ഉമ്മയുടെ ഈ ദിനം ആഘോഷിക്കാൻ ഒരു ദിവസം മതിയാകില്ല… പക്ഷേ ഉമ്മ ഈ ഒരു ദിവസം മാത്രമെ അതിനനുവദിക്കൂൽ ഉമ്മയ്ക്ക് പിറന്നാൾ ആശംസകളുമായി ദുൽഖർ

ഉമ്മയ്ക്ക് പിറന്നാൾ ആശംസകളുമായി നടൻ ദുൽഖർ സൽമാൻ. ഫേസ്ബുക്ക് പോസ്റ്റിലൂടെയാണ് കുറിപ്പ് പങ്കുവെച്ചത്. ഉമ്മയുടെ ദിനം ആഘോഷിക്കാൻ ഒരു ദിവസം മതിയാകില്ലെന്നും പക്ഷേ ഉമ്മ ഈ ഒരു ദിവസം മാത്രമെ അനുവദിക്കുകയുള്ളു എന്നും നടൻ പറഞ്ഞു.

പിറന്നാൾ ആശംസകൾ ഉമ്മ.. ഉമ്മിച്ചിയുടെ പിറന്നാൾ ആഘോഷങ്ങളിലാണ് ഞങ്ങളുടെ വീട്ടിലെ ”കേക്ക് വീക്ക്” തുടങ്ങുന്നത്. വീട്ടിൽ എല്ലാവരും ഒന്നിച്ചുണ്ടെന്നുള്ള ഉറപ്പു വരുത്തുന്ന സമയം. മക്കളും പേരക്കുട്ടികളും ഒപ്പമുള്ള എല്ലാ വർഷങ്ങളിലെയും ഏറ്റവും സന്തോഷം നിറഞ്ഞ സമയമാണ് ഉമ്മക്കിത്.

ഞങ്ങൾക്കായി ഉമ്മ വീട് ഒരുക്കുകയും ഞങ്ങൾക്കിഷ്ടപ്പെട്ട വിഭവങ്ങൾ തയാറാക്കുകയും ചെയ്യുന്നു. സത്യത്തിൽ ഞങ്ങളെ എല്ലാവരെയും വഷളാക്കുന്നതിന്റെ പ്രധാന പങ്ക് ഉമ്മയ്ക്കാണ്. ഉമ്മയുടെ ഈ ദിനം ആഘോഷിക്കാൻ ഒരു ദിവസം മതിയാകില്ല. പക്ഷേ ഉമ്മ ഈ ഒരു ദിവസം മാത്രമെ അതിനനുവദിക്കൂ എന്നതാണ് സത്യം. ഉമ്മയ്ക്ക് ഇത്തരം കാര്യങ്ങൾ ഇഷ്ടമല്ലെങ്കിലും ഈ ദിനം ഞാൻ നഷ്ടപ്പെടുത്തുന്നില്ല. പിറന്നാൾ ആശംസകൾ ഉമ്മ, ദുൽഖർ കുറിച്ചു.

സുൽഫത്തിനൊപ്പമുള്ള ചിത്രവും ദുൽഖർ കുറിപ്പിനൊപ്പം പങ്കുവെച്ചിട്ടുണ്ട്.

വളരെ വിരളമായി മാത്രമാണ് പൊതു വേദികളിൽ മമ്മൂട്ടിക്കൊപ്പം സുൽഫത്ത് പ്രത്യക്ഷപ്പെടുന്നത്. പരിപാടികളിൽ പങ്കെടുക്കാൻ വന്നാൽ തന്നേയും വേദിയിലേക്ക് വരാനോ സംസാരിക്കാനോ ഒന്നും തയ്യാറാകാറില്ല. സുൽഫത്തിന്റെ ചിത്രങ്ങൾ ആരാധകർ കാണുന്നത് മകൻ ദുൽഖർ സൽമാൻ വല്ലപ്പോഴും പിറന്നാൾ ആശംസകൾ നേരാനായി സോഷ്യൽമീഡിയയിൽ പങ്കുവെക്കുമ്പോഴാണ്.