ബോഡി ഷെയ്മിങ് നടത്തി എന്ന ഒരുവിഭാഗത്തിന്റെ ആരോപണത്തിന് പിന്നാലെ ഖേദം പ്രകടിപ്പിച്ച് മമ്മൂട്ടി പങ്കുവച്ച കുറിപ്പിന് താഴെ കമന്റുമായി സംവിധായകൻ ജൂഡ് ആന്റണി ജോസഫ്.. . തന്റെ തല കാരണം മമ്മൂട്ടി ഖേദം പ്രകടിപ്പിച്ചതിൽ താൻ ഖേദം പ്രകടിപ്പിക്കുന്നുവെന്നാണ് ജൂഡ് ആന്റണി ഫേസ്ബുക്കിൽ കുറിച്ചത്.
‘എനിക്കാ വാക്കുകൾ അഭിനന്ദനമായാണ് തോന്നിയത് മമ്മൂക്ക. എന്റെ സുന്ദരമായ തല കാരണം മമ്മൂക്ക ഖേദം പ്രകടിപ്പിക്കേണ്ടി വന്നതിൽ ഞാൻ ഖേദം പ്രകടിപ്പിക്കുന്നു’. എന്ന് ജൂഡ് ആന്റണി കുറിച്ചു.
‘2018’ എന്ന സിനിമയുടെ ട്രെയ്ലര് ലോഞ്ച് വേളയിലാണ് മമ്മൂട്ടി പരാമര്ശം നടത്തിയത്. ജൂഡ് ആന്റണിയുടെ തലയില് കുറച്ച് മുടി കുറവാണെന്നേയുള്ളൂ, ബുദ്ധിയുണ്ട് എന്നാണ് മമ്മൂട്ടി പറഞ്ഞത്. പിന്നാലെ നടന്റെ വാക്കുകള് സമൂഹ മാധ്യമങ്ങളില് ചര്ച്ചയായി. മമ്മൂട്ടി നടത്തിയത് ബോഡി ഷെയിമിംഗ് ആണെന്ന വിമര്ശനമാണ് സോഷ്യല്മീഡിയ ഉയര്ന്നത്. താന് ഏറെ ബഹുമാനിക്കുന്ന വ്യക്തി ഏറെ സ്നേഹത്തോടെ പറഞ്ഞ വാക്കുകളെ വളച്ചൊടിക്കരുതെന്ന് ജൂഡ് ആവശ്യപ്പെട്ടിരുന്നു.