ഒരു പരിപൂര്‍ണ്ണ ലോക്ക്ഡൗണ്‍ നമുക്കിനി ചിന്തിക്കാനെ വയ്യ; നല്ലതിനു വേണ്ടിയാണെന്ന് കരുതി എല്ലാവരും സഹകരിക്കുക, അഭ്യർത്ഥനയുമായി മനോജ് കെ ജയൻ

കോവിഡ് രണ്ടാം തരംഗം രാജ്യത്ത് രൂക്ഷമാവുകയാണ്. സംസ്ഥാനത്ത് കഴിഞ്ഞ ദിവസവും കൊവിഡ് പ്രതിദിന കണക്കുകള്‍ ഇരുപത്തി അയ്യായിരം കടന്നിരിക്കുകയാണ്.

വീണ്ടും പരിപൂര്‍ണ്ണ ലോക്ഡൗണിലേക്ക് തിരികെ പോകാന്‍ കഴിയില്ല. അതിനാല്‍ എല്ലാവരും സഹകരിക്കണമെന്ന് അഭ്യര്‍ത്ഥിച്ച് നടന്‍ മനോജ് കെ ജയന്‍. തന്റെ ഫേസ്ബുക്കിലാണ് സീനിയേഴ്‌സ് എന്ന സിനിമയുടെ പോസ്റ്റര്‍ പങ്കുവെച്ച് താരം ഇക്കാര്യം പറഞ്ഞത്.

”ലോക്ഡൗണ്‍ സമാനമായ രണ്ടു ദിവസങ്ങള്‍ ഇന്നും, നാളെയും. ഒരു പരിപൂര്‍ണ്ണ ലോക്ക്ഡൗണ്‍ നമുക്കിനി ചിന്തിക്കാനെ വയ്യ. എല്ലാം നല്ലതിനു വേണ്ടിയാണെന്ന് കരുതി എല്ലാവരും സഹകരിക്കുക. സൂക്ഷിക്കുക. ശ്രദ്ധിക്കുക. നല്ലതു മാത്രം സംഭവിക്കട്ടെ എന്ന പ്രാര്‍ത്ഥനയോടെ. ശുഭദിനം” എന്നാണ് നടന്‍ കുറിച്ചിരിക്കുന്നത്.

കഴിഞ്ഞ 24 മണിക്കൂറിനിടെ 26,685 പേരാണ് സംസ്ഥാനത്ത് കൊവിഡ് ബാധിതരായത്. കോഴിക്കോടും എറണാകുളത്തും 3000ലധികം പേര്‍ രോഗബാധിതരായി. 25 പേരുടെ മരണങ്ങളാണ് കഴിഞ്ഞ ദിവസം കൊവിഡ് മൂലമെന്ന് സ്ഥിരീകരിച്ചത്. ഇതോടെ സംസ്ഥാനത്ത് ആകെ കൊവിഡ് മരണം 5080 ആയി.