അപര്‍ണയ്ക്കുള്ള കെെയ്യടികള്‍ ഇവര്‍ നാലു പേര്‍ക്ക് കൂടിയുള്ളതാണ്; കുറിപ്പ് വൈറലാകുന്നു
സൂരരെെ പൊട്രിനെ അഭിനന്ദിച്ചു കൊണ്ടുള്ള ചര്‍ച്ചകള്‍ സോഷ്യൽ മീഡിയയിൽ അവസാനിക്കുന്നില്ല. ആമസോണ്‍ പ്രൈമില്‍ റിലീസായ സൂര്യയുടെ പുത്തന്‍ ചിത്രത്തിൽ മലയാളി താരങ്ങളായ അപര്‍ണ്ണാ ബാലമുരളിയുടെയും ഉര്‍വശിയുടെയും അഭിനയ മികവിനെയും ഏവരും പ്രശംസിച്ചിരുന്നു. അപര്‍ണയുടെ പ്രകടനത്തെ കുറിച്ച് പറയുമ്പോള്‍ നാല് പേരെ കൂടെ പറയേണ്ടതുണ്ടെന്നാണ് മുകേഷ് കുമാര്‍ എന്ന വ്യക്തി പറയുന്നത്. മുകേഷ് കുമാറിന്റെ കുറിപ്പ് സോഷ്യല്‍ മീഡിയയില്‍ ചര്‍ച്ചയായി മാറുകയാണ്. മലയാള മൂവി ആന്റ് മ്യൂസിക് ഡാറ്റബേസ് എന്ന ഗ്രൂപ്പില്‍ പങ്കുവച്ച കുറിപ്പാണ് ചര്‍ച്ചയാകുന്നത്.
മുകേഷിന്റെ കുറിപ്പിന്റെ പൂർണരൂപം
“സൂരരൈ പൊട്ര്” സിനിമയിലെ അപര്‍ണ്ണാ ബാലമുരളിയുടെ പ്രകടനം പരക്കെ പ്രകീര്‍ത്തിക്കപ്പെടുന്നുണ്ടല്ലോ… സംവിധായിക സുധാ കൊങ്കരയ്ക്ക് പുറമേ എല്ലാ അര്‍ത്ഥത്തിലും ‘ബൊമ്മി’ എന്ന ക്യാരക്റ്ററായി മാറാന്‍ അപര്‍ണ്ണയെ സഹായിച്ച 4 പേരെക്കുറിച്ചാണ് ഈ പോസ്റ്റ്.
1)S S കലൈറാണി എന്ന അഭിനേത്രിയാണ് അപര്‍ണ്ണയെ ആക്റ്റിങ് വര്‍ക്ക്ഷോപ്പിലൂടെ ഒരു മധുരൈക്കാരിയായി രൂപപ്പെടുത്തിയെടുത്തത്. കലൈറാണി നമുക്കെല്ലാവര്‍ക്കും പരിചിതയാണ്. ഷങ്കറിന്റെ ‘മുതല്‍വന്‍’ എന്ന സിനിമയിൽ അര്‍ജ്ജുന്റെ അമ്മയായി അഭിനയിച്ച നടി. 1986 മുതൽ അഭിനയ രംഗത്തുണ്ടെങ്കിലും മുതല്‍നിലെ വേഷത്തോടെയാണ് ശ്രദ്ധിക്കപ്പെട്ടു തുടങ്ങിയത്. ചെന്നൈ അഡയാർ ഫിലിം ഇന്‍സ്റ്റിറ്റ്യൂട്ടില്‍ നാസർ, തലൈവാസൽ വിജയ് എന്നിവരുടെ സഹപാഠിയായിരുന്നു കലൈറാണി. അതിന് ശേഷം തമിഴിലെ തനത് / പരീക്ഷണ നാടക സംഘവും അഭിനയ കളരിയുമായ ‘കൂത്തുപട്ടറൈ’യില്‍ സജീവമായി പ്രവര്‍ത്തിക്കുകയായിരുന്നു. (ഒാഫ് ടോപിക് : തമിഴ് സിനിമ ലോകത്തിന് മികച്ച നടീനടന്‍മാരെ സംഭാവന ചെയ്ത് കൊണ്ടിരിക്കുന്ന കൂത്തുപ്പട്ടറൈയിലെ അക്കൗണ്ടന്റായിരുന്നു വിജയ് സേതുപതി. അവിടത്തെ അന്തരീക്ഷമാണ് തന്നിലെ നടനെ പാകപ്പെടുത്തിയെടുത്തതെന്ന് വിജയ് സേതുപതി പറഞ്ഞിട്ടുണ്ട്)
2)സൂരൈ പോറ്റ്ര് സിനിമയുടെ സംഭാഷണ രചയിതാവ് വിജയകുമാർ… IBM-ല്‍ പ്രോജക്റ്റ് ലീഡറായിരുന്ന വിജയകുമാർ ജോലി ഉപേക്ഷിച്ച് സിനിമയുടെ പിന്നാലെ കൂടി. പ്രധാന വേഷത്തിലഭിനയിച്ച് സ്വയം സംവിധാനം ചെയ്ത ആദ്യ ചിത്രം ‘ഉറിയടി’ ബോക്സ് ഒാഫീസ് വിജയവും നിരൂപക പ്രശംസയും നേടി. കഴിഞ്ഞ വര്‍ഷം ഉറിയടി 2 സംവിധാനം ചെയ്തു.
3)സംഭാഷണങ്ങള്‍ കൃത്യമായി മധുരൈ ഡയലക്റ്റില്‍ സംസാരിക്കാന്‍ അപര്‍ണ്ണയെ ട്രെയിൻ ചെയ്ത സംവിധായകൻ വിരുമാണ്ടി.. ഈ ലോക്ക്ഡൗണ്‍ കാലത്ത് OTT പ്ലാറ്റ്ഫോമില്‍ റിലീസ് ചെയ്ത ഐശ്വര്യ രാജേഷ് – വിജയ് സേതുപതി ചിത്രമായ ‘കാ. പേ. രണസിങ്കം’ എന്ന സിനിമയുടെ സംവിധായകനാണ് വിരുമാണ്ടി. മധുരൈ ഡയലക്റ്റില്‍ ഒാരോ വാക്കും വാചകവും എങ്ങനെ പറയുമെന്ന് നേരിട്ടും വോയ്സ് നോട്ട്സിലൂടെയും കൃത്യമായി പരിശീലിപ്പിച്ചെടുത്തു ഇരുപത് വര്‍ഷമായി സിനിമാ രംഗത്തുള്ള മധുരൈക്കാരന്‍ വിരുമാണ്ടി.
4)ഡബ്ബിങ് വേളയില്‍ അപര്‍ണ്ണയോടൊപ്പമിരുന്ന് ഉച്ചാരണവും താളവുമൊക്കെ കറക്റ്റ് ചെയ്തത് ആ സിനിമയിൽ ചെറിയൊരു വേഷത്തിലഭിനയിച്ച ‘സത്യ’ എന്ന അഭിനേത്രിയാണ്…
അപർണ്ണയോടൊപ്പം ഇവരൊക്കെയും ഒത്തുപിടിച്ചപ്പോള്‍ ബൊമ്മി പ്രേക്ഷകര്‍ക്കിഷ്ടപ്പെട്ട കഥാപാത്രമായി മാറി…
