47-ാം തമിഴ്നാട് റൈഫിള്‍ ഷൂട്ടിങ് ചാംപ്യന്‍ഷിപ്പില്‍ പങ്കെടുത്ത് നടന്‍ അജിത് കുമാര്‍. താരത്തെ കാണാനായി ആയിരക്കണക്കിന് ആരാധകരാണ് തിങ്ങിനിറഞ്ഞത്. ആരാധകരെ അഭിവാദ്യം ചെയ്തതിനുശേഷമാണ് താരം മത്സരത്തില്‍ പങ്കെടുക്കാന്‍ ഇറങ്ങിയത്. 10 മീറ്റര്‍, 25 മീറ്റര്‍, 50 മീറ്റര്‍ പിസ്റ്റള്‍ ഷൂട്ടിങ്ങിലാണ് താരം പങ്കെടുത്തത്. താരം റൈഫിള്‍ ക്ലബ്ബില്‍ ഉണ്ടെന്നറിഞ്ഞതോടെ ആരാധകര്‍ അവിടേയ്ക്ക് ഒഴുകിയെത്തി.
റൈഫിള്‍ ക്ലബ്ബ് പരിസരം ജനസമുദ്രമായതോടെ അജിത്തിന് പുറത്തിറങ്ങാന്‍ സാധിക്കാത്ത നിലയില്‍ കാര്യങ്ങളെത്തുകയായിരുന്നു തുടര്‍ന്ന് പൊലീസ് മേലധികാരികള്‍ എത്തിയതോടെയാണ് കാര്യങ്ങള്‍ നിയന്ത്രണവിധേയമായത്.
വലിമൈയ്ക്കു ശേഷം എച്ച്. വിനോദ് സംവിധാനം ചെയ്യുന്ന പുതിയ ചിത്രത്തിലാണ് അജിത് ഇപ്പോള്‍ അഭിനയിക്കുന്നത്. ചിത്രം പാന്‍ ഇന്ത്യന്‍ റിലീസായി പുറത്തിറക്കാനാണ് അണിയറപ്രവര്‍ത്തകര്‍ ശ്രമിക്കുന്നത്. അഞ്ച് ഭാഷകളില്‍ ആയിരിക്കും സിനിമയുടെ റിലീസ്. ബോണി കപൂറാണ് നിര്‍മാണം. മഞ്ജു വാരിയര്‍ നായികയായി എത്തുന്നു.