മണികണ്ഠൻ ആചാരി ആദ്യമായി പാടി അഭിനയിച്ച ഓട്ടത്തിലെ ഗാനം ആസിഫ് അലി റിലീസ് ചെയ്യുന്നു. ഇന്ന് വൈകിട്ട് അഞ്ചു മണിക്കാണ് ആസിഫ് അലി അദ്ദേഹത്തിന്റെ ഫേസ്ബുക്ക് ഒഫീഷ്യൽ പേജിലൂടെ ഗാനം റിലീസ് ചെയ്യുന്നത്.
സ്വഭാവനടനുള്ള 2016 ലെ കേരള സംസ്ഥാന ചലച്ചിത്ര അവാർഡ് സ്വന്തമാക്കിയ മണികണ്ഠൻ ഇതിനോടകം അഭിനയരംഗത്ത് തന്റെ കഴിവ് പ്രകടമാക്കിയ താരമാണ്. കലാമൂല്യമുള്ള ഓട്ടം സിനിമയിലൂടെ ആദ്യമായി പാടി അഭിനയിക്കുകയാണ് മണികണ്ഠൻ ആചാരി.
സാധാരണക്കാരന്റെ ജീവിതത്തെ വളരെ റിലയലിസ്റ്റിക്ആയി അവതരിപ്പിക്കുന്ന സിനിമായാണ് ഓട്ടം. ജീവിതത്തിൽ ജയവും തോൽവിയും ഒഴിവാക്കാൻ ആവാത്ത രണ്ടു വശങ്ങൾ ആണെന്ന ആശയമാണ് ഓട്ടം സിനിമ പ്രേക്ഷകരോട് പങ്കു വയ്ക്കുന്നത്.
ബ്ലെസി സംവിധാനം ചെയ്ത കളിമണ്ണിനു ശേഷം തോമസ് തിരുവല്ല നിര്‍മ്മിക്കുന്ന ചിത്രമാണ് ഓട്ടം. കളിമണ്ണില്‍ ബ്ലെസിയുടെ അസോസ്സിയേറ്റായിരുന്ന സാം ആണ് സംവിധായകന്‍. നവാഗതനായ രാജേഷ് കെ നാരായണനാണ് തിരക്കഥ ഒരുക്കിയിരിക്കുന്നത്.
നാഷണല്‍ അവാര്‍ഡ് ജേതാവായ രാജാമുഹമ്മദിന്റെ അസോസിയേറ്റ് എഡിറ്ററായ വി.എസ്സ് വിശാല്‍ മലയാളത്തില്‍ ആദ്യമായി എഡിറ്റിംഗ് നിര്‍വ്വഹിക്കുന്ന ചിത്രം ആണ് ഓട്ടം. റിയാലിറ്റി ഷോയിലൂടെ സംവിധായകന്‍ ലാല്‍ ജോസ് കണ്ടെത്തിയ നന്ദു ആനന്ദും റോഷന്‍ ഉല്ലാസുമാണ് പ്രധാന കഥാപാത്രങ്ങളെ അവതരിപ്പിക്കുന്നത്. നായികമാരായി എത്തുന്ന രേണു, മാധുരി, സാന്ദ്ര തുടങ്ങിയവരും പുതുമുഖങ്ങളാണ്.
ഇവരെ കൂടാതെ രോഹിണി, അലൻസിയർ, മണികണ്ഠന്‍ ആചാരി, സുധീർ കരമന എന്നിവരും പ്രധാന വേഷങ്ങളിൽ എത്തുന്നു. ചിത്രം മാർച്ച് 8 നു തീയേറ്ററുകളിൽ എത്തും.
നേരത്തെ ചിത്രത്തിന്റെ ട്രെയ്‌ലർ ലാൽ ജോസ് തന്റെ ഒഫീഷ്യൽ പേജിലൂടെ പങ്കു വച്ചിരുന്നു.
ottam song release on asif ali official page