News
സെന്‍സര്‍ സര്‍ട്ടിഫിക്കറ്റ് ലഭിക്കാന്‍ കൈക്കൂലി കൊടുത്തെന്ന വിശാലിന്റെ പരാതി; സെന്‍സര്‍ സര്‍ട്ടിഫിക്കറ്റ് നേടാന്‍ പുതിയ മാര്‍ഗനിര്‍ദേശങ്ങളുമായി സെന്‍സര്‍ ബോര്‍ഡ്
സെന്‍സര്‍ സര്‍ട്ടിഫിക്കറ്റ് ലഭിക്കാന്‍ കൈക്കൂലി കൊടുത്തെന്ന വിശാലിന്റെ പരാതി; സെന്‍സര്‍ സര്‍ട്ടിഫിക്കറ്റ് നേടാന്‍ പുതിയ മാര്‍ഗനിര്‍ദേശങ്ങളുമായി സെന്‍സര്‍ ബോര്‍ഡ്
മാര്‍ക്ക് ആന്റണി എന്ന ചിത്രത്തിന്റെ ഹിന്ദി പതിപ്പിന് സെന്‍സര്‍ സര്‍ട്ടിഫിക്കറ്റ് ലഭിക്കാന്‍ കൈക്കൂലി കൊടുത്തു എന്ന നടന് വിശാലിന്റെ ആരോപണം സിനിമാലോകത്തെ ഒന്നാകെ ഞെട്ടിച്ചിരുന്നു. കേന്ദ്രസര്‍ക്കാര്‍ ഈ വിഷയത്തില്‍ അന്വേഷണവും പ്രഖ്യാപിച്ചിരുന്നു. ഇതിന് പിന്നാലെ സിനിമകള്‍ സെന്‍സര്‍ സര്‍ട്ടിഫിക്കറ്റിന് അപേക്ഷിക്കുമ്പോള്‍ പാലിക്കേണ്ട കാര്യങ്ങളെന്തെല്ലാമാണെന്ന പുതിയ മാര്‍ഗനിര്‍ദേശം പുറപ്പെടുവിച്ചിരിക്കുകയാണ് കേന്ദ്ര സെന്‍സര്‍ ബോര്‍ഡ്.
വിശാല്‍ ഉന്നയിച്ച കൈക്കൂലി ആരോപണത്തിനുള്ള മറുപടിയെന്നോണം പുറത്തിറക്കിയ പ്രസ്താവനയിലാണ് സി.ബി.എഫ്.സി. പുതിയ മാര്‍ഗനിര്‍ദേശങ്ങളേക്കുറിച്ചും പറയുന്നത്. കൈക്കൂലി സംഭവത്തിന് പിന്നില്‍ ബോര്‍ഡ് അംഗങ്ങളല്ലെന്നും അനധികൃത മൂന്നാം കക്ഷി ഇടനിലക്കാരാണെന്നുമാണ് അവര്‍ പറയുന്നത്. അതേസമയം വിശാല്‍ നല്‍കിയ പരാതിയില്‍ നടപടിയായി സിനിമാ സെന്‍സര്‍ഷിപ്പിന് അപേക്ഷിക്കുന്ന നടപടികളെല്ലാം ഡിജിറ്റലാക്കിയിട്ടുണ്ടെന്നും ഇത് അഴിമതിക്ക് വഴിയൊരുക്കില്ലെന്നുമാണ് സെന്‍സര്‍ ബോര്‍ഡ് പറയുന്നത്.
പ്രശ്‌നത്തേക്കുറിച്ച് കൂടുതല്‍ ആഴത്തില്‍ അന്വേഷിക്കുന്നുണ്ട്. ഉത്തരവാദികള്‍ ആരെന്ന് കണ്ടെത്തി കര്‍ശന നടപടി സ്വീകരിക്കും. സെന്‍സര്‍ഷിപ്പിന് സിനിമകള്‍ നല്‍കുന്ന നടപടി ഡിജിറ്റലാക്കിയിട്ടുണ്ട്. ഇസിനിപ്രമാണിലൂടെയുള്ള കൃത്യമായ ഡിജിറ്റലൈസ്ഡ് പ്രക്രിയ കര്‍ശനമായി പിന്തുടരുന്നുവെന്ന് എല്ലാ ചലച്ചിത്ര നിര്‍മ്മാതാക്കളും നിര്‍മ്മാതാക്കളും ഉറപ്പാക്കുമെന്ന് പ്രതീക്ഷിക്കുന്നു. ഇതില്‍ മൂന്നാമതൊരു ഇടനിലക്കാരനെയോ ഗ്രൂപ്പിനെയോ അനുവദിക്കരുത്. സിനിമയുടെ സര്‍ട്ടിഫിക്കേഷനായുള്ള അപേക്ഷ നിശ്ചിത മാനദണ്ഡങ്ങള്‍ക്കനുസൃതമായി നടത്തണം. അവസാന നിമിഷം തിരക്കുകൂട്ടിയുള്ള നടപടികള്‍ക്ക് മുതിരരുതെന്നും പ്രസ്താവനയിലുണ്ട്.
12,000-18,000 ഇടയില്‍ സിനിമകള്‍ക്കാണ് പ്രതിവര്‍ഷം സിബിഎഫ്‌സി സര്‍ട്ടിഫിക്കറ്റ് നല്‍കുന്നത്. അതില്‍ അവയുടെ പ്രദര്‍ശനങ്ങള്‍ കാണാനുള്ള മനുഷ്യ സമയവും ഉള്‍പ്പെടുന്നു. തങ്ങളുടെ സിനിമകള്‍ നിശ്ചയിച്ച തീയതിയില്‍ത്തന്നെ റിലീസ് ചെയ്യണമെന്ന നിര്‍മാതാക്കളുടെ ആവശ്യത്തെ ആത്മാര്‍ത്ഥതയോടെ അംഗീകരിക്കുകയും കൃത്യസമയത്ത് പ്രദര്‍ശനാനുമതി നല്‍കുകയും ചെയ്യാറുണ്ട്. ഷെഡ്യൂളുകള്‍ മനസ്സില്‍ വെച്ചുകൊണ്ട്, സര്‍ട്ടിഫിക്കേഷന്‍ പ്രക്രിയയ്ക്ക് ആവശ്യമായ നിശ്ചിത സമയം നിര്‍മ്മാതാക്കള്‍ ഉചിതമായി ആസൂത്രണം ചെയ്യണമെന്ന് ആവശ്യപ്പെട്ട ബോര്‍ഡ് ഈ പ്രക്രിയകളിലൂടെ ഏതെങ്കിലും തരത്തിലുള്ള മൂന്നാം കക്ഷികളുടെ ഇടപെടല്‍ തടയാമെന്നും ചൂണ്ടിക്കാട്ടുന്നു.
സി.ബി.എഫ്.സി. പുറപ്പെടുവിച്ച പ്രധാന മാര്‍ഗനിര്‍ദേശങ്ങള്‍ ചുരുക്കത്തില്‍
- സര്‍ട്ടിഫിക്കറ്റിനുള്ള അപേക്ഷ നിശ്ചിതസമയത്ത് ഓണ്‍ലൈനായി മാത്രം സമര്‍പ്പിക്കണം.
- സര്‍ട്ടിഫിക്കറ്റുകളുടെ പകര്‍പ്പ് സ്‌കാന്‍ ചെയ്ത് ബന്ധപ്പെട്ട അപേക്ഷകന്റെ രജിസ്റ്റര്‍ ചെയ്ത ഇമെയില്‍ ഐഡിയില്‍ പങ്കിടും. സെന്‍സര്‍ ബോര്‍ഡ് ആവശ്യപ്പെട്ടാല്‍ സര്‍ട്ടിഫിക്കറ്റിന്റെ ഫിസിക്കല്‍ കോപ്പി അയയ്‌ക്കേണ്ടതാണ്.
- എന്‍ക്രിപ്റ്റ് ചെയ്ത ഡിജിറ്റല്‍ സിനിമാ പാക്കേജിന്റെ (ഉള്ളടക്കം) പരിശോധനയ്ക്കായി ഇഡെലിവറി നടത്താം. ഇത് സമര്‍പ്പിക്കുന്ന ഉള്ളടക്കത്തിന്റെ സുരക്ഷ കൂട്ടുകയും അപേക്ഷകന്റെ ഓണ്‍ലൈന്‍ ഉള്ളടക്ക സ്റ്റാറ്റസ് ട്രാക്ക് ചെയ്യാനും സാധിക്കും. പുതിയ സംവിധാനം നടപ്പാക്കുന്നതുവരെ റീജിയണല്‍ ഓഫീസുകളില്‍ നിലവില്‍ നടന്നുകൊണ്ടിരിക്കുന്ന ഉള്ളടക്കം സീല്‍ ചെയ്ത് സിസിടി നിരീക്ഷണത്തില്‍ വെയ്ക്കുന്ന രീതി തുടരും.
- പരാതിപരിഹാരവുമായി ബന്ധപ്പെട്ട് [email protected] എന്ന മെയില്‍ ഐ.ഡി രൂപീകരിച്ചിട്ടുണ്ട്. ഇത് ഉടന്‍ പ്രവര്‍ത്തനക്ഷമമാകും. ഏതെങ്കിലും മൂന്നാം കക്ഷി തങ്ങള്‍ സെന്‍സര്‍ ബോര്‍ഡിന്റെ പ്രതിനിധിയാണെന്ന് അവകാശമുന്നയിക്കുകയോ സിബിഎഫ്‌സിയിലേക്ക് ആക്‌സസ് ഉണ്ടെന്ന് അവകാശപ്പെടുകയോ ചെയ്താല്‍, തുകയോ തുകയോ ആവശ്യപ്പെടുകയോ അല്ലെങ്കില്‍ നിശ്ചിത നടപടിക്രമം അട്ടിമറിക്കാന്‍ ശ്രമിക്കുകയോ ചെയ്താല്‍, അവര്‍ക്കെതിരെ ഉടന്‍ തന്നെ പരാതി മേല്‍പ്പറഞ്ഞ സെല്ലില്‍ അറിയിക്കണം.
