ഇരുപത്തിയഞ്ച് വര്‍ഷത്തെ അഭിനയ ജീവിതത്തിനിടയില്‍ ചില നല്ല സിനിമകള്‍ കൈവിട്ടുപോയതിന്റെ കുറ്റബോധമുണ്ട് ; കുഞ്ചാക്കോ ബോബൻ
മലയാളചലച്ചിത്ര രംഗത്ത് ഒന്നര പതിറ്റാണ്ടുകളായി സജീവമായി നില്കുന്ന നടനാണ് കുഞ്ചാക്കോ ബോബൻ. 1997-ൽ പുറത്തിറങ്ങിയ അനിയത്തിപ്രാവ് എന്ന ചിത്രത്തിലൂടെ നായകനായി അരങ്ങേറിയ ഇദ്ദേഹം അൻപതിൽപരം മലയാളചലച്ചിത്രങ്ങളിൽ അഭിനയിച്ചിട്ടുണ്ട്.
അനിയത്തിപ്രാവ് എന്ന ചിത്രത്തിലൂടെ പ്രേക്ഷകരുടെ ചോക്ലേറ്റ് നായകനായി വന്നതാണ് കുഞ്ചാക്കോ ബോബന്‍ ചെറിയൊരു ഇടവേളയ്ക്ക് ശേഷം കുഞ്ചാക്കോ ബോബന്‍ സിനിമയിലേക്ക് തരിച്ചെത്തിയത് അടിമുടി മാറിയിട്ടാണ്. ചോക്ലേറ്റ് നായകന്‍ എന്ന ഇമേജ് പൂര്‍ണമായും മാറ്റിയെടുത്തു. അടുത്തിടെ ചാക്കോച്ചന് കിട്ടിയ കഥാപാത്രങ്ങളെല്ലാം ഒന്നിനൊന്ന് വ്യത്യസ്തവും വേറിട്ടതും ആയിരുന്നു. അതെല്ലാം കൈയ്യൊതുകത്തോടെ ചാക്കോച്ചന് ചെയ്യുകയും ചെയ്തു.
എന്നാല്‍ ഈ ഇരുപത്തിയഞ്ച് വര്‍ഷത്തെ അഭിനയ ജീവിതത്തിനിടയില്‍ ചില നല്ല സിനിമകള്‍ കൈവിട്ടുപോയതിന്റെ കുറ്റബോധമുണ്ട് എന്ന് കുഞ്ചാക്കോ ബോബന്‍ പറയുന്നു. അതില്‍ രണ്ട് സിനിമകളാണ് ക്ലാസ്‌മേറ്റ്‌സും ആന്‍ഡ്രോയിഡ് കുഞ്ഞപ്പനും.
ലാല്‍ ജോസിന്റെ ക്ലാസ്‌മേറ്റ്‌സിന്റെ കഥ ഞാന്‍ ഓകെ പറഞ്ഞതായിരുന്നു. പക്ഷെ ഒന്നു രണ്ട് തവണ അതിന്റെ ഷൂട്ടിങ് മാറിപ്പോയപ്പോള്‍, എനിക്ക് വേറെ കമ്മിറ്റ്‌മെന്റുകള്‍ ഏറ്റെടുക്കേണ്ടി വന്നു. ആ സമയത്ത് എനിക്ക് വിദേശത്തൊരു സ്‌റ്റേജ് ഷോ ഉണ്ടായിരുന്നു. അക്കാരണത്താലാണ് ക്ലാസ്‌മേറ്റ്‌സ് ഒഴിവാക്കേണ്ടി വന്നത്.
രതീഷ് ബാലകൃഷ്ണ പൊതുവാള്‍ സംവിധാനം ചെയ്ത ആന്‍ഡ്രോയിഡ് കുഞ്ഞപ്പന്‍ എന്ന സിനിമയിലെ സൗബിന്‍ ചെയ്ത വേഷം ആദ്യം വന്നത് എനിക്കായിരുന്നു. പക്ഷെ എനിക്ക് മനസ്സിലായില്ല. അക്കാരണത്താല്‍ ആണ് നോ പറഞ്ഞത്. പക്ഷെ സിനിമ റിലീസായപ്പോള്‍ സിനിമ ഒഴിവാക്കിയതില്‍ കുറ്റബോധം തോന്നി.
പക്ഷെ ഒഴിവാക്കിയ ആ രണ്ട് സംവിധായകരും തന്നെയാണ് സിനിമയില്‍ എനിക്കൊരു ബ്രേക്ക് തന്നത്. ലാല്‍ ജോസിന്റെ എല്‍സമ്മ എന്ന ആണ്‍കുട്ടിയിലൂടെയാണ് എനിക്ക് കംപ്ലീറ്റൊരു മേക്കോവര്‍ ഉണ്ടായത്. രാതീഷ് ബാലകൃഷ്ണ പൊതുവാളിന്റെ ന്നാ താന്‍ കേസ് കൊട് എന്ന ചിത്രവും കരിയറില്‍ വലിയൊരു ബ്രേക്ക് തന്ന സിനിമയാണ്.
അതേ സമയം ചെയ്തു പോയ ചിത്രങ്ങള്‍ ഓര്‍ത്തും, ശ്ശെ ചെയ്യേണ്ടിയിരുന്നില്ല എന്ന് തോന്നിയിട്ടുമുണ്ട്. പക്ഷെ ആ സിനിമകളെ കുറിച്ച് തുറന്ന് പറയുന്നത് ശരിയല്ല. ഞാന്‍ അഭിനയിച്ച് ഹിറ്റായ സിനിമകള്‍ ഇപ്പോള്‍ കാണുമ്പോള്‍ കുറച്ചുകൂടെ നന്നാക്കാമായിരുന്നു എന്നും തോന്നാറുണ്ട് എന്നാണ് കുഞ്ചാക്കോ ബോബന്‍ പറഞ്ഞത്.
