ഇന്നലെ ഒന്നും പറയാതെ നീയും പോയി. ഇനി ആകെയുള്ളത് ഒരു ആയുഷ്കാലം മുഴുവൻ ഓർക്കാനായി നീ എന്ന സുഹൃത്തിനോടൊപ്പമുണ്ടായിരുന്ന നല്ല കുറേ നാളുകൾ; ജോൺ ജേക്കബ്

സിനിമകളിലൂടെയും മിനി സ്‌ക്രീനിലൂടെയും പ്രേക്ഷകര്‍ക്ക് പ്രിയങ്കരനായ നടൻ ആണ് ജോൺ ജേക്കബ്. നടി ധന്യ മേരി വര്‍ഗീസിന്റെ ഭർത്താവ് കൂടിയായ ജോൺ നല്ലൊരു കൊറിയോഗ്രാഫർ കൂടിയാണ്.

സോഷ്യൽ മീഡിയയിലും ഏറെ ഫാൻസുള്ള ജോൺ പങ്കുവയ്ക്കുന്ന പോസ്റ്റുകൾ അതിവേഗമാണ് വൈറൽ ആകുന്നത്. മിക്ക വിശേഷങ്ങളും ആരാധകരുമായി ഷെയർ ചെയ്യാറുള്ള ജോൺ ഇപ്പോൾ വളരെ ഇമോഷണലായ ഒരു കുറിപ്പാണു പങ്കിട്ടിരിക്കുന്നത്.

തന്റെ പ്രിയസുഹൃത്തിന്റെ വേർപാടിനെകുറിച്ചും ബാല്യകാല സുഹൃത്തിന്റെ ഓർമ്മകളും ആണ് ജോൺ കുറിപ്പിലൂടെ പങ്കിടുന്നത്.

‘ഒരുമിച്ചു സ്‌കൂളിൽ പോകുന്നതും സ്കൂൾ വിട്ടു വരുന്ന വഴിക്കു വഴിവക്കിലെ വീടിന്റെ മതിലിൽ കയറി ലവലോലിക്കയും ചാമ്പക്കയും പറിക്കുന്നതും എല്ലാം ദുഃഖത്തോടെയാണ് ജോൺ കുറിക്കുന്നത്. ‘ഇനി ആകെയുള്ളത് ഒരു ആയുഷ്കാലം മുഴുവൻ ഓർക്കാനായി നീ എന്ന സുഹൃത്തിനോടൊപ്പമുണ്ടായിരുന്ന നല്ല കുറേ നാളുകൾ. അതെന്നുമുണ്ടാവും’, എന്നും പോസ്റ്റിലൂടെ ജോൺ പറയുന്നു

ജോണിന്റെ വാക്കുകൾ!
ഏഴാം ക്ലാസ്സു മുതൽ ഒരുമിച്ചു സ്കൂളിൽ പോകുന്നതും തോട്ടിൽ മീൻ പിടിച്ചതും സ്കൂൾ വിട്ടു വരുന്ന വഴിക്കു വഴിവക്കിലെ വീടിന്റെ മതിലിൽ കയറി ലവലോലിക്കയും ചാമ്പക്കയും പറിക്കുന്നത്. നമുക്ക് മാത്രം ഉണ്ടായിരുന്ന ബിഎസ്എ ഫോട്ടോൺ മത്സരിച്ച് കയറ്റം ചവിട്ടി കയറുന്നതും, ഗ്ളാസ് പീസ് വാങ്ങി,ടാർ വാങ്ങി ഉരുക്കി ഒട്ടിച്ചു ഫിഷ് ടാങ്ക് ഉണ്ടാക്കി സാരിവാലനും ഗപ്പിയും വളർത്തിയത്.

ആദ്യമായി ആംപ്ലിഫയർ ഉണ്ടാക്കി സ്‌പീക്കർ കലത്തിൽ ചരിച്ചു വച്ചു പാട്ടുകേട്ട് ഒരുമിച്ചു ഒരു കട്ടിലിൽ കിടന്നുറങ്ങിയിട്ടുള്ളതും. ആകുളം സ്വിംമിങ് പൂളിൽ വീട്ടുകാരറിയാതെ നീന്താൻ പോയതും.ടിവി ആന്റിന ട്യൂൺ ചെയ്തു ലീക്ക് ആയ കേബിൾ സിഗ്നൽ പിടിച്ചു ബ്ലാക്ക് ആൻഡ് വൈറ്റ് ടിവിയിൽ MTV കണ്ടത്. സൈക്കിൾ മാറി ബൈക്ക് വാങ്ങിയപ്പോൾ വീണ്ടും നമുക്ക് ഒരേ ബൈക്ക് വാങ്ങി RX 135 5 സ്പീഡ് വാങ്ങിയത്.

അതിൽ ചുറ്റിയിട്ടുള്ളത്. ഒടുവിൽ കാർ വാങ്ങിയപ്പോൾ അതും നിന്റെ കൈകൊണ്ടു നീ വർക്ക് ചെയ്തിരുന്ന ജിയോ മോട്ടോഴ്സിൽ നിന്നും ലാൻസറും പിന്നെപജേറോയും. അങ്ങനെ എന്തെല്ലാം എന്തെല്ലാം കാര്യങ്ങൾ. നിന്റെ ചിതക്കു നിന്റെ മകൻ തീ കൊളുത്തുന്നത് കണ്ടപ്പോൾ എന്റെ മനസ്സിൽ മിന്നിമാഞ്ഞു.

മേൽ പറഞ്ഞതിൽ മറ്റിറീലിസ്റ്റിക് ആയ എല്ലാം എനിക്കു നേരത്തേ നഷ്ടപ്പെട്ടിരുന്നു. ഇന്നലെ ഒന്നും പറയാതെ നീയും പോയി. ഇനി ആകെയുള്ളത് ഒരു ആയുഷ്കാലം മുഴുവൻ ഓർക്കാനായി നീ എന്ന സുഹൃത്തിനോടൊപ്പമുണ്ടായിരുന്ന നല്ല കുറേ നാളുകൾ. അതെന്നുമുണ്ടാവും ഗുഡ്ബൈ ഡിയർ ഫ്രണ്ട് അല്ല അളിയാ.