പോര്‍ട്ടോ ഇന്റര്‍നാഷണല്‍ ഫിലിം ഫെസ്റ്റിവലില്‍ പുരസ്‌കാര നേട്ടവുമായി ടൊവിനോ തോമസ്

പോര്‍ച്ചുഗലില്‍ വെച്ച് നടന്ന നാല്പത്തിനാലാമത് പോര്‍ട്ടോ ഇന്റര്‍നാഷണല്‍ ഫിലിം ഫെസ്റ്റിവലില്‍ പുരസ്‌കാര നേട്ടവുമായി ടൊവിനോ തോമസ്. ഡോ. ബിജു സംവിധാനം ചെയ്ത ‘അദൃശ്യജാലകങ്ങള്‍’ എന്ന ചിത്രത്തിലെ പ്രകടനത്തിലൂടെ മികച്ച നടനുള്ള പുരസ്‌കാരമാണ് ടൊവിനോ സ്വന്തമാക്കിയിരിക്കുന്നത്.

മേളയുടെ 44 വര്‍ഷത്തെ ചരിത്രത്തില്‍ ആദ്യമായാണ് ഒരു ഇന്ത്യക്കാരന്‍ മികച്ച നടനുള്ള പുരസ്‌കാരം സ്വന്തമാക്കുന്നത്. ചൈന, ജപ്പാന്‍, ഇറ്റലി, അര്‍ജന്റീന, കാനഡ, യു കെ, ഫ്രാന്‍സ്, യു എസ് എ, ഹംഗറി, ഫിലിപ്പൈന്‍സ്, സ്‌പെയിന്‍, എസ്‌റ്റോണിയ, ഓസ്ട്രിയ തുടങ്ങീ മുപ്പത്തിരണ്ട് രാജ്യങ്ങളില്‍ നിന്നുള്ള 90 സിനിമകളാണ് മത്സരവിഭാഗത്തില്‍ ഉണ്ടായിരുന്നത്.

2023 നവംബറില്‍ എസ്‌റ്റോണിയയിലെ താലിന്‍ ബ്‌ളാക്ക് നൈറ്റ്‌സ് അന്താരാഷ്ട്ര ചലച്ചിത്ര മേളയില്‍ വേള്‍ഡ് പ്രീമിയര്‍ നടത്തിയ ചിത്രത്തിന് മികച്ച പ്രേക്ഷക നിരൂപക പ്രശംസകളാണ് കിട്ടിയത്.

2019 ല്‍ ഡോ. ബിജുവിന്റെ ‘പെയിന്റിങ് ലൈഫ്’ എന്ന ചിത്രം പോര്‍ട്ടോ ഫിലിം ഫെസ്റ്റിവലില്‍ ഡയറക്ടേഴ്‌സ് വീക്ക് വിഭാഗത്തില്‍ പ്രദര്‍ശിപ്പിക്കുകയും ക്രിട്ടിക്‌സ് അവാര്‍ഡ് കരസ്ഥമാക്കുകയും ചെയ്തിരുന്നു.