സ്വകാര്യ മാളിൽ പരിപാടിക്കെത്തിയ യുവനടിമാര്‍ക്ക് നേരെ ലൈംഗീക അതിക്രമം. കോഴിക്കോട്ടെ സ്വകാര്യ മാളിൽ പുതിയ സിനിമയുടെ പ്രമോഷൻ പരിപാടിയിൽ പങ്കെടുക്കാനെത്തിയ രണ്ട് യുവനടിമാര്‍ക്ക് നേരെയാണ് ജനക്കൂട്ടത്തിൽ നിന്നും ചിലർ അതിക്രമം നടത്തിയത്. അതിക്രമത്തിന് ഇരയായ നടിമാരിൽ ഒരാൾ സമൂഹമാധ്യമത്തിൽ ദുരനുഭവം പങ്കുവച്ചതോടെയാണ് വിഷയം പുറത്തറിഞ്ഞത്. ഫേസ്ബുക്ക് കുറിപ്പിലൂടെയായാണ് ഇതേക്കുറിച്ച് താരം വ്യക്തമാക്കിയത്.ഇന്ന് എന്റെ പുതിയ ചിത്രമായ സാറ്റര്‍ഡേ നൈറ്റിന്റെ ഭാഗമായി കോഴിക്കോട് ഹൈലൈറ്റ് മാളില്‍ വെച്ച് നടന്ന പ്രമോഷന് വന്നപ്പോള്‍ എനിക്ക് ഉണ്ടായത് മരവിപ്പിക്കുന്ന ഒരുനുഭവമാണ്. ഞാന്‍ ഒത്തിരി ഇഷ്ടപ്പെടുന്ന ഒരു സ്ഥലമാണ് കോഴിക്കോട്.
പക്ഷേ, പ്രോഗ്രാം കഴിഞ്ഞ് പോകുന്നതിനിടയില്‍ ആള്‍ക്കൂട്ടത്തില്‍ അവിടെ നിന്നൊരാള്‍ എന്നെ കയറിപ്പിടിച്ചു. എവിടെ എന്ന് പറയാന്‍ എനിക്ക് അറപ്പ് തോന്നുന്നു. ഇത്രയ്ക്ക് ഫ്രസ്‌ട്രേറ്റഡായിട്ടുള്ളവരാണോ നമുക്ക് ചുറ്റുമുള്ളവര്‍? പ്രമോഷന്റെ ഭാഗമായി ഞങ്ങള്‍ ടീം മുഴുവന്‍ പലയിടങ്ങളില്‍ പോയി. അവിടെയൊന്നും ഉണ്ടാവാത്ത വൃത്തികെട്ട അനുഭവമായിരുന്നു ഇന്നുണ്ടായത്. എന്റെ കൂടെയുണ്ടായ മറ്റൊരു സഹപ്രവര്‍ത്തകയ്ക്കും ഇതേ അനുഭവമുണ്ടായി. അവര്‍ അതിന് പ്രതികരിച്ചു, പക്ഷേ, എനിക്കതിന് ഒട്ടും പറ്റാത്ത സാഹചര്യമായിപ്പോയി.
ഒരുനിമിഷം ഞാന്‍ മരവിച്ചുപോയി, ആ മരവിപ്പില്‍ നിന്നുകൊണ്ട് തന്നെ ഞാന്‍ ചോദിക്കുകയാണ്, തീര്‍ന്നോ നിന്റെയൊക്കെ അസുഖം എന്നായിരുന്നു ആ കുറിപ്പ്.
സഹപ്രവര്‍ത്തകരും ആരാധകരുമുള്‍പ്പടെ നിരവധി പേരാണ് ഗ്രേസിന്റെ പോസ്റ്റിന് താഴെയായി കമന്റുകളുമായെത്തിയത്. പ്രതികരിക്കണമായിരുന്നു. നിയമപരമായ രീതിയില്‍ മുന്നോട്ട് പോവണമെന്നായിരുന്നു കമന്റുകള്‍.