എവിടെയോ ഒളിച്ചിരിക്കുന്ന പാട്ടുപെട്ടിയാണ്! ആ ശബ്ദം ജീവിക്കാൻ പ്രേരിപ്പിക്കുന്നു! മഞ്ജുവിന്റെ പോസ്റ്റ് ഞെട്ടിച്ചു; വൈറ ലാകുന്നു

പിന്നണി ഗാനരംഗത്ത് ഗാനഗന്ധർവൻ കെ. ജെ. യേശുദാസ് ഇന്ന് 60 വയസ്സ് പൂർത്തിയാക്കുകയാണ്. തങ്ങളുടെ പ്രിയഗായകന് ആശംസകള്‍ നേര്‍ന്ന് നിരവധി പേരാണ് സോഷ്യൽ മീഡിയയിലൂടെയും അല്ലാതെയും എത്തുന്നത്. ഇപ്പോഴിതാ കെ.ജെ യേശുദാസിന് ആശസ നേർന്ന് എത്തിയിരിക്കുകയാണ്
മഞ്ജു വാര്യർ. ഫെയ്‌സ്‌ബുക്കിലൂടെയാണ് മഞ്ജു തന്റെ പ്രിയഗായകന് ആശംസകൾ നേർന്നത്.

അങ്ങയുടെ ശബ്‌ദം മനുഷ്യരെ ജീവിക്കാൻ പ്രേരിപ്പിക്കുന്നതാണ് അതുകൊണ്ട് ഇനിയും പാടിക്കൊണ്ടേയിരിക്കുക എന്ന് ആശംസ നേർന്ന് മഞ്ജു കുറിച്ചു.

‘പാടുന്നത് യേശുദാസ്..’ എന്ന് നമ്മൾ കേൾക്കാൻ തുടങ്ങിയിട്ട് ഇന്ന് 60 വർഷം തികയുന്നു. ദാസേട്ടൻ നമ്മുടെയെല്ലാം കാതിൽ എവിടെയോ ഒളിച്ചിരിക്കുന്ന പാട്ടുപെട്ടിയാണ്. ഒരുമാത്രയിൽ അത് പാടിത്തുടങ്ങും. സന്തോഷിക്കുമ്പോൾ, സങ്കടപ്പെടുമ്പോൾ, കിനാവു കാണുമ്പോൾ, വയൽപ്പച്ചയിലൂടെ നടക്കുമ്പോൾ, കടൽത്തിരകളെ തൊടുമ്പോൾ അങ്ങനെയങ്ങനെ എത്രയെത്ര ജീവിതനിമിഷങ്ങളിൽ യേശുദാസ് എന്ന ഗാനഗന്ധർവൻ നമുക്കു വേണ്ടി പാടിക്കൊണ്ടേയിരിക്കുന്നു.

എത്രയോ മനുഷ്യർ ദാസേട്ടൻ എന്ന വെൺമേഘത്തിനാപ്പം ആകാശങ്ങൾ താണ്ടുന്നു. പ്രിയ ഗായകാ… ഞങ്ങൾക്കായി ഇനിയും പാടിക്കൊണ്ടേയിരിക്കുക. നിത്യഋതുവായി നിലകൊള്ളുക. കാരണം അങ്ങയുടെ ശബ്ദം മനുഷ്യരെ ജീവിക്കാൻ പ്രേരിപ്പിക്കുന്നതാണ്. ആദ്യഗാനത്തിൻ്റെ അറുപതാം പിറന്നാൾ ദിനത്തിൽ, ദാസേട്ടന് എല്ലാ ആയുരാരോഗ്യസൗഖ്യവുമുണ്ടാകാൻ പ്രാർഥിക്കുന്നു.” മഞ്ജു വാര്യർ കുറിച്ചു.