുകള്‍ എന്‍സിബി പരിശോധിച്ചത് തന്നെയാണ് പ്രതിപാദിച്ചിരിക്കുന്നത്. എപ്പോഴെങ്കിലും തന്റെ ഫോണ്‍ പിടിക്കപ്പെട്ടാല്‍ സന്ദേശങ്ങള്‍ തെറ്റായി വ്യാഖ്യാനിക്കപ്പടുമോ എന്ന് ഭയമുണ്ടെന്നും മിസ്സിസ് ഫണ്ണിബോണ്‍സ് എന്ന പേരിലുള്ള ബ്ലോഗില്‍ ട്വിങ്കിള്‍ ഖന്ന കുറിച്ചു.
ഇപ്പോള്‍ ജാമ്യം ലഭിക്കുകയെന്നത് ഹൈസ്‌കൂളില്‍ നിന്നും ബിരുദം നേടുന്നതിനെക്കാള്‍ പ്രയാസകരമാണെന്നും ട്വിങ്കിള്‍ പറഞ്ഞു. ‘ദേശി സ്‌ക്വിഡ് ഗെയിമുകള്‍ ആരംഭിക്കട്ടെ’ എന്ന തലക്കെട്ടോടുകൂടി ഇന്‍സ്റ്റാഗ്രാമില്‍ നേരത്തെ നല്‍കിയ പോസ്റ്റില്‍ ആര്യന്‍ ഖാന്റെ അറസ്റ്റിനെ ട്വിങ്കിള്‍ നെറ്റ്ഫ്‌ളിക്‌സിലെ സ്‌ക്വിഡ് ഗെയിമുമായി താരതമ്യം ചെയ്തിരുന്നു.
