ജീവിതത്തിലും എനിക്ക് പിതൃതുല്യനാണ് അദ്ദേഹം, പിതൃ ദിനത്തില്‍ സന്ദര്‍ശിക്കാനായത് ഒരു സുകൃത നിയോഗം; മധുവിനൊപ്പമുള്ള ചിത്രവുമായി മോഹന്‍ലാല്‍

നിരവധി ചിത്രങ്ങളില്‍ അച്ഛനും മകനുമായി ഏറെ ശ്രദ്ധിക്കപ്പെട്ട താരങ്ങളാണ് മധുവും മോഹന്‍ലാലും. ഇപ്പോഴിതാ ഇക്കഴിഞ്ഞ ഫാദേഴ്സ് ഡേയില്‍ മധുവിനെ, അദ്ദേഹത്തിന്റെ തിരുവനന്തപുരത്തുള്ള വീട്ടിലെത്തി സന്ദര്‍ശിിരിക്കകുയാണ് മോഹന്‍ലാല്‍. ഈ സന്തോഷം പോസ്റ്റിലൂടെ മോഹന്‍ലാല്‍ തന്നെ ആരാധകരെ അറിയിച്ചു.

‘സ്‌ക്രീനില്‍ എത്രയോ വട്ടം എനിക്ക് അച്ഛനായിട്ടുണ്ട് മധു സര്‍. ജീവിതത്തിലും എനിക്ക് പിതൃതുല്യനാണ് അദ്ദേഹം. അഭിനയത്തില്‍ ഗുരുതുല്യനും. ഇന്ന് ഈ പിതൃ ദിനത്തില്‍ തന്നെ അദ്ദേഹത്തെ തിരുവനന്തപുരത്തെ വീട്ടില്‍ സന്ദര്‍ശിക്കാനായത് ഒരു സുകൃത നിയോഗം. അങ്ങനെ ഈ പകലും സാര്‍ത്ഥകമായി,’ മോഹന്‍ലാല്‍ കുറിച്ചു.

മരയ്ക്കാര്‍: അറബിക്കടലിന്റെ സിംഹം സിനിമയില്‍ ഒന്നിക്കേണ്ടിയിരുന്നെങ്കിലും, മധു അനാരോഗ്യം മൂലം ആ കഥാപാത്രം ചെയ്തിരുന്നില്ല. തിരുവനന്തപുരം കണ്ണന്‍മൂലയിലാണ് മധുവിന്റെ വീട്. അതേസമയം, മോഹന്‍ലാലിന്റേതായി ട്വല്‍ത്ത് മാന്‍ എന്ന ചിത്രമാണ് ഒടുവില്‍ പുറത്തിറങ്ങിയിരിക്കുന്നത്.