അമിത വേഗത; ബൈക്ക് അപകടത്തില്‍പ്പെട്ട് ചിരഞ്ജീവിയുടെയും പവന്‍ കല്യാണിന്റെയും സഹോദരി പുത്രന്‍ സായ് ധരം തേജ് ആശുപത്രിയില്‍

തെലുങ്ക് സിനിമാതാരം സായ് ധരം തേജിന് ബൈക്കപകടത്തില്‍ പരിക്കേറ്റു. ഹൈദരാബാദിലെ മധപൂര്‍ കേബിള്‍ പാലത്തിലൂടെ സ്‌പോര്‍ട്‌സ് ബൈക്ക് ഓടിച്ചുപോകവെയാണ് അപകടം ഉണ്ടായത്. അമിതവേഗതയാണ് അപകട കാരണമെന്നാണ് പോലീസ് പറയുന്നത്. ഐസിയുവില്‍ ചികിത്സയില്‍ കഴിയുന്ന താരം അപകടനില തരണം ചെയ്തതായാണ് വിവരം.

താരങ്ങളായ ചിരഞ്ജീവി, അല്ലു അരവിന്ദ്, വരുണ്‍ തേജ്, പവന്‍ കല്യാണ്‍ തുടങ്ങിയവര്‍ സായ് ധരം തേജിനെ ആശുപത്രിയില്‍ സന്ദര്‍ശിച്ചു. ചിരഞ്ജീവിയുടെയും പവന്‍ കല്യാണിന്റെയും സഹോദരി വിജയ ദുര്‍ഗയുടെ മകനാണ് സായ്.

ദേവ കട്ട സംവിധാനം ചെയ്യുന്ന പൊളിറ്റിക്കല്‍ ത്രില്ലര്‍ ചിത്രം ‘റിപബ്ലിക്കി’ന്റെ ചിത്രീകരണത്തില്‍ പങ്കെടുത്തുകൊണ്ടിരിക്കുകയായിരുന്നു സായ് ധരം തേജ്. ഐശ്വര്യ രാജേഷ് നായികയാവുന്ന ചിത്രത്തില്‍ ജഗപതി ബാബു, രമ്യ കൃഷ്ണന്‍, രാഹുല്‍ രാമകൃഷ്ണ, സായ് ധീന തുടങ്ങിയവരും വേഷമിടുന്നു. ഒക്ടോബര്‍ 10ന് ചിത്രം പ്രദര്‍ശനത്തിനെത്തുമെന്നാണ് റിപ്പോര്‍ട്ടുകള്‍.