അച്ഛനേയും അമ്മയേയും ഇരുത്തി ഞാന്‍ വീഡിയോ കാണിച്ചു.. അച്ഛന്‍ മുകളിലേക്ക് നോക്കിയപ്പോൾ അമ്മ രൂക്ഷമായൊന്ന് നോക്കി! നീ ഇതിനാണോ കൊച്ചിയിലേക്ക് പോവുന്നതെന്നായിരുന്നു അവരുടെ ചോദ്യം

പാടാത്ത പൈങ്കിളി സീരിയലിലെ നായക കഥാപാത്രം ചെയ്തിരുന്ന താരമാണ് സൂരജ് സണ്‍. ദേവന്‍ എന്ന കഥാപാത്രത്തിലൂടെ ശ്രദ്ധിക്കപ്പെടാന്‍ താരത്തിന് സാധിച്ചിരുന്നെങ്കിലും താരം പിന്മാറുകയായിരുന്നു. ഒരു അപകടത്തെ തുടര്‍ന്ന് ചികിത്സയ്ക്ക് പോയതോടെയാണ് സൂരജ് സീരിയലില്‍ നിന്നും മാറുന്നത്. എന്നാലിപ്പോള്‍ വീണ്ടും അഭിനയത്തിലേക്ക് തിരിച്ച് വരുന്നതിന്റെ സന്തോഷമാണ് ഒരു യൂട്യൂബ് ചാനലിന് നല്‍കിയ അഭിമുഖത്തിലൂടെ പറയുന്നത്.

നിന്‍ചിരിയില്‍ എന്ന ആല്‍ബത്തില്‍ സൂരജ് അഭിനയിച്ചിരുന്നു. ജാസി ഗിഫ്റ്റ് ആലപിച്ച ഗാനരംഗത്തില്‍ റൊമാന്റിക് ഹീറോയായാണ് സൂരജ് എത്തിയത്. നന്നായി ചെയ്തിട്ടുണ്ട് മോനെയെന്ന് പറഞ്ഞ് ജാസി ഗിഫ്റ്റ് തന്നെ അഭിനന്ദിച്ചതിന്റെ സന്തോഷം സൂരജ് പങ്കിട്ടിരുന്നു. അയ്യപ്പഭക്തി ഗാനത്തിന് ശേഷമായാണ് ഈ റൊമാന്റിക് ആല്‍ബം ഇറങ്ങിയത്. സിനിമയാണ് ഇപ്പോഴും തന്റെ ലക്ഷ്യമെന്ന് സൂരജ് പറയുന്നു. പാടാത്ത പൈങ്കിളി ഷൂട്ടിനിടയിലെ അപകടത്തിന് ശേഷം ശരീരം ഓക്കെയായതോടെ ശബരിമലയിലേക്ക് പോയിരുന്നു. മനസും ശരീരവും നിറഞ്ഞ യാത്രയായിരുന്നു അത്.

അഭിനയിക്കാനുള്ള ഏത് അവസരവും താന്‍ സ്വീകരിക്കും. ജാസിച്ചേട്ടന്റെ ആല്‍ബത്തിലേക്ക് വിളിച്ചപ്പോള്‍ത്തന്നെ ഓക്കെ പറഞ്ഞിരുന്നു. ഇനി സിനിമയില്‍ അഭിനയിച്ച് തുടങ്ങിയാലും അദ്ദേഹത്തിന്റെ ഗാനത്തിനൊപ്പം അഭിനയിക്കാനാവുമോയെന്ന് അറിയില്ലല്ലോ. അങ്ങനെയാണ് ഈ ആല്‍ബത്തിലേക്ക് എത്തിയത്. 2020ലായിരുന്നു സീരിയലിലേക്ക് വന്നത്. ഈ ആല്‍ബത്തിലേക്ക് ക്ഷണിച്ചത് ക്യാമറാമാനായ പ്രശാന്ത് കൃഷ്ണനാണ്. ക്രൂ മെമ്പേഴ്‌സ് എല്ലാം നല്ല പിന്തുണയാണ് തന്നത്. നന്നായി പ്ലാന്‍ ചെയ്താണ് ഷൂട്ട് തുടങ്ങിയത്. ഒന്നോ രണ്ടോ ടേക്കില്‍ എല്ലാം ഓക്കെയായിരുന്നു. ആ ആല്‍ബത്തിലെ നായിക ഹിന്ദിക്കാരിയാണ്. എനിക്ക് ഹിന്ദി അറിയില്ല. ഞാന്‍ മലയാളത്തിലാണ് അവളോട് സംസാരിച്ചത്. അവള്‍ ക്യാ എന്ന് ചോദിക്കും. അത് കേട്ട് ഞാന്‍ ചിരിക്കും. അങ്ങനെയാണ് റൊമാന്റിക് രംഗങ്ങള്‍ ചിത്രീകരിച്ചത്.

അയ്യോ ഇത് സൂരജേട്ടനാണോ, ഇതൊന്നും കാണാന്‍ വയ്യേ എന്ന തരത്തിലുള്ള കമന്റുകള്‍ കണ്ടിരുന്നു. ആ സീന്‍ എങ്ങനെ നന്നാക്കാന്‍ പറ്റുമെന്നാണ് ഞാന്‍ എപ്പോഴും ചിന്തിക്കാറുള്ളത്. ആദ്യം വന്ന ആല്‍ബം അച്ഛനേയും അമ്മയേയും കാണിച്ചിരുന്നു. ഇതും കാണിക്കുമോയെന്നായിരുന്നു നിന്‍ചിരിയുടെ പോസ്റ്റര്‍ കണ്ടവര്‍ ചോദിച്ചത്. അച്ഛനേയും അമ്മയേയും ഇരുത്തി ഞാന്‍ വീഡിയോ കാണിച്ചിരുന്നു. അച്ഛന്‍ ഇങ്ങനെ മുകളിലേക്കൊക്കെ നോക്കുകയായിരുന്നു. അമ്മ രൂക്ഷമായൊന്ന് നോക്കി. നീ ഇതിനാണോ കൊച്ചിയിലേക്ക് പോവുന്നതെന്നായിരുന്നു അവരുടെ ചോദ്യം.

സിനിമയാണ് തന്റെ ലക്ഷ്യമെന്ന് സൂരജ് വളരെ മുന്‍പേ പറഞ്ഞിരുന്നു. വിനീത് ശ്രീനിവാസനെ കണ്ടതിനെക്കുറിച്ചും ഹൃദയത്തില്‍ പ്രവര്‍ത്തിക്കാന്‍ കഴിഞ്ഞതിനെക്കുറിച്ചും സൂരജ് അഭിമുഖത്തില്‍ തുറന്നുപറഞ്ഞിരുന്നു. പുതുമുഖങ്ങള്‍ക്ക് അവസരം കൊടുത്ത് അവര്‍ രക്ഷപ്പെടുന്നതൊക്കെ കണ്ടിരുന്നു. 10 സെക്കന്‍ഡാണ് ഞാന്‍ ഹൃദയത്തിലുള്ളത്. ആ രംഗം കട്ട് ചെയ്താലും ഇല്ലെങ്കിലും വിനീതേട്ടനൊപ്പവും ആദ്യമായി സിനിമാ ക്യാമറയുടെ മുന്നില്‍ നില്‍ക്കാന്‍ കഴിഞ്ഞതും വലിയ ഭാഗ്യമായി കാണുന്നുവെന്നുമായിരുന്നു സൂരജ് പറഞ്ഞത്. പുതിയൊരു സിനിമയില്‍ അവസരം ലഭിച്ചിട്ടുണ്ട്. അഭിനയിച്ച് തുടങ്ങിയതിന് ശേഷം അതേക്കുറിച്ച് ഔദ്യോഗികമായി അറിയിക്കാമെന്നുമായിരുന്നു സൂരജ് വ്യക്തമാക്കിയത്