യുവനടൻ ഷെയ്ൻ നിഗവുമായി ബന്ധപ്പെട്ട സിനിമത്തര്‍ക്കം ഒത്തുതീര്‍പ്പിലേക്ക് എന്ന് റിപ്പോര്‍ട്ട്. നടൻ ഷെയ്ൻ നിഗം അമ്മ ഭാരവാഹികളുമായി ചര്‍ച്ച നടത്തി. നടൻസിദ്ദിഖിൻ്റെ ആലുവയിലെ വസതിയിലായിരുന്നു ചർച്ച.
നടൻ സിദ്ധിഖിൻ്റെ മധ്യസ്ഥതയിൽ നടന്ന ചര്‍ച്ചയിൽ മുടങ്ങിയ സിനിമകള്‍ പൂര്‍ത്തിയാക്കാൻ സഹകരിക്കുമെന്ന് ഷെയ്ൻ അറിയിച്ചുവെന്നാണ് റിപ്പോര്‍ട്ട്. അമ്മയുമായുള്ള വിവിധ വിഷയങ്ങളിൽ മുമ്പും സിദ്ധിഖ് നിര്‍ണായക ഇടപെടൽ നടത്തിയിട്ടുണ്ട്.
ഇന്നലെ രാത്രി സിദ്ധിഖിൻ്റെ ആലുവയിലെ വസതിയിലാണ് ചര്‍ച്ച നടന്നത്. ജനറൽ സെക്രട്ടറി ഇടവേള ബാബുവാണ് ചര്‍ച്ചയിൽ അമ്മ സംഘടനയെ പ്രതിനിധീകരിച്ചത്. മുടങ്ങിയ സിനിമകളായ വെയിൽ, കുര്‍ബാനി, ഉല്ലാസം എന്നീ സിനിമകള്‍ പൂര്‍ത്തിയാക്കാൻ സഹകരിക്കുമെന്ന് ഷെയ്ൻ അമ്മ ഭാരവാഹികളെ അറിയിച്ചു. അമ്മ ഭാരവാഹികള്‍ ഉടൻ ഫെഫ്കയുമായി ചര്‍ച്ച നടത്തും. ചര്‍ച്ചകളിലെ തീരുമാനം പ്രൊഡ്യൂസേഴ്സ് അസോസിയേഷൻ ഭാരവാഹികളെ അറിയിക്കാനാണ് അമ്മ ഭാരവാഹികളുടെ തീരുമാനം. പ്രൊഡ്യൂസേഴ്സ് അസോസിയേഷൻ ഷെയ്ൻ നിഗത്തിന് വിലക്ക് ഏര്‍പ്പെടുത്തിയതിന് പിന്നാലെ വിഷയത്തിൽ അമ്മ ഇടപെടുമെന്ന റിപ്പോര്‍ട്ടുകള്‍ പുറത്തുവന്നിരുന്നു.
രാജസ്ഥാനിലെ അജ്മീറിലായിരുന്ന നടൻ ഷെയ്ൻ നിഗം രണ്ട് ദിവസം മുമ്പാണ് കേരളത്തിൽ എത്തിയത്. നവംബര്‍ 28 നാണ് പ്രോഡ്യൂസേഴ്സ് അസോസിയേഷന്‍ ഷെയൻ നിഗത്തിന് വിലക്ക് ഏര്‍പ്പെടുത്തിയത്. വെയിൽ, കുർബാനി സിനിമകൾ ഉപേക്ഷിക്കുമെന്നും ഇതുവരെ ചെലവായ തുക ഷെയിനിൽ നിന്ന് ഈടാക്കുമെന്നും പ്രോഡ്യൂസേഴ്സ് അസോസിയേഷന്‍ അറിയിച്ചിരുന്നു. ഈ പണം നൽകാതെ ഷെയിനിനെ ഇനി ഒരു സിനിമയിലും സഹകരിപ്പിക്കില്ലെന്നായിരുന്നു അസോസിയേഷൻ്റെ നിലപാട്.
shane nigam